ଢେଙ୍କାନାଳ ଅଫିସ, ୧।୧- ଢେଙ୍କାନାଳ କଳା ସଂସ୍କୃତିର ମାଟି। ଏଠାରେ ବର୍ଷତମାମ ବିଭିନ୍ନ ସାଂସ୍କୃତିକ କାର୍ଯ୍ୟକ୍ରମ ଆୟୋଜିତ ହୋଇଆସୁଛି। ନଭେମ୍ବରଠାରୁ ଅଦ୍ୟାବଧି ସହରରେ ନିୟମିତ ବିଭିନ୍ନ ସମାରୋହ ଚାଲିଛି। ପ୍ରତିଭାବାନ୍ କଳାକାର ସୃଷ୍ଟି କରିବାରେ ଢେଙ୍କାନାଳ ଜିଲା ସମଗ୍ର ରାଜ୍ୟରେ ସ୍ବତନ୍ତ୍ର ଗୌରବ ଅର୍ଜନ କରିଛି ବୋଲି କହିଛନ୍ତି ଏସ୍ପି ଅନୁପମା ଜେମ୍ସ। ସ୍ଥାନୀୟ ଗୋପବନ୍ଧୁ ଟାଉନ୍ ହଲରେ ପ୍ରତିଭା ସମ୍ମାନ ଓ ସ୍ବାଗତମ୍-୨୦୨୦ ଉତ୍ସବର ଉଦ୍ଯାପନୀ ସମାରୋହରେ ମୁଖ୍ୟଅତିଥି ଭାବେ ଯୋଗଦେଇ ଏସ୍ପି ଏହା କହିଥିଲେ।
ତ୍ରିରଙ୍ଗା ଓ ସୁପ୍ରଭାତ ଅନୁଷ୍ଠାନ ପକ୍ଷରୁ ଦୁଇଦିନ ଧରି ଆୟୋଜିତ ଏହି କାର୍ଯ୍ୟକ୍ରମରେ ମୁଖ୍ୟବକ୍ତା ଭାବେ ଅତିରିକ୍ତ ଜିଲାପାଳ ଭବେଶ କୁମାର ନାୟକ ଯୋଗଦେଇ କହିଲେ, ପ୍ରତିଭା ଚିହ୍ନଟ କରିବା, ସେମାନଙ୍କୁ ବିକଶିତ କରିବା ପାଇଁ ସାଂସ୍କୃତିକ ଅନୁଷ୍ଠାନଗୁଡ଼ିକର ପ୍ରୟାସ ପ୍ରଶଂସନୀୟ। ସମ୍ମାନିତ ଅତିଥି ସାନ୍ଧ୍ୟ ମହାବିଦ୍ୟାଳୟର ଅଧ୍ୟକ୍ଷ ସମୀର ସାହୁ କହିଲେ, ୨୦ବର୍ଷ ଧରି କଳା ଓ କଳାକାରଙ୍କୁ ସମୃଦ୍ଧ କରିବା ପାଇଁ ଅନୁଷ୍ଠାନ ପକ୍ଷରୁ ଉଦ୍ୟମ ଜାରି ରହିଛି। ଏଥିପାଇଁ ସେ ଅନୁଷ୍ଠାନର କର୍ମକର୍ତ୍ତାଙ୍କୁ ସାଧୁବାଦ ଜଣାଇଥିଲେ।
