ଗଣ୍ଡତୁରୁମ, ୨୩।୧୦(ଡି.ଏନ୍.ଏ.)-ଉଭଏ କେନ୍ଦ୍ର ଆର ରାଏଜ୍ ସରକାର ଗରିବ୍ ଦୁଖିକର ଲାଗି ଚାଉଲଠାନୁ ମୂଲ କରି ଅବାସ ଯୋଜନାରେ ଘର, ବୁଢ଼ାବୁଢ଼ି, ଭିନ୍ନକ୍ଷମମାନକୁ ଭତା ଯୁଗେଇ ଦେଉଛନ୍। ହେଲେ ସରକାରୀ ସର୍ଭେରେ ଭୁଲଭଟକା ଲାଗି ଅନେକ ହକ୍ଦାର ହିତାଧିକାରୀ ଯୋଜନାର ଲାଭ ପାଏବାରୁ ବଁଚିତ୍ ହେଉଛନ୍। ଏନ୍ତା କି ଅନେକ ହକ୍ଦାର ହିତାଧିକାରୀ ବଛର ବଛର ଧରି ଭତାର ଲାଗି ଆବେଦନ କଲେ ବି ମଲା ତକ୍ ଭତା ନାଇଁ ପାଇପାରବାର। ଏନ୍ତା ଗୁଟେ ଉଦାହରନ୍ ଦେଖ୍ବାକେ ମିଲିଛେ ବରଗଡ଼ ଜିଲା ଭେଡ଼େନ ବ୍ଲକ ମହୁଲପାଲି ପଁଚେତ୍ରେ।
ସୂଚନା ଅନ୍ସାରେ ମହୁଲପାଲି ପଁଚେତ୍ ଅଧୀନ ଗଣ୍ଡତୁରୁମ ଗଁାର ଟିକିନୁ ଦୀପ(୬୪)। ଆଏଜ୍କେ ୧୨ ବଛର ହେଲା ସେ ରୋଗ୍ରେ ପଡ଼ି ଉଠିବସି ନାଇଁପାରବାର। ସେ ଆସର ପାସର ଅନେକ ଡାକ୍ତରକୁଁ ଦେଖେଇ ନିରାଶ ହେଇଛନ୍। ସଭେ ଗୁଟେ କଥା କହୁଛନ୍ ଇଥିରଲାଗି ଉଚ ଚିକିଛା ଦରକାର। ହେଲେ ଭୂମିହୀନ ଦିନମଜୁରିଆ ଟିକିନୁର ପକ୍ଷେ ଉଚ ଚିକିଛା କରାବାର ସମ୍ଭବ ନୁହେ। ଦୁଖ୍ସୁଖ କରି ଟିକିନୁ ୫ ଝି’କେ ବିହାଚୁରା କରିଥିଲାବେଲେ ଏହେଦେ ସାନ ଟୁକେଲ ପ୍ରମିଳାର ବିହାର ବୋଝ୍ ତାକର ଉପରେ ରହିଛେ। ଇଆଡ଼େ ଟିକିନୁ ଖଟୁ ଉଠିବସି ନାଇଁ ପାରବାର ଲାଗି ମାଏକିନା ସାନ୍ତରା ଗଁାରେ ଲୁକ୍କର ପଲ୍ହାଜୁଡ଼ କରି ପରିବାର ଚଲଉଛନ୍। ଆଏଜ୍କେ ୪ ବଛର ଭିତରେ ଟିକିନୁ ଭତାର ଲାଗି ୭ଥର ଆବେଦନ କରି ନିରାଶ ହେଇଥିବାର କହିଛନ୍। ଥାନୀଅ ଜନପରତିନିଧି ଆର ପଁଚେତ୍ ନିର୍ବାହୀ ଅଧ୍କାରୀ ଉନିଆ ଲୁକ୍କର ଆବେଦନ ପତରକେ ଉପୁରକେ ପଠେଇ ଭତା କରଉଥିଲାବେଲେ ଆମରଟାକେ ପକେଇ ରଖିଛନ୍ ବଲି ଟିକିନୁକଁର ମାଏକିନା ସାନ୍ତରା ଅଭିଯୋଗ କରିଛନ୍। ଉପେ ଶୂଇନ୍ ସାନ୍ତରା ଗଣମାଧ୍ୟମ ଜରିଆରେ ଜିଲାପାଲକଁର ଦୁରୁଷ୍ଟି ଆକରଷନ୍ କରବାର ସଂଗେ ଆପ୍ନେ ଟିକିନୁକୁଁ ଭତା ଆର ଚିକିଛା ସାହାଯ୍ ଯୁଗେଇ ଦେବାକେ ନିବେଦନ କରିଛନ୍। ଇ ବାବ୍ଦେ ଭେଡ଼େନ ବିଡିଓ ମୁରଲୀଧର ନାଏକକୁଁ ପଚରାଲାରୁ ମହୁଲପାଲି ପଁଚେତ୍ରୁ ଏହେଦ୍କା ଗୁଟେ ବି ଆବେଦନ ପତର ନାଇଁଆସି। ହକ୍ଦାର ହିତାଧିକାରୀ ସିଧାସଲଖ ମୋର ପାସେ ଆବେଦନ କରୁନ ବଲି ସେ ଅନୁରୋଧ କରିଥିଲେ।
