ନୟାଗଡ଼ ଅଫିସ,୧୪ା୧୦: ନୟାଗଡ଼ ଜିଲା ଇଟାମାଟି ଥାନା ନାଟୁଗାଁ ପଞ୍ଚାୟତ ଖେଡ଼ବାରଣା ଗ୍ରାମରେ ରବିବାର ଏକ ଅଭାବନୀୟ ଘଟଣା ଦେଖିବାକୁ ମିଳିଛି। ଲୋକଲଜ୍ଜା କାରଣରୁ ଜଣେ ମହିଳା ଆତ୍ମହତ୍ୟା କରିଥିବା ଚର୍ଚ୍ଚା ହେଉଛି। ମୃତକ ହେଲେ ଲୀଳାବତୀ ନାୟକ (୪୩)। ମହିଳାଙ୍କ ସମ୍ପର୍କୀୟମାନେ କହିବା ପ୍ରକାରେ ଲୀଳାବତୀଙ୍କ ସ୍ବାମୀ ରୂପେନ୍ଦ୍ର କୁମାର ନାୟକ କେରଳରେ ରହି କାମ କରନ୍ତି। ବଡ଼ଝିଅ ବାହା ହୋଇସାରିଥିବା ବେଳେ ଲୀଳାବତୀଙ୍କ ପାଖରେ ମଝିଆ ଝିଅ ଓ ସାନ ପୁଅ ରୁହନ୍ତି। କିଛିଦିନ ତଳେ ରୂପେନ୍ଦ୍ର ବ୍ୟାଙ୍କ୍ ଆକାଉଣ୍ଟରେ ୫୦ ହଜାର ଟଙ୍କା ପଠାଇଥିଲେ। ଶୁକ୍ରବାର ଉକ୍ତ ଟଙ୍କାକୁ ଲୀଳାବତୀ ଉଠାଇଥିଲେ। ବିଳମ୍ବିତ ରାତିରେ ଲୀଳାବତୀଙ୍କ ଘରକୁ ସେହି ଗ୍ରାମର କୃଷ୍ଣଚନ୍ଦ୍ର ନାୟକ ଯାଇ ଟଙ୍କା ମାଗିବା ସହ ତାଙ୍କୁ ଅସଦାଚରଣ କରିଥିଲେ। ଶନିବାର ସକାଳେ ଏ ନେଇ ଲୀଳାବତୀ ଗ୍ରାମ କମିଟିକୁ ଜଣାଇଥିଲେ। ରାତିରେ ଗ୍ରାମରେ ବୈଠକ ହୋଇ ଏହାର ନିଷ୍ପତ୍ତି ହେବାର ଥିଲା। ମାତ୍ର କୌଣସି କାରଣରୁ ଶନିବାର ବଦଳରେ ରବିବାର ଅପରାହ୍ନରେ ଏ ନେଇ ବୈଠକ ହେବ ବୋଲି ଗ୍ରାମବାସୀଙ୍କ ପକ୍ଷରୁ କୁହାଯାଇଥିଲା। ଗ୍ରାମରେ ବୈଠକ ନ ବସିବା ଓ ଲୋକଲଜ୍ଜା ସହି ନ ପାରି ଲୀଳାବତୀ ଆତ୍ମହତ୍ୟା କରିଥିବା ସମ୍ପର୍କୀୟଙ୍କଠାରୁ ପ୍ରକାଶ। ରବିବାର ସକାଳୁ ମଝିଆ ଝିଅ ଓ ପୁଅ ଉଠି ଲୀଳାବତୀ ବେକରେ ରଶି ଲଗାଇ ଝୁଲୁଥିବା ଦେଖିଥିଲେ। ପରେ ଏ ନେଇ ସେମାନେ ତାଙ୍କ ଜେଜେବାପାଙ୍କୁ କହିଥିଲେ। ଜେଜେବାପା ଗ୍ରାମବାସୀ ଓ ସମ୍ପର୍କୀୟଙ୍କୁ ଜଣାଇଥିଲେ। ସମ୍ପର୍କୀୟମାନେ କିଛି ଅଘଟଣ ଘଟିବା ଆଶଙ୍କା କରି ତରବରିଆ ଭାବେ ମୃତଦେହ ପୋଡ଼ି ଦେଇଥିଲେ। ଖବର ପାଇ ଇଟାମାଟି ପୋଲିସ ପହଞ୍ଚତ୍ଥିଲେ ମଧ୍ୟ ନିଆଁ ଲିଭାଇ ମୃତଦେହ ଜବତ କରିବା ପରିବର୍ତ୍ତେ ଜୁଇ ପାଖରେ ନୀରବଦ୍ରଷ୍ଟା ସାଜିଥିବା ଦେଖିବାକୁ ମିଳିଥିଲା। ପରେ ପୋଲିସ ଲୀଳାବତୀଙ୍କ ପରିବାର ଓ ସମ୍ପର୍କୀୟଙ୍କଠାରୁ ବୟାନ ଆଣିଥିଲା। ଅନ୍ୟପଟେ ଉକ୍ତ ୫୦ ହଜାର ଟଙ୍କାକୁ କୃଷ୍ଣଚନ୍ଦ୍ର ନେଇଯାଇଥିବା ଲୀଳାବତୀଙ୍କ ମଝିଆ ଝିଅ ଅଭିଯୋଗ କରିଛନ୍ତି। ପୋଲିସ କୃଷ୍ଣଚନ୍ଦ୍ରଙ୍କ ଘରେ ପହଞ୍ଚତ୍ଥିବା ବେଳେ ତାଙ୍କ ପରିବାର ଘରେ ତାଲା ପକାଇ କେଉଁଆଡ଼େ ଫେରାର୍ ହୋଇଯାଇଛନ୍ତି। ପରେ ପୋଲିସ ମଶାଣିରୁ ହାଡ଼ ଓ ପାଉଁଶ ଜବତ କରିଥିଲା। ସୋମବାର ଲୀଳାବତୀଙ୍କ ସ୍ବାମୀ ରୂପେନ୍ଦ୍ର କେରଳରୁ ଆସିବା ପରେ ଏ ନେଇ ଇଟାମାଟି ଥାନାରେ ଅଭିଯୋଗ କରିବେ ବୋଲି ଜଣାପଡ଼ିଛି। ଏ ନେଇ ଇଟାମାଟି ଥାନାରେ କୌଣସି ଅଭିଯୋଗ ହୋଇନାହିଁ, ଖବର ପାଇ ପୋଲିସ ଘଟଣାସ୍ଥଳରେ ପହଞ୍ଚତ୍ ତଦନ୍ତ କରିଥିବା ଥାନା ଅଧିକାରୀ ଶରତ ଚନ୍ଦ୍ର ପାତ୍ର ପ୍ରକାଶ କରିଛନ୍ତି। ଗ୍ରାମ ସଭାପତି ଗ୍ରାମରେ ନ ଥିବାରୁ ତାଙ୍କମତାମତ ମିଳପାରିନାହିଁ । ଗ୍ରାମର କୌଣସି ଲୋକ ମଧ୍ୟ ଏ ନେଇ କୌଣସି ମତ ଦେଇ ନ ଥିଲେ।
