ଭୋପାଳ,୧୪।୯: ମଧ୍ୟପ୍ରଦେଶର ଶିବାନୀ ଜିଲାରେ ଏକ ଅଭାବନୀୟ ଦୃଶ୍ୟ ଦେଖିବାକୁ ମିଳିଛି। ଗୁରୁବାର ବିଳମ୍ବିତ ରାତିରେ ଜଣେ ୩୦ ବର୍ଷୀୟ ଯୁବକଙ୍କ ନାଚୁଥିବା ସମୟରେ ମୃତ୍ୟୁ ଘଟିଛି। ସେହି ସମୟରେ ରେକର୍ଡ ହୋଇଥିବା ଏକ ଭିଡିଓ ଏବେ ସୋସିଆଲ ମିଡିଆରେ ଭାଇରାଲ ହେବାରେ ଲାଗିଛି। ସୂଚନାଯୋଗ୍ୟ, ବିଘ୍ନବିନାଶନଙ୍କ ମୂର୍ତ୍ତି ବିସର୍ଜନ ସମୟରେ ଏକ କାର୍ଯ୍ୟକ୍ରମର ଆୟୋଜନ କରାଯାଇଥିଲା। ସେହି ସମୟରେ ଗୁରୁଚରଣ ଠାକୁର ଓ ଅନ୍ୟ ଜଣେ ବ୍ୟକ୍ତି ନାଗିନ ଗୀତ ଉପରେ ନାଚୁଥିଲେ। ଗୁରୁଚରଣ ବହୁ ଉତ୍ସାହିତ ହୋଇ ନାଚୁଥିବା ବେଳେ ହଠାତ୍ ହୃଦ୍ଘାତ ହେବାରୁ ତଳେ ପଡ଼ିଯାଇଥିଲେ। କେହି କିଛି ବୁଝିବା ପୂର୍ବରୁ ଘଟଣାସ୍ଥଳରେ ହିଁ ତାଙ୍କର ମୃତ୍ୟୁ ହୋଇଯାଇଥିଲା। ଅନ୍ୟପଟେ ସେଠାରେ ଉପସ୍ଥିତ ଲୋକ ନାଚରେ ଏତେ ମଜ୍ଜିଯାଇଥିଲେ ଯେ, ତାଙ୍କ ମୃତ୍ୟୁ ହୋଇଯାଇଥିବା ନେଇ କାହାକୁ ଜଣାପଡ଼ି ନ ଥିଲା।
