ମୁମ୍ବାଇ: ଫର୍ଚ୍ୟୁନ ଇଣ୍ଡିଆ ୨୦୧୯ର ଶୀର୍ଷ ୫୦ ଶକ୍ତିଶାଳୀ ମହିଳାଙ୍କ ତାଲିକା ପ୍ରକାଶ ପାଇଛି। ଏହି ତାଲିକାରେ ବଲିଉଡ୍ ଅଭିନେତ୍ରୀ ଅନୁଷ୍କା ଶର୍ମାଙ୍କୁ ସ୍ଥାନ ମିଳିଛି। ୩୯ ନମ୍ବର ସ୍ଥାନରେ ଥିବା ଅନୁଷ୍କା ଉକ୍ତ ତାଲିକାର ସର୍ବ କନିଷ୍ଠା ମହିଳା ବୋଲି ଜଣାପଡ଼ିଛି। ବିଭିନ୍ନ ବିଭାଗକୁ ଆଲୋଚନାକୁ ନେଇ ଏହି ତାଲିକା ପ୍ରସ୍ତୁତ କରାଯାଇଥାଏ। ତେବେ ଫର୍ଚ୍ୟୁନ ଇଣ୍ଡିଆ ଅନୁଷ୍କାଙ୍କୁ ଏହି ତାଲିକାରେ ସାମିଲ କରି ତାଙ୍କୁ ଏକ ନୂଆ ପରିଚୟ ଦେଇଛି। ଏଥିସହ ସେ ନିଜର ଫ୍ୟାଶନ୍ ରେଞ୍ଜ ଓ ବ୍ରାଣ୍ଡର କେବଳ ନାମୀଦାମୀ ମୁହଁ ନୁହଁନ୍ତି ବରଂ ଏକ ଫିଲ୍ମ ପ୍ରାଯୋଜକ ବୋଲି ଫର୍ଚ୍ୟୁନ ଇଣ୍ଡିଆ କହିଛି। ମାତ୍ର ୨୫ବର୍ଷ ବୟସରେ ଅନୁଷ୍କା ନିଜର ପ୍ରଡକ୍ସନ ବ୍ୟାନରରେ କମ୍ ବଜେଟର ଫିଲ୍ମ ନିର୍ମାଣ କରିଥିଲେ। ୨୦୦୮ରେ ଫିଲ୍ମ ‘ରବ ନେ ବନା ଦି ଯୋଡି’ରୁ ବଲିଉଡ୍ରେ ଡେବ୍ୟୁ କରିଥିବା ଅନୁଷ୍କା ଗୋଟିଏ ପରେ ଗୋଟିଏ ହିଟ୍ ଫିଲ୍ମ ଦର୍ଶକଙ୍କୁ ଭେଟି ଦେଇ ଚାଲିଛନ୍ତି। ଅନ୍ୟପଟେ ସୋସିଆଲ ମିଡିଆରେ ବିବାଦୀୟ ବୟାନକୁ ନେଇ ଚର୍ଚ୍ଚାରେ ରହୁଥିବା କମାଲ ଆର ଖାନ ଅନୁଷ୍କାଙ୍କ ଏହି ସଫଳତାକୁ ନେଇ ପ୍ରତିକ୍ରିୟା ରଖିଛନ୍ତି। ଏହାକୁ ନେଇ କେଆର୍କେ ତାଙ୍କୁ ଟାର୍ଗେଟ କରି ଏକ ଟୁଇଟ କରିଛନ୍ତି। ଅନୁଷ୍କା ଶର୍ମା ୨୦୧୯ର ଭାରତର ଶକ୍ତିଶାଳୀ ମହିଳାଙ୍କ ତାଲିକାରେ ସାମିଲ ହୋଇଥିବା ମାତ୍ର ଜଣେ ବଲିଉଡ୍ ଅଭିନେତ୍ରୀ। ଯଦି ଅନୁଷ୍କା ଭାରତର ସବୁଠାରୁ ଶକ୍ତିଶାଳୀ ମହିଳା ତେବେ ମୁଁ ଆମେରିକାର ରାଷ୍ଟ୍ରପତି ବୋଲି କେଆର୍କେ କହିଛନ୍ତି। ତେବେ ତାଙ୍କର ବିବାଦୀୟ ଟୁଇଟ ପରେ ୟୁଜର୍ସ ତାଙ୍କୁ ଟ୍ରୋଲ କରିଥିବା ଦେଖିବାକୁ ମିଳିଛି।
