ଚିତ୍ରଡା,୩୦ା୫(ଡି.ଏନ୍.ଏ.)-ମୟୂରଭଞ୍ଜ ଜିଲାର ମୋରଡ଼ା ବ୍ଲକ ଅଞ୍ଚଳରେ ନେସ୍କୋ ପକ୍ଷରୁ ଚଳିତ ମାସରେ ପ୍ରଦାନ କରାଯାଇଥିବା ବିଦ୍ୟୁତ୍ ବିଲ୍କୁ ନେଇ ଉପଭୋକ୍ତାମାନେ ଅସନ୍ତୋଷ ପ୍ରକାଶ କରିଛନ୍ତି। ଲକ୍ଡାଉନ ଯୋଗୁ ସରକାରଙ୍କ ଘୋଷଣା କ୍ରମେ ବିଲ୍ ପ୍ରଦାନ କରାଯାଇ ନ ଥିଲା ବେଳେ ଦୀର୍ଘ ଦୁଇମାସ ପରେ ଏବେ ଉପଭୋକ୍ତାଙ୍କୁ ବିଦ୍ୟୁତ୍ ବିଲ୍ ପ୍ରଦାନ କରାଯାଇଛି। ଅଧିକ ଟଙ୍କାର ବିଲ୍ ଆସିବା ସହ କନେକ୍ସନ ନ ଥାଇ କେତେଜଣଙ୍କ ନାମରେ ବିଲ୍ ଆସିଥିବା ଅଭିଯୋଗ ହୋଇଛି। ଲକ୍ଡାଉନ ଯୋଗୁ ଜିଲାର ଆଦିବାସୀ, ଖଟିଖିଆ, ଦିନ ମଜୁରିଆ କାମଧନ୍ଦା ନ ପାଇ ଘରେ ହାତ ବାନ୍ଧି ବସିଛନ୍ତି। ନିଜେ ବଞ୍ଚିବା ପାଇଁ ସେମାନେ ସଂଘର୍ଷ କରୁଥିବା ବେଳେ କିପରି ବିଦ୍ୟୁତ୍ ବିଲ୍ ଦେବେ ତାହା ଚିନ୍ତାର ବିଷୟ ପାଲଟିଛି। ମୋରଡା ବିଦ୍ୟୁତ୍ ବିଭାଗର ଜେଇ ମୃତ୍ୟୁଞ୍ଜୟ ପାଣିଗ୍ରାହୀଙ୍କୁ ପଚାରିବାରୁ ଏବିଷୟରେ ସେ କୌଣସି ଅଭିଯୋଗ ପାଇ ନ ଥିବା କହିଛନ୍ତି। ସେହିପରି ଏସ୍ଡିଓ ଗିରିଜା ଶଙ୍କର ନାଏକଙ୍କୁ ଯୋଗାଯୋଗ କରିବାରୁ ଅଭିଯୋଗ ଆସିଲେ ବୃଦ୍ଧି ହୋଇ ଆସିଥିବା ବିଦ୍ୟୁତ୍ ବିଲ୍ ସଂଶୋଧନ କରାଯିବା ସହ କନେକ୍ସନ ନ ଥିବା ଲୋକଙ୍କ ବିଦ୍ୟୁତ୍ ବିଲ୍ ସମ୍ପୂର୍ଣ୍ଣ ଛାଡ଼ କରାଯିବ ବୋଲି କହିଛନ୍ତି। ଲକ୍ଡାଉନ ସମୟରେ ବୃଦ୍ଧି ହୋଇ ଆସିଥିବା ବିଦ୍ୟୁତ୍ ବିଲ୍ ଉପଭୋକ୍ତାଙ୍କ ପାଇଁ ବେଡି ଉପରେ କୋରଡ଼ା ସଦୃଶ ହୋଇଥିବା ବେଳେ ରାଜ୍ୟ ସରକାର ଏଥିପ୍ରତି ଦୃଷ୍ଟି ଦେବାକୁ ଉପଭୋକ୍ତାମାନେ ଦାବି କରିଛନ୍ତି।
