ବାଲେଶ୍ୱର ଅଫିସ, ୮।୬-ବାଲେଶ୍ୱର ଜିଲା ବର୍ଜ୍ୟବସ୍ତୁ ପରିଚାଳନା କମିଟିର ବର୍ଜ୍ୟବସ୍ତୁ ପରିଚାଳନା ସମ୍ପର୍କିତ ଏକ ବୈଠକ ଜିଲାପାଳଙ୍କ ଆବାସିକ କାର୍ଯ୍ୟାଳୟରେ ଶୁକ୍ର୍ରବାର ଅନୁଷ୍ଠିତ ହୋଇଯାଇଛି ା ଜିଲା ଗ୍ରାମ୍ୟ ଉନ୍ନୟନ ସଂସ୍ଥା ପ୍ରକଳ୍ପ ନିର୍ଦ୍ଦେଶକ ତ୍ରିଲୋଚନ ପ୍ରଧାନ ଏଥିରେ ଅଧ୍ୟକ୍ଷତା କରିବା ସହ ପରିବେଶ ସୁରକ୍ଷା ପାଇଁ ବର୍ଜ୍ୟବସ୍ତୁ ପରିଚାଳନାର ବିଭିନ୍ନ ଦିଗ ଉପରେ ଆଲୋଚନା କରିଥିଲେ। ବିଶେଷ କରି ପ୍ରତ୍ୟେକ ପରିବାରରୁ ବାହାରୁଥିବା ପରିବାଚୋପା, ଅଇଁଠା ଖାଦ୍ୟ, ପଲିଥିନ ପଭୃତି ବର୍ଜ୍ୟବସ୍ତୁକୁ ଠିକ୍ ଭାବେ ପରିଚାଳନା ପାଇଁ ଜନସଚେତନତା ଉପରେ ସେ ଗୁରୁତ୍ୱାରୋପ କରିଥିଲେ। ବର୍ଜ୍ୟବସ୍ତୁ ପରିଚାଳନା ପ୍ରକ୍ରିୟାକୁ ସମସ୍ତ ଅଞ୍ଚଳରେ ବ୍ୟାପକ କରିବା ପାଇଁ ସେମାନେ ପରାମର୍ଶ ଦେଇଥିଲେ। ସମସ୍ତ ଗ୍ରାମାଞ୍ଚଳ ସହିତ ପୌରାଞ୍ଚଳରେ ଏ ସମ୍ପର୍କରେ ନାଗରିକମାନଙ୍କୁ ସଚେତନ କରାଯାଇ ଠିକ୍ ଭାବେ ବର୍ଜ୍ୟବସ୍ତୁ ପରିଚାଳନା ପରେ ସେଥିରୁ ଜୈବିକ ସାର ପ୍ରସ୍ତୁତ ହୋଇ କୃଷି କ୍ଷେତ୍ରରେ ବ୍ୟବହାର ହୋଇପାରିବା ଉପରେ ଗୁରୁତ୍ୱ ପ୍ରକାଶ କରିବା ସହ ନୀଳଗିରି ବିଜ୍ଞାପିତ ଅଞ୍ଚଳକୁ ମଡ଼େଲ୍ ଭାବରେ ଗ୍ରହଣ କରାଯିବା ପାଇଁ ନିଷ୍ପତ୍ତି ହୋଇଥିବା ପ୍ରକାଶ କରିଥିଲେ।
ଅନ୍ୟମାନଙ୍କ ମଧ୍ୟରେ ବାଲେଶ୍ୱର ଉପଜିଲାପାଳ ନୀଲୁ ମହାପାତ୍ର, ସଦର ତହସିଲଦାର ପଞ୍ଚାନନ ପାତ୍ର, ସୋର ତହସିଲଦାର ଦେବୀପ୍ରସାଦ ଦାସ, ନୀଳଗିରି ତହସିଲଦାର ସୁଶ୍ରୀତା ଟୁଡୁ, ଜିଲା ଜଳ ଓ ପରିମଳ ମିଶନ କାର୍ଯ୍ୟନିବାହୀ ଯନ୍ତ୍ରୀ ସୁରେଶ ଚନ୍ଦ୍ର ରାଉତ, ବାଲେଶ୍ୱର ପୌରପାଳିକା କାର୍ଯ୍ୟନିର୍ବାହୀ ଅଧିକାରୀ ଡ. ଚିତ୍ରସେନ ରାଉତ, ସୋର ଏନ୍ଏସି କାର୍ଯ୍ୟନିର୍ବାହୀ ଅଧିକାରୀ ଏସ୍.ଏନ୍. ଦଣ୍ଡସେନା, ଜଳେଶ୍ୱର ଏନ୍ଏସି କାର୍ଯ୍ୟନିର୍ବାହୀ ଅଧିକାରୀ ହୃଷିକେଶ ପାଣି ପ୍ରମୁଖ ଉପସ୍ଥିତ ରହି ଆଲୋଚନାରେ ଅଂଶଗ୍ରହଣ କରିଥିଲେ। ପ୍ରତ୍ୟେକ ସହରାଞ୍ଚଳରେ ସଫେଇ କର୍ମଚାରୀଙ୍କୁ ପ୍ରଶିକ୍ଷଣ ପ୍ରଦାନ କରାଯିବା ସହ ବର୍ଜ୍ୟବସ୍ତୁ ପରିଚାଳନା ପାଇଁ ଜନସଚେତନତା ସୃଷ୍ଟି ନିମନ୍ତେ ବୈଠକରେ ନିଷ୍ପତ୍ତି ନିଆଯାଇଛି। ପ୍ରତ୍ୟେକ ୱାର୍ଡ଼ରେ ସ୍ବୟଂ ସହାୟକ ଗୋଷ୍ଠୀମାନଙ୍କ ମାଧ୍ୟମରେ ମଧ୍ୟ ବ୍ୟାପକ କରିବା ପାଇଁ ସ୍ଥିର କରାଯାଇଥିଲା। ବର୍ଜ୍ୟବସ୍ତୁ ପରିଚାଳନା ପାଇଁ ସହର ଉପକଣ୍ଠରେ ଗାରବେଜ ପିଟ୍ ଅତିଶୀଘ୍ର ନିର୍ମାଣ ହେବ। ଆଗାମୀ ଦିନରେ ସମଗ୍ର ଜିଲାର ବର୍ଜ୍ୟବସ୍ତୁ ପରିଚାଳନା ପାଇଁ କମଟିର ବୈଠକ ପ୍ରତ୍ୟେକ ୧୫ଦିନରେ ଅନୁଷ୍ଠିତ ହେବ ବୋଲି କୁହାଯାଇଥିଲା।
୧-ବାଲେଶ୍ୱର-ଶୁକ୍ରବାର- ବର୍ଜ୍ୟବସ୍ତୁ ପରିଚାଳନା କମିଟିର ବୈଠକ ଅନୁଷ୍ଠିତ।
