ମୁମ୍ବାଇ/ ବେଙ୍ଗାଲୁରୁ, ୧୨।୪: ମହାରାଷ୍ଟ୍ର ଓ କର୍ନାଟକରେ ଲକ୍ଡାଉନ୍ ସମୟ ସୀମା ବୃଦ୍ଧି କରାଯାଇଛି। ମହାରାଷ୍ଟ୍ରରେ ଉଦ୍ଧବ ଠାକ୍ରେ ସରକାର ଲକ୍ଡାଉନ ସମୟସୀମା ଏପ୍ରିଲ ୩୦ ପର୍ଯ୍ୟନ୍ତ ବୃଦ୍ଧି କରିଛନ୍ତି। ଲୋକମାନେ ସହଯୋଗ ନ କଲେ ଏହାକୁ ଆହୁରି ବଢ଼ାଯାଇପାରେ ବୋଲି ମୁଖ୍ୟମନ୍ତ୍ରୀ ଠାକ୍ରେ ସୂଚନା ଦେଇଛନ୍ତି। ଲକ୍ଡାଉନ ସମୟସୀମା ବଢ଼ାଇବାରେ ଓଡ଼ିଶା, ପଞ୍ଜାବ ପରେ ମହାରାଷ୍ଟ୍ର ତୃତୀୟ ରାଜ୍ୟ। ପୂର୍ବରୁ ଓଡ଼ିଶା ସରକାର ଏପ୍ରିଲ ୩୦ ଯାଏ ଏବଂ ପଞ୍ଜାବ ମେ’ ୧ତାରିଖ ଯାଏ ଲକ୍ଡାଉନ ବଢ଼ାଇଥିଲେ।
କର୍ନାଟକ ସରକାର ଲକ୍ଡାଉନ ସମୟସୀମା ଆଉ ଦୁଇସପ୍ତାହ ବଢ଼ାଇବା ପାଇଁ ନିଷ୍ପତ୍ତି ନେଇଛନ୍ତି। ଏପ୍ରିଲ ୧୪ ପରେ ରାଜ୍ୟରେ ଲକ୍ଡାଉନ ଆଉ ଦୁଇସପ୍ତାହ ବଢ଼ିବ ବୋଲି ମୁଖ୍ୟମନ୍ତ୍ରୀ ବି.ଏସ୍. ୟେଦୁରପ୍ପା ଶନିବାର ଘୋଷଣା କରିଛନ୍ତି। ତେବେ କୃଷି ଓ ଶିଳ୍ପ ସେକ୍ଟର ପ୍ରତି ଲକ୍ଡାଉନ କଟକଣା କୋହଳ କରାଯାଇଛି। ଏହି ସମୟରେ ସରକାରୀ କାର୍ଯ୍ୟାଳୟଗୁଡ଼ିକ କମ୍ କର୍ମଚାରୀରେ ଚାଲିବ। ଲକ୍ଡାଉନ ସମୟସୀମା ବଢ଼ାଇବାରେ କର୍ନାଟକ ପ୍ରଥମ ଭାଜପା ଶାସିତ ରାଜ୍ୟ। ଲକ୍ଡାଉନକୁ କଡ଼ାକଡ଼ି ପାଳନ କରିବା ଲାଗି ମୁଖ୍ୟମନ୍ତ୍ରୀ ୟେଦୁରପ୍ପା ଆହ୍ବାନ ଦେଇଛନ୍ତି।
