ବ୍ରହ୍ମପୁର ଅଫିସ,୧୭ା୧: ବ୍ରହ୍ମପୁରରେ ଚାଲିଥିବା ସିଲ୍କ ସିଟି ମହୋତ୍ସବର ସୋମବାର ଥିଲା ଚତୁର୍ଥ ସନ୍ଧ୍ୟା। କାର୍ଯ୍ୟକ୍ରମରେ ବାଚସ୍ପତି ବିକ୍ରମ କେଶରୀ ଆରୁଖ ମୁଖ୍ୟ ଅତିଥି ଭାବେ ଯୋଗ ଦେଇଥିଲେ। ରେଶମ ସହର ବ୍ରହ୍ମପୁର ହେଉଛି ଦକ୍ଷିଣ ଓଡିଶାର ପ୍ରାଣକେନ୍ଦ୍ର। ମହୋତ୍ସବରେ ଜିଲାର ସଂସ୍କୃତି, ପରମ୍ପରା ଓ ଲୋକ କଳାକୁ ଲୋକ ଲୋଚନକୁ ଆଣିବା ହେଉଛି ଏକ ପ୍ରକୃଷ୍ଟ ମାଧ୍ୟମ। ଏହି ମହୋତ୍ସବ ମାଧ୍ୟମରେ ଗଞ୍ଜାମ ଅର୍ଥନୀତି ସୁଦୃଢ଼ ହେବ। ଶିକ୍ଷା, ସ୍ବାସ୍ଥ୍ୟ ଓ ଗମନାଗମରେ ଓଡିଶା ଅଗ୍ରଣୀ ହୋଇଛି। ଏଥିମଧ୍ୟରେ ରେଶମ ସହର ଉତ୍ସବ ଅନ୍ୟତମ ବୋଲି ବାଚସ୍ପତି କହିଥିଲେ। ଅନ୍ୟତମ ଅତିଥି କବିସୂର୍ଯ୍ୟନଗର ବିଧାୟିକା ଲତିକା ପ୍ରଧାନ ଓ ଦକ୍ଷିଣାଞ୍ଚଳ ଆଇଜି ସତ୍ୟବ୍ରତ ଭୋଇ ଯୋଗ ଦେଇଥିଲେ। ପୁରୁଷ ବିଶ୍ୱକପ ହକିକୁ ସ୍ବାଗତ ଜଣାଇ ଏହି ମହୋତ୍ସବ ଅନୁଷ୍ଠିତ ହୋଇଛି। ହକି ପାଇଁ ସମଗ୍ର ବିଶ୍ୱରେ ଓଡିଶା ଆଜି ପରିଚିତ ବୋଲି ବିଧାୟିକା କହିଥିଲେ। ମହୋତ୍ସବ ଶାନ୍ତି ଶୃଙ୍ଖଳାର ସହ ଅନୁଷ୍ଠିତ ହେଉଥିବା ନେଇ ରେଶମ ସହରବାସୀଙ୍କୁ ଆଇଜି ଧନ୍ୟବାଦ ଦେଇଥିଲେ। ଅନ୍ୟମାନଙ୍କ ମଧ୍ୟରେ ବ୍ରହ୍ମପୁର ଏମ୍ପି ଚନ୍ଦ୍ର ଶେଖର ସାହୁ, ବିଧାୟକ ବିକ୍ରମ କୁମାର ପଣ୍ଡା, ମେୟର ସଂଘମିତ୍ରା ଦଳେଇ, ଡେପୁଟି ମେୟର ଇ. ବିବେକ ରେଡ୍ଡୀ, ରାଜ୍ୟ କାଜୁ ନିଗମ ଅଧ୍ୟକ୍ଷ ସୁବାଷ ମହାରଣା, ଜିଲାପାଳ ଦିବ୍ୟଜ୍ୟୋତି ପରିଡା, କମିଶନର ଜେ ସୋନାଲ ଓ ବ୍ରହ୍ମପୁର ଏସପି ଡା ଶ୍ରବଣା ବିବେକ ଏମ ମଞ୍ଚାସୀନ ଥିଲେ।
ଆଜିର ସନ୍ଧ୍ୟାରେ ଚଇତି ଘୋଡା, କିନରଙ୍କ ଫ୍ୟାସନ ଶୋ, ୱେଷ୍ଟର୍ଣ୍ଣ ନୃତ୍ୟ, ଗାହାଣୀ, ଓଡିଶୀ, ବିହୁ, ମୋହି ନିତ୍ୟମ୍ ଆଦି ପରିବେଶଣ ହୋଇଥିଲା। ମେଗା ସେଲିବ୍ରିଟି କାର୍ଯ୍ୟକ୍ରମରେ ବଲିଉଡ ଅଭିନେତ୍ରୀ ଦିଶା ପଟନୀ ଓ ତାଙ୍କ ଟିମ ହିନ୍ଦୀ ଚଳଚ୍ଚିତ୍ର ସଂଗୀତରେ ଦର୍ଶକଙ୍କୁ ନଚାଇଥିଲେ। ସ୍ଲୋ..ମୋସନ.. ଭଳି ବହୁ ସୁପରହିଟ ଗୀତରେ ଦିଶା ପରିବେଶଣ କରିଥିଲେ। ଏହାପରେ ରେପର ବିଗ ଡିଲ ମୁଁ.. ଓଡିଆ.., ପୁରୀ..ଜଗନ୍ନାଥ ଭଳି ରେପର ସଙ୍ଗୀତ ପରିବେଷଣ କରି ଓଡିଆ ପ୍ରତି ଥିବା ଭଲ ପାଇବା ମହକକୁ ଦର୍ଶକଙ୍କ ସମ୍ମୁଖରେ ଉପସ୍ଥାପନା କରିଥିଲେ। ସେ ରେପର ମାଧ୍ୟମରେ ମୋ..ବୋଉ.. ଗୀତରେ ଦର୍ଶକଙ୍କୁ ଭାବ ବିହ୍ବଳ କରି ଦେଇଥିଲେ। ପରେ ପରେ ବ୍ଲାକ ସ୍ବାନ ଟିମ୍ ତାଙ୍କର ନୃତ୍ୟ ପରିବେଷଣ କରିବା ସହ ଓଡିଆ ଭାଷାରେ ବ୍ରହ୍ମପୁରବାସୀଙ୍କୁ ଉଦ୍ବୋଧନ ଦେଇଥିଲେ। ଏହାପରେ ସଂଗୀତଜ୍ଞ ନାକାଶ ଆଜିଜ ରା..ରା..ରାକାମା, ଶାଢି..କା.ଫଲସା ଗୀତରେ ଦର୍ଶକଙ୍କ ମନ ଜିଣିଥିଲେ।
