ଓ୍ବାଶିଂଟନ୍,୨୨।୪: ଦକ୍ଷିଣ କାର୍ଲିଫର୍ନିଆରେ ପ୍ରତି ୩ ମିନିଟ୍ରେ ଥରେ ହେଉଛି ଭୂକମ୍ପ। ଦିନରେ ହାରାହାରି ୪ଶହ ୯୫ ଥର ଏଠାକାର ଭୂଇଁ ଥରୁଛି। ୨୦୦୮ରୁ ୨୦୧୭ ମଧ୍ୟରେ ଗତ ୯ ବର୍ଷରେ ଏଠାରେ ୨୦ ଲକ୍ଷ ଥର ଭୂକମ୍ପ ହୋଇଥିବା ସାନ୍ ଡିଆଗୋ ସ୍ଥିତ କାର୍ଲିଫର୍ନିଆ ବିଶ୍ୱବିଦ୍ୟାଳୟରେ ହୋଇଥିବା ଏକ ଗବେଷଣା ରିପୋର୍ଟରେ ଉଲ୍ଲେଖ ରହିଛି। ଏଠାକାର ଭୂକମ୍ପ ତୀବ୍ରତା ରିକ୍ଟର ସ୍କେଲରେ ୨ରୁ ୩ ମଧ୍ୟରେ ରହିଥାଏ ବୋଲି ରିପୋର୍ଟରେ ଦର୍ଶାଯାଇଛି। ଏହାକୁ ଦୃଷ୍ଟିରେ ରଖି ସ୍ଥାନୀୟ ଅଞ୍ଚଳରେ ଭୂକମ୍ପ ନିରୋଧୀ ବାସଗୃହ ନିର୍ମାଣ କରାଯାଉଛି। ସ୍ଥାନୀୟ ଲୋକେ ଏହାକୁ ଏକ ସାଧାରଣ ଘଟଣା ଭାବେ ଗ୍ରହଣ କରିଛନ୍ତି। ୨୦୦୬ରେ ଭୂକମ୍ପ ଯୋଗୁ ଲୋକେ ବ୍ୟସ୍ତ ବିବ୍ରତ ହୋଇଉଠୁଥିଲେ ତେବେ ପରବର୍ତ୍ତୀ ସମୟରେ ଏହା ସେମାନଙ୍କ ଜୀବନର ଏକ ଅଙ୍ଗ ପାଲଟି ଯାଇଛି ବୋଲି ରିପୋର୍ଟରେ ପ୍ରକାଶ ପାଇଛି।
