କେରଳର କୋଲ୍ଲାମ୍ ସହର ଅନ୍ତର୍ଗତ ଏକ ତଟୀୟ ଅଞ୍ଚଳ ହେଉଛି ଥଙ୍ଗାସେରୀ। ଏଠାରେ ରହିଛି ଏକ ପ୍ରାଚୀନ ଦୁର୍ଗ, ଯାହାର ନାଁ ହେଲା ଥଙ୍ଗାସେରୀ ଦୁର୍ଗ। ସେଣ୍ଟ ଥୋମାସ୍ ଦୁର୍ଗ ଭାବେ ବି ଏହା ପରିଚିତ…
ଥଙ୍ଗାସେରୀ ହେଉଛି କେରଳର କୋଲ୍ଲାମ୍ ସହର ଅନ୍ତର୍ଗତ ଏକ ତଟୀୟ ଅଞ୍ଚଳ, ଯେଉଁଠାରେ ରହିଛି ପ୍ରାଚୀନ ଥଙ୍ଗାସେରୀ ଦୁର୍ଗ। ଏହି ଦୁର୍ଗ ସେଣ୍ଟ ଥୋମାସ୍ ଦୁର୍ଗ ନାମରେ ବି ପରିଚିତ। କେରଳ ରାଜ୍ୟର ରାଜଧାନୀ ଥିରୁଭାନନ୍ଥପୁରମ୍ଠାରୁ ପ୍ରାୟ ୭୧ କି.ମି ଏବଂ କୋଲ୍ଲାମ୍ ସହରଠାରୁ ପ୍ରାୟ ୫ କି.ମି ଦୂରରେ ଥିବା ଏହି ଦୁର୍ଗ ନିକଟକୁ ବୁଲିବାକୁ ଗଲେ ଅନେକ ଐତିହାସିକ ତଥ୍ୟ ଜାଣିବାର ସୁଯୋଗ ମିଳେ। ଖାସ୍ ସେଥିପାଇଁ ଏଠାରେ ପର୍ଯ୍ୟଟକଙ୍କର ବେଶ୍ ଭିଡ଼ ପରିଲକ୍ଷିତ ହୋଇଥାଏ।
କେବେ ଓ କେମିତି ଯିବେ
ଖରାଦିନେ ଏଠାରେ ଗରମ ଅନୁଭୂତ ହୋଇଥାଏ। ସେଥିପାଇଁ ଶୀତଦିନେ ବହୁ ସଂଖ୍ୟାରେ ପର୍ଯ୍ୟଟକ ଏଠାକୁ ବୁଲି ଯାଇଥାନ୍ତି। ଖାସ୍କରି ଅକ୍ଟୋବରରୁ ଫେବୃୟାରୀ ଭିତରେ ଏଠାରେ ଆଗନ୍ତୁକଙ୍କର ବେଶ୍ ଭିଡ଼ ଦେଖିବାକୁ ମିଳିଥାଏ। ସେହିପରି ଏଠାକୁ ଯିବା ପାଇଁ ପରିବହନର ତିନୋଟି ମାଧ୍ୟମର ସୁବିଧା ରହିଛି। ତ୍ରିବେନ୍ଦ୍ରମ୍ ଏୟାର୍ପୋର୍ଟ ହେଉଛି ଏହାର ନିକଟତମ ବିମାନବନ୍ଦର, ଯାହା ଥଙ୍ଗାସେରୀ ଦୁର୍ଗଠାରୁ ପ୍ରାୟ ୭୦ କି.ମି ଦୂରରେ ଅବସ୍ଥିତ। ଉକ୍ତ ବିମାନବନ୍ଦର ନିକଟରୁ ଥଙ୍ଗାସେରୀ ଦୁର୍ଗକୁ ଯିବା ପାଇଁ ଟ୍ୟାକ୍ସିର ସୁବିଧା ବି ରହିଛି। ଅନ୍ୟପକ୍ଷେ କୋଲ୍ଲାମ୍ ଜଙ୍କସନ୍ ରେଲଓ୍ବେ ଷ୍ଟେଶନ ହେଉଛି ଥଙ୍ଗାସେରୀ ଦୁର୍ଗର ନିକଟତମ ତଥା ଏକ ପ୍ରମୁଖ ରେଳଷ୍ଟେଶନ। ତା’ଛଡ଼ା ଦେଶର ବିଭିନ୍ନ ସ୍ଥାନରୁ ଏଠାକୁ ଟୁରିଷ୍ଟ ବସ୍ ବି ଯା’ଆସ କରିଥାଏ।
ଦୁର୍ଗର ଇତିହାସ ସମ୍ପର୍କରେ
ଥଙ୍ଗାସେରୀ ଦୁର୍ଗ ହେଉଛି ଏକ ପ୍ରାଚୀନ ଦୁର୍ଗ। ଏହାର ସମ୍ପର୍କ ଷୋଡ଼ଶ ଖ୍ରୀଷ୍ଟାବ୍ଦ ସହ ରହିଥିବା ଜଣାଯାଏ। ସେତେବେଳେ ଏହି କ୍ଷେତ୍ର ପର୍ତ୍ତୁଗୀଜମାନଙ୍କ ନିୟନ୍ତ୍ରଣରେ ଥିବାର ସୂଚନା ମିଳେ। ସେହିପରି ଆରବ ସାଗରର ତଟ ଦେଶରେ ଥିବା ଏହି ଐତିହାସିକ ଦୁର୍ଗଟିର ନିର୍ମାଣ ସାଣ୍ଡଷ୍ଟୋନ୍ ଓ ଲାଇମ୍ ମୋଟାର୍ ଦ୍ୱାରା ହୋଇଥିବା ବି ଜଣାଯାଏ। ତେବେ ଏହି ଦୁର୍ଗ ମାଧ୍ୟମରେ ସମୟାନୁସାରେ କେମିତି କୋଲ୍ଲାମ୍ କ୍ଷେତ୍ର ଉପରେ ବିଭିନ୍ନ ବାହ୍ୟଶକ୍ତି (ଯଥା: ପର୍ତ୍ତୁଗୀଜ୍, ଡଚ୍ ଓ ବ୍ରିଟିଶ)ମାନେ ନିଜର ଅଧିକାର ଜାହିର କରିଥିଲେ ସେ ସମ୍ପର୍କରେ ବି ଅନେକ ତଥ୍ୟ ଜାଣିହୁଏ। ଇତିହାସର ଏତେ ସବୁ ଗୁରୁତ୍ୱପୂର୍ଣ୍ଣ ଘଟଣାବଳୀକୁ ନିଜ ଭିତରେ ସାଇତି ରଖିଥିବା ଏହି ଦୁର୍ଗଟିର ବର୍ତ୍ତମାନ କେବଳ ଭଗ୍ନାଂବଶେଷ ଦେଖିବାକୁ ମିଳୁଥିଲେ ବି ଏହାର ମହତ୍ତ୍ୱ କମ୍ ହୋଇ ନାହିଁ।
ଆଉ କ’ଣ ଦେଖିବେ
ଥଙ୍ଗାସେରୀ ଦୁର୍ଗ ସହ ଜଡିତ ଥିବା ଅନେକ ଐତିହାସିକ ତଥ୍ୟ ତଥା ଏଠାକାର ତଟୀୟ ଭୌଗୋଳିକ ସ୍ଥିତି ହିଁ ପର୍ଯ୍ୟଟକଙ୍କୁ ଏଠାକୁ ଆସିବା ପାଇଁ ଆକର୍ଷିତ କରିଥାଏ। କାରଣ ଆରବ ସାଗରର ତଟ ଦେଶରେ ଅବସ୍ଥିତ ଥିବା ଏହି ଦୁର୍ଗ ନିକଟରେ ସାମୁଦ୍ରିକ ଜଳବାୟୁ ଅନୁଭୂତ ହୋଇ ଶରୀରକୁ ମାନସିକ ଓ ଶାରୀରିକ ଶାନ୍ତି ପ୍ରଦାନ କରିଥାଏ। କେବଳ ସେତିକି ନୁହେଁ, ଏଠାରେ ଥଙ୍ଗାସେରୀ ଦୁର୍ଗ ବ୍ୟତୀତ ଆହୁରି ଅନେକ ଦର୍ଶନୀୟ ସ୍ଥାନ ବି ବୁଲି ଦେଖିହୁଏ। ତନ୍ମଧ୍ୟରୁ ଥଙ୍ଗାସେରୀ ବିଚ୍, କୋଲ୍ଲାମ୍ ବନ୍ଦର, ଇନ୍ଫାଣ୍ଟ ଜେସସ୍ କାଥେଡ୍ରାଲ୍, ଲାଇଟ୍ ହାଉସ୍ ଇତ୍ୟାଦି ଅନ୍ୟତମ। ତେଣୁ ଇତିହାସରେ ରୁଚି ରଖୁଥିବା ତଥା ପ୍ରକୃତିପ୍ରେମୀଙ୍କ ପାଇଁ ଏହା ଏକ ଖାସ୍ ପର୍ଯ୍ୟଟନସ୍ଥଳୀ କହିଲେ ଆଦୌ ଭୁଲ୍ ହେବନାହିଁ।
