ଧାମନଗର ,୧୩।୧୧(ଡି.ଏନ.ଏ.)- ଭଦ୍ରକ କିଲା ଧାମନଗର ବ୍ଲକଦେଇ ଯାଇଥିବା ଭଦ୍ରକ- ଆଖଣ୍ଡଳମଣି ମୁଖ୍ୟ ରାସ୍ତାର ସୂର୍ଯ୍ୟପୁର ଛକରେ ଥିବା ଏକ ପୁରାତନ ବିରାଟ ଅଶ୍ୱତ୍ଥ ଗଛ ମଙ୍ଗଳବାର ଉପୁଡି ପଡିବାରୁ ରାସ୍ତା ଅବରୋଧ ହୋଇ ଯାତାୟାତ ବାଧାପ୍ରାପ୍ତ ହୋଇଛି । ଏହି ଛକରେ ଦାରୁ ଗଛଟି ଶହ ଶହ ବର୍ଷ ଧରି ରାସ୍ତାକଡ଼କୁ ଲାଗି ରହିଥିଲା । ପୂର୍ବରୁ ପାଦରେ ଚାଲି ଚାଲି ଯାଉଥିବା ବାଟୋଇ ଓ ତୀର୍ଥଯାତ୍ରୀଙ୍କୁ ଖରା ସମୟରେ ଏହା ନିଜ ଛାଇରେ ଆଶ୍ରୟ ଦେଇ ଆସୁଥିଲା । ଗ୍ରାମବାସୀ ଗଛ ଚାରି ପାଖରେ ପକ୍କା ପିଣ୍ଡି କରି ବସାଉଠା କରୁଥିଲେ । ମଙ୍ଗଳବାର ହଠାତ ଗଛଟି ଉପୁଡି ମୁଖ୍ୟ ରାସ୍ତା ଉପରେ ପଡି ଯାଇଥିଲା। ତେବେ ରାସ୍ତାରେ ଏ ନେଇ କିଛି ଦୁର୍ଘଟଣା ଘଟି ନାହିଁ ା ରାସ୍ତା ଆର ପଟେ ଥିବା କେତେକ ଦୋକାନ କ୍ଷତିଗ୍ରସ୍ତ ହୋଇଛି । ଧୂଷୁରୀ ଥାନା ଆଇଆଇସି ପ୍ରଫୁଲ୍ଲ କୁମାର ସିଂ ରାସ୍ତା ସଫା କରିବା ପାଇଁ ଧାମନଗର ଅଗ୍ନିଶମ ବିଭାଗକୁ ଖବର ଦେବା ପରେ ସେମାନେ ପହଞ୍ଚି ଗଛ କାଟି ରାସ୍ତାରୁ ହଟାଇଥିଲେ । ମଙ୍ଗଳବାର ରାହାସ ପୂର୍ଣ୍ଣିମା ପାଇଁ ଆଖଣ୍ଡଳମଣିଙ୍କ ପୀଠକୁ ଭକ୍ତଙ୍କୁ ନେଇ ଯାତାୟାତ କରୁଥିବା ଶତାଧିକ ଗାଡ଼ିମୋଟର ସେଠାରେ ଅଟକି ରହିଥିଲା ।
