ତିହିଡ଼ି, ୨।୮ (ଡି.ଏନ.ଏ.) – ଭଦ୍ରକ ଜିଲା ତିହିଡ଼ି ତହସିଲ ଅଧୀନ କୁବେରା ପଞ୍ଚାୟତର ୩ଟି ମୌଜାରେ ୩ ଶହ ଏକର ଚାଷଜମି ପାଣିରେ ବୁଡ଼ି ରହିଛି। ଏଥିଯୋଗୁ ଧାନ ଚାଷ କାର୍ଯ୍ୟ ଆରମ୍ଭ ହୋଇପାରୁ ନାହିଁ। ଗୋପାଳିଆ କେନାଲ ସଂସ୍କାର ହୋଇ ନ ଥିବାରୁ ଏ ପ୍ରକାର ସମସ୍ୟା ଉପୁଜିଛି। ଇଟାଗଡ଼ି ଗ୍ରାମବାସୀ ଗୁରୁବାର ଏ ସମ୍ପର୍କରେ ଭଦ୍ରକ ସାଳନ୍ଦୀ କେନାଲ ଡିଭିଜନର ନିର୍ବାହୀ ଯନ୍ତ୍ରୀଙ୍କୁ ଜଣାଇଛନ୍ତି। ଚାଷଜମିରୁ ଜଳ ନିଷ୍କାସନ ପାଇଁ କେନାଲ ସଂସ୍କାର କରିବା ଦିଗରେ ପଦକ୍ଷେପ ନେବାକୁ ସେମାନେ ଦାବି ଜଣାଇଛନ୍ତି।
ପ୍ରକାଶ ଯେ, ଇଶାଣପୁରଠାରୁ କଷଟି ପର୍ଯ୍ୟନ୍ତ ଏକ ଢଳେଇ ରାସ୍ତା ନିର୍ମାଣ ଯୋଗୁ ଜଳ ନିଷ୍କାସନରେ ବାଧା ସୃଷ୍ଟି ହୋଇଛି। ଏଥିଯୋଗୁ ଇଟାଗଡ଼ି, କଷଟି ଓ ଦେଉଳା ମୌଜାର ୩ ଶହ ଏକରି ଚାଷଜମି ପାଣିରେ ବୁଡ଼ି ରହିଛି। ପୂର୍ବରୁ ଏ ସମ୍ପର୍କରେ ବିଭାଗୀୟ କର୍ତ୍ତୃପକ୍ଷଙ୍କ ଦୃଷ୍ଟି ଆକର୍ଷଣ କରାଯିବା ପରେ କେନାଲ ଆଡ଼ିରେ ଏକ ବନ୍ଧ ନିର୍ମାଣ କରାଯାଇଥିଲା। ଉପରମୁଣ୍ଡରୁ ପାଣି ଛାଡ଼ିବା ଦ୍ୱାରା ଜଳ ନିଷ୍କାସନ ହୋଇ ନ ପାରି ବନ୍ଧଟି ଭାଙ୍ଗିଯାଇଥିଲା। କେନାଲ ବନ୍ଧ ହୋଇଥିବା ସ୍ଥାନର ଉତ୍ତରପାର୍ଶ୍ୱରେ ଥିବା କଲଭର୍ଟକୁ କେତେକ ଲୋକ ଢଳେଇ ପକାଇ ବନ୍ଦ କରିଦେଇଥିବାରୁ ଜଳ ନିଷ୍କାସନ ହୋଇପାରୁ ନ ଥିବା ଗଁା ଲୋକେ ଦର୍ଶାଇଛନ୍ତି। ଏହାଛଡ଼ା ଦୀର୍ଘଦିନ ଧରି କେନାଲ ସଂସ୍କାର ହୋଇ ନ ଥିବାରୁ ଏ ପ୍ରକାର ସମସ୍ୟା ସୃଷ୍ଟି ହୋଇଥିବା ଇଟାଗଡ଼ି ଗ୍ରାମର ଗଣେଶ ପ୍ରସାଦ ରାଉତ, କମଳାକାନ୍ତ ସେଠୀ, ସରୋଜ ଖୁଣ୍ଟିଆ, ଅଭିରାମ ସେଠୀ, ବସନ୍ତ କୁମାର ସେଠୀ, ଅକ୍ଷୟ ବେହେରା, କୈଳାସ ଚନ୍ଦ୍ର ସେଠୀ ଓ ସନ୍ତୋଷ କୁମାର ଜେନା ପ୍ରମୁଖ ଅଭିଯୋଗ କରିଛନ୍ତି।
