ପୁରୁଣା ଭୁବନେଶ୍ୱର,୧୦।୨(ଡି.ଏନ.ଏ.): ଶ୍ରୀଲିଙ୍ଗରାଜ ମନ୍ଦିର ଚତୁଃପାର୍ଶ୍ୱ ସୌନ୍ଦର୍ଯ୍ୟକରଣ ଓ ବିକାଶ ନେଇ ମୁଖ୍ୟମନ୍ତ୍ରୀଙ୍କ ବିରାଟ ଯୋଜନା କାର୍ଯ୍ୟ କରିବାକୁ ସମସ୍ତ ବିଭାଗ ମିଳିତ ଭାବେ କାମ କରୁଛନ୍ତି। ହେଲେ କେତେଜଣ ଜବରଦଖଲକାରୀ, ଅବୈଧ ନିର୍ମାଣକାରୀଙ୍କ ଯୋଗୁ ଅଧିକାରୀଙ୍କ ପାରିବା ପଣିଆ ପଦାରେ ପଡିଛି। କିଛିଦିନ ମଧ୍ୟରେ ସବୁକିଛି ବଦଳି ଯିବା ପରି ମନେହୁଏ। ପୂର୍ବରୁ ଶ୍ରୀଲିଙ୍ଗରାଜ ମନ୍ଦିର କାର୍ଯ୍ୟନିର୍ବାହୀ ଅଧିକାରୀ କେତେକ ସ୍ଥାନରେ ନିର୍ମାଣ ଉପରେ ରୋକ ଲଗାଇ ପୋଲିସ ସହଯୋଗରେ ଏହା ଶ୍ରୀଲିଙ୍ଗରାଜଙ୍କ ସମ୍ପତ୍ତି ବୋଲି ବୋର୍ଡ ଲଗାଇଥିଲେ। ମାତ୍ର ଅଧିକାରୀ ସବୁ ବିଭିନ୍ନ ମାପ ଚୁପ ଓ ସର୍ଭେ କାର୍ଯ୍ୟରେ ବ୍ୟସ୍ତ ରହୁଥିବାରୁ ଅବୈଧ ନିର୍ମାଣକାରୀ ସକ୍ରିୟ ହୋଇ ଉଠିଛନ୍ତି । କାର୍ଯ୍ୟନିର୍ବାହୀ ଅଧିକାରୀ ରାଜାରାଣୀ ମୌଜାର ଖାତା ନଂ. ୬୦୪/୨୪୯ ର ପ୍ଲଟ ନଂ. ୮୬୯ ଓ ୮୭୦ ଉପରେ ଅବୈଧ ନିର୍ମାଣ ବନ୍ଦ କରାଇବା ସଙ୍ଗେ ସଙ୍ଗେ ଏଠାରେ ନୋଟିସ ମାରିଥିଲେ। ବର୍ତ୍ତମାନ ନୂତନ ଭାବେ ଓଏଏସ୍ ଅଧିକାରୀ ପ୍ରସନ୍ନ କୁମାର ଦାସ ମୁଖ୍ୟ କାର୍ଯ୍ୟନିର୍ବାହୀ ଭାବେ ଯୋଗଦେବା ପରେ ହଠାତ୍ ବିଭିନ୍ନ ଜବରଦଖଲକାରୀ ଓ ବିଲଡର ପୂର୍ବପରି ଅବୈଧ ନିର୍ମାଣ ଆରମ୍ଭ କରି ଦେଇଛନ୍ତି। ଏଣୁ କେବଳ ବୋର୍ଡ ମାରିବା ବ୍ୟତୀତ ଏସବୁ ଅବୈଧ ଦଖଲ ଜମିକୁ ବିଦ୍ୟୁତ୍, ପାଣି, ରାସ୍ତା ଭଳି ମୌଳିକ ସୁବିଧା ଦିଆ ନ ଗଲେ ଜବରଦଖଲ ହେବନାହିଁ ବୋଲି ବୁଦ୍ଧିଜୀବୀ ମହଲରେ ଦାବି ହେଉଛି। ଏଣୁ ନୂତନ ମୁଖ୍ୟ କାର୍ଯ୍ୟନିର୍ବାହୀ ଅଧିକାରୀ ଏକାମ୍ର ବିକାଶ କାର୍ଯ୍ୟରେ ସରକାରଙ୍କୁ ସହଯୋଗ କରିବା ସଙ୍ଗେ ସଙ୍ଗେ ଠାକୁରଙ୍କ ସମ୍ପତ୍ତି ରକ୍ଷଣା ବେକ୍ଷଣ ପ୍ରତି ଦୃଷ୍ଟି ଦେବାକୁ ମତପ୍ରକାଶ ପାଇଛି। ଏ ନେଇ କାର୍ଯ୍ୟନିର୍ବାହୀ ଅଧିକାରୀ ପ୍ରଦୀପ୍ତ କୁମାର ସାହୁଙ୍କୁ ପଚାରିବାରେ ଅଭିଯୋଗ ପରେ ଅବୈଧ ନିର୍ମାଣ ଉପରେ କାର୍ଯ୍ୟାନୁଷ୍ଠାନ ଗ୍ରହଣ କରାଯିବ ବୋଲି ସେ କହିଥିଲେ।
