ରସୁଲପୁର, ୨ା୬(ଡି.ଏନ.ଏ.)- ସ୍ବଚ୍ଛ ପରିବେଶ ସୁସ୍ଥ ସମାଜ ଗଠନରେ ସହାୟକ ହୁଏ। ପ୍ରତ୍ୟେକ ଲୋକ ପରିବେଶର ସୁରକ୍ଷା ପ୍ରତି ଧ୍ୟାନ ଦେବା ସହ ନିଜର ପାରିପାର୍ଶ୍ୱିକ ପରିବେଶକୁ ସଫାସୁତୁରା ରଖିଲେ ରୋଗମୁକ୍ତ ମସାଜ ନିର୍ମାଣ ସମ୍ଭବ ହୋଇପାରିବ। ଏହି ବାର୍ତ୍ତା ବ୍ଲକସ୍ତରରୁ ଲୋକଙ୍କ ନିକଟରେ ପହଞ୍ଚିବାର ଲକ୍ଷ୍ୟ ରହିଛି। ଏହିଭଳି ଏକ ମହତ ଉଦ୍ଦେଶ୍ୟ ରଖି ରସୁଲପୁର ବ୍ଲକ ବିଡିଓ ଉମାକାନ୍ତ ପରିଡା ବ୍ଲକ ପରିସରରୁ ଅଳିଆ ଆବର୍ଜନା ହଟାଇ ସ୍ବଚ୍ଛ ଓ ନିର୍ମଳ ରଖିବାକୁ ପ୍ରୟାସ କରିଛନ୍ତି। ବିଡିଓ ପରିଡାଙ୍କ ନେତୃତ୍ୱରେ କର୍ମଚାରୀମାନେ ଶନିବାର ସକାଳେ ବ୍ଲକ ପରିସରରେ ଦୀର୍ଘଦିନ ଧରି ପଡିରହିଥିବା ଅଳିଆ ଅବର୍ଜନାକୁ ସଫା କରିଥିଲେ। କାର୍ଯ୍ୟାଳୟ ପଛପଟ କ୍ୱାଟର୍ସ, ସମ୍ମୁଖ ଭାଗରେ ଥିବା ପାର୍କିଂ ସ୍ଥାନ, ପୁରୁଣା ଗୋଦାମ ଗୃହ, ଯୋଗାଣ ଅଧିକାରୀଙ୍କ କାର୍ଯ୍ୟାଳୟ, ଭାରତ ନିର୍ମାଣ ରାଜୀବ ଗାନ୍ଧି ସେବାକେନ୍ଦ୍ର ନିକଟ ଅଂଚଳକୁ ସଫେଇ କରିଥିଲେ। ଏଥିସହ ଖାଲୁଆ ସ୍ଥାନ, ବ୍ଲକ ଚତୁଃପାର୍ଶ୍ୱରେ ଯାଇଥିବା ରାସ୍ତା କଡରେ ବ୍ଲିଚିଂ ସିଞ୍ଚନ କରିଥିଲେ। ଏହି ସଫେଇ କାର୍ଯ୍ୟରେ ଏବିଡିଓ ଅସିତ୍ କୁମାର ପାତ୍ର, ସହକାରୀ ନିର୍ବାହୀ ଯନ୍ତ୍ରୀ ନମିତା ହାସଁଦା, ଏପିଓ ବିଷ୍ଣୁଦତ୍ତ ଧଳ, ସହାକରୀ ଯନ୍ତ୍ରୀ ଯତୀନ୍ଦ୍ର ମୋହନ ସ୍ବାଇଁ, କନିଷ୍ଠ ଯନ୍ତ୍ରୀ ବ୍ରହ୍ମାନନ୍ଦ ପଣ୍ଡା, ଅନିତା ବେହୁରା, ବରିଷ୍ଠ କିରାଣି ସରୋଜ କୁମାର ମହାନ୍ତି ପ୍ରମୁଖ ଯୋଗଦେଇଥିଲେ।
