ଅନୁଗୋଳ ଅଫିସ, ୨୮।୮-ଅନୁଗୋଳ ପୌରପାଳିକା ପକ୍ଷରୁ ମଙ୍ଗଳବାର ପିଓଏସ୍ ମେଶିନ୍ରେ ହୋଲ୍ଡିଂ ଟ୍ୟାକ୍ସ ଆଦାୟର ଶୁଭାରମ୍ଭ ହୋଇଛି। ଏଣିକି ଲୋକମାନଙ୍କ ନିକଟରୁ ଏପରି ଭାବେ ହୋଲଡିଂ ଟ୍ୟାକ୍ସ ଆଦାୟ କରାଯିବ ବୋଲି ପୌରପାଳିକା ନିର୍ବାହୀ ଅଧିକାରୀ ଶୁଭେନ୍ଦୁ ଜେନା କହିଛନ୍ତି।
୮ ଜଣ ଟ୍ୟାକ୍ସ କଲେକ୍ଟରଙ୍କ ପାଇଁ ୮ଟି ପିଓଏସ୍ ମେଶିନ୍ ଏକ ଘରୋଇ ବ୍ୟାଙ୍କରୁ ଆସିଛି। ଏପରି କି ଟ୍ୟାକ୍ସ କଲେକ୍ଟରମାନଙ୍କୁ ଏହି ମେଶିନ୍ ସମ୍ବନ୍ଧରେ ପ୍ରଶିକ୍ଷଣ ମଧ୍ୟ ପ୍ରଦାନ କରାଯାଇଛି। ପୂର୍ବରୁ ଲୋକମାନେ ଦେୟ ଦେବା ପାଇଁ କାର୍ଯ୍ୟାଳୟକୁ ଟଙ୍କା ଧରି ଆସୁଥିଲେ। ଏପରି କି ପୌର କର୍ମଚାରୀମାନେ ମଧ୍ୟ ସହରର ବିଭିନ୍ନ ସ୍ଥାନକୁ ଟ୍ୟାକ୍ସ ଆଦାୟ ପାଇଁ ଯାଉଥିଲେ। ତେଣୁ ନଗଦ ଟଙ୍କା ନେଣ ଦେଣ ହେଉଥିବାରୁ ବିଭିନ୍ନ ସମୟରେ ଦୁର୍ନୀତି ହେଉଥିବା ଅଭିଯୋଗ ହେଉଥିଲା। ଏବେ ଲୋକମାନଙ୍କ ନିକଟରୁ ପିଓଏସ୍ ମେଶିନ୍ ମାଧ୍ୟମରେ ଟଙ୍କା ଆଦାୟ ହେବ। ଏପରି ବ୍ୟବସ୍ଥା ଅନୁଗୋଳରେ ପ୍ରଥମ ଥର ପାଇଁ ପୌରପାଳିକା ପକ୍ଷରୁ ଆରମ୍ଭ ହୋଇଛି। ତେବେ ଟ୍ୟାକ୍ସ ବ୍ୟବସ୍ଥାକୁ ଆଗାମୀ ଦିନରେ ସହଜ କରିବା ପାଇଁ ଅନ୍ଲାଇନ ବ୍ୟବସ୍ଥା କରାଯିବାର ଯୋଜନା ରହିଛି ବୋଲି ପୌର ନିର୍ବାହୀ ଅଧିକାରୀ ଜେନା କହିଛନ୍ତି। ଡେଲି ମାର୍କେଟର ବ୍ୟବସାୟୀ ପଙ୍କଜ ମିଶ୍ର ମେଶିନ୍ ଦ୍ୱାରା ପ୍ରଥମେ ଟ୍ୟାକ୍ସ ପ୍ରଦାନ କରିଥିବା ଜଣାପଡ଼ିଛି। ସେ ୨୦୧୯-୨୦ ବର୍ଷ ପାଇଁ ଦୋକାନ ଭଡ଼ା ବାବଦକୁ ୧୩ ହଜାର ୫ଶହ ଟଙ୍କା ଦେଇଥିବା ପୌରପାଳିକା ପକ୍ଷରୁ ସୂଚନା ମିଳିଛି। ଏହି କାର୍ଯ୍ୟକ୍ରମ ଶୁଭାରମ୍ଭରେ ଅନୁଗୋଳ ପୌରନିର୍ବାହୀ ଅଧିକାରୀ ଜେନାଙ୍କ ସମେତ, ନିର୍ବାହୀ ଯନ୍ତ୍ରୀ ସୀମାଞ୍ଚଳ ମିଶ୍ର, ଟିଡି ଚିତ୍ତରଞ୍ଜନ ପ୍ରଧାନ, ମେଶିନ୍ ଯୋଗାଇଥିବା ଘରୋଇ ବ୍ୟାଙ୍କର କର୍ମଚାରୀ ଓ ପୌରପାଳିକାର କର୍ମଚାରୀମାନେ ଉପସ୍ଥିତ ଥିଲେ।
