ବଅଁରପାଳ, ୧୩ା୫(ଉପେନ୍ଦ୍ର ରାଉତ) : ବେଶୀ ପାଠ ପଢ଼ି ନ ଥିବାରୁ ଚାକିରି ପାଇଁ ଚେଷ୍ଟା କରି ନ ଥିଲେ। ତଥାପି ପରିବାର ପ୍ରତିପୋଷଣ ପାଇଁ କିଛି ଗୋଟେ କାମ ଖୋଜୁଥିଲେ। ୧୨ବର୍ଷ ତଳେ ବିଶାଖାପାଟଣା ଚାଲିଯାଇ ସେଠାରେ ଗୁପଚୁପ ବିକିବା ଆରମ୍ଭ କରିଦେଇଥିଲେ। ୫ ବର୍ଷ ଜଣେ ମାଲିକଙ୍କ ପାଖରେ କାମ କରିବା ପରେ ନିଜ ଘର ନିକଟରେ ଏହି ବ୍ୟବସାୟ କରିବାକୁ ଯୋଜନା କରି ସେ ଗଁାକୁ ଫେରିଆସିଲେ। ଏବେ ତାଙ୍କ ଗୁପ୍ଚୁପ୍ ବେପାର ଫୁଲ୍ ଦମ୍ରେ ଚାଲିଛି ବୋଲି କହିଛନ୍ତି ବଅଁରପାଳ ବ୍ଲକ ଗିରାଙ୍ଗ ଗ୍ରାମର ପ୍ରମୋଦ ସାହୁ।
ଅପରାହ୍ନ ୪ଟାରେ ଗିରାଙ୍ଗ ନିକଟ ସିପିପି ରାସ୍ତା ପାର୍ଶ୍ୱରେ ପ୍ରମୋଦଙ୍କ ଠେଲା ଗାଡ଼ି ପହଞ୍ଚତ୍ବା ପରେ ଗ୍ରାହକଙ୍କ ଭିଡ଼ ଜମିଯାଏ। ରାତି ୧୦ଟା ଯାଏ ଚାଲେ ତାଙ୍କ ବେପାର। ପ୍ରମୋଦଙ୍କ ହାତ ତିଆରି ଗୁପ୍ଚୁପ୍ ବେଶ୍ ସ୍ବାଦିଷ୍ଟ ହୋଇଥିବାରୁ ଦିନକୁ ଦିନ ଅଧିକ ଗ୍ରାହକ ଆସୁଛନ୍ତି। ପ୍ଲେଟରେ ଗୁପ୍ଚୁପ୍କୁ ସଜ୍ଜିତ କରି ସେ ପିଆଜ, ଟମାଟୋ ସସ୍, ଧନିଆ ପତ୍ର ଏବଂ ସ୍ବାଦ ଅନୁଯାୟୀ ଲୁଣ, ଲଙ୍କା ଓ ଚାଟ ମସଲା ଦେଇଥାନ୍ତି। ଏଥିସହ ଆମ୍ବକସି ଅଦା, ଧନିଆ ଓ ପୁଦିନାରେ ପ୍ରସ୍ତୁତ ଖଟାପାଣି ବଢ଼ାଇ ଦେଇଥାନ୍ତି। କେବଳ ଗୁପ୍ଚୁପ୍ ନୁହେଁ ପାମ୍ପିଡ଼ି ଚାଟ୍, ଦହି ଗୁପ୍ଚୁପ୍ ଓ ଝାଲ ମୁଢ଼ି ମଧ୍ୟ ବିକ୍ରି କରିଥାନ୍ତି। ଗ୍ରାହକଙ୍କ ପସନ୍ଦ ଅନୁସାରେ ସେ ଗୁପ୍ଚୁପ୍ ତିଆରି କରୁଥିବାରୁ ସନ୍ଧ୍ୟାରେ ନାଲ୍କୋର ବହୁ କର୍ମଚାରୀ, ଆଖପାଖର ମହିଳା, ଯୁବତୀ ଓ ଯୁବକମାନେ ତାଙ୍କ ଦୋକାନକୁ ଆସି ଗୁପ୍ଚୁପ୍ ଖାଇଥାନ୍ତି। ଦିନକୁ ପ୍ରାୟ ୨ ହଜାରରୁ ଅଧିକ ଟଙ୍କାର ବେପାର ହେଉଥିବାରୁ ପରିବାର ଚଳାଇବା ବେଶୀ କଷ୍ଟକର ହେଉ ନ ଥିବା ସେ କହିଛନ୍ତି। ସ୍ତ୍ରୀ ମାଳତୀଙ୍କ ସହ ୨ ପୁଅଙ୍କୁ ନେଇ ତାଙ୍କ ପରିବାର। ବଡ଼ ପୁଅ ଷଷ୍ଠ ଶ୍ରେଣୀରେ ପଢ଼ୁଥିବାବେଳେ ସାନ ପୁଅ ତୃତୀୟ ଶ୍ରେଣୀର ଛାତ୍ର। ଦୁଇ ବଖରା ଘରକୁ ଛାଡ଼ି ଦେଲେ ଜମି ବାଡ଼ି କିଛି ନାହିଁ। ଏହି ବେପାର ହିଁ ତାଙ୍କ ସମ୍ବଳ ବୋଲି ପ୍ରମୋଦ ପ୍ରକାଶ କରିଛନ୍ତି।
