ନୂଆଦିଲ୍ଲୀ,୬-୯: ସଙ୍କଟରେ ଥିବା ଅଟୋ ସେକ୍ଟରକୁ ସାନ୍ତ୍ୱନା ଦେଇ କେନ୍ଦ୍ରମନ୍ତ୍ରୀ ନୀତିନ ଗଡ଼କରୀ ଗୁରୁବାର କହିଛନ୍ତି ଯେ, ମାନ୍ଦାବସ୍ଥାରୁ ବାହାରି ଆସିବା ଲାଗି ସରକାର ଏହି ସେକ୍ଟରକୁ ଯଥାସମ୍ଭବ ସହାୟତା କରିବେ। ଅଟୋ ସେକ୍ଟରରେ ଲାଗୁ ହୋଇଥିବା ଜିଏସ୍ଟି ହାର ହ୍ରାସ ଲାଗି ସେ କେନ୍ଦ୍ର ଅର୍ଥମନ୍ତ୍ରୀ ନିର୍ମଳା ସୀତାରାମନ୍ଙ୍କ ସହ ଆଲୋଚନା କରିବେ ବୋଲି ପ୍ରତିଶ୍ରୁତି ଦେଇଛନ୍ତି। ସରକାର ପେଟ୍ରୋଲ ଓ ଡିଜେଲ ଗାଡ଼ିକୁ ବ୍ୟାନ୍ କରିବେ ନାହିଁ। ଏ ନେଇ ଚିନ୍ତା ମଧ୍ୟ କରାଯାଇନାହିଁ ବୋଲି ସେ କହିଛନ୍ତି। କିନ୍ତୁ ପ୍ରଦୂଷଣ କମାଇବା ସରକାରଙ୍କ ପ୍ରାଥମିକତା ରହିଛି। ବିଏସ୍-୬ ଗାଡ଼ି ଚାଲିଲେ ପ୍ରଦୂଷଣ ମାତ୍ରା ଅନେକାଂଶରେ କମିବ ବୋଲି ଗଡ଼କରୀ କହିଛନ୍ତି। ସେ ଏହା ମଧ୍ୟ କହିଛନ୍ତି ଯେ, କେନ୍ଦ୍ର ସଡ଼କ ପରିବହନ ମନ୍ତ୍ରଣାଳୟ ପକ୍ଷରୁ ଆସନ୍ତା ୩ ମାସ ମଧ୍ୟରେ ୫ ଲକ୍ଷ କୋଟି ଟଙ୍କାର ୬୮ ସଡ଼କ ପ୍ରକଳ୍ପ କାର୍ଯ୍ୟ ପାଇଁ ଠିକା ଦିଆଯିବ। ଏହାଦ୍ୱାରା ବାଣିଜି୍ୟକ ଗାଡ଼ି ଚାହିଦା ବଢ଼ିବ। ଉଲ୍ଲେଖଥାଉ କି, ସରକାର ପେଟ୍ରୋଲ ଓ ଡିଜେଲ ଗାଡ଼ି ପ୍ରଚଳନକୁ ସମ୍ପୂର୍ଣ୍ଣ ବନ୍ଦ କରିଦେବେ ବୋଲି ସୂଚନା ପ୍ରକାଶ ପାଇଥିଲା। ନୀତି ଆୟୋଗ ତିନି ଚକିଆ ଗାଡ଼ିକୁ ୨୦୨୩ ଓ ୧୫୦ସିସିରୁ କମ୍ କ୍ଷମତାର ଦୁଇ ଚକିଆ ଗାଡ଼ିକୁ ୨୦୨୫ ସୁଦ୍ଧା ସଡ଼କରୁ ହଟାଇ ଦେବାକୁ ସୁପାରିସ୍ କରିଛି। ଏହା ସ୍ଥାନରେ ଇଲେକ୍ଟ୍ରିକ ଗାଡ଼ି ଆଣିବାକୁ ପ୍ରସ୍ତାବରେ କୁହାଯାଇଛି। ଗଡ଼କରୀ କହିଛନ୍ତି ଯେ, ଅଟୋ ସେକ୍ଟର ପାଇଁ ଫାଇନାନ୍ସ ବା ଋଣ ପ୍ରଦାନ ଏକ ବଡ଼ ସମସ୍ୟା ହୋଇଛି। ସରକାର ଏହାର ସମାଧାନ ଲାଗି ବ୍ୟସ୍ତ। ବିଶ୍ୱରେ ଦେଖାଦେଇଥିବା ମାନ୍ଦାବସ୍ଥା ଏବଂ ଚାହିଦା-ଯୋଗାଣ ମଧ୍ୟରେ ତାଳମେଳ ନ ରହିବା କାରଣରୁ ଅଟୋମୋବାଇଲ ସେକ୍ଟର ମାନ୍ଦାବସ୍ଥାର ଶିକାର ହୋଇଛି ବୋଲି ସେ କହିଛନ୍ତି। ଅର୍ଥ ମନ୍ତ୍ରଣାଳୟର ସହାୟତା ମିଳିବା ପରେ ମାତ୍ର ୪ ମାସ ଭିତରେ ଏହି ସେକ୍ଟର ପୁନର୍ବାର ଭଲ ସ୍ଥିତିକୁ ଫେରି ଆସିବ।
