ପାଲାମୁ (ଝାଡ଼ଖଣ୍ଡ), ୨୨।୬- ଝାଡ଼ଖଣ୍ଡରେ ନବବିବାହିତ ଦମ୍ପତ୍ତିଙ୍କୁ ନେଇ ଯାଉଥିବା ଏକ କାର୍ ନଦୀ ମଧ୍ୟକୁ ଖସି ପଡ଼ିଥିଲା। କାର୍ଟି ଅଧାବୁଡ଼ି ନଦୀର ପ୍ରଖର ସ୍ରୋତରେ ଭାସି ଯାଉଥିବାବେଳେ ସ୍ବଭାଗ୍ୟବଶତଃ ସ୍ଥାନୀୟ ଅଞ୍ଚଳର କିଛିଲୋକ ନଦୀକୁ ଡେଇଁ କାରରୁ ନବଦମ୍ପତ୍ତିଙ୍କୁ ଉଦ୍ଧାର କରିବାରେ ସଫଳ ହୋଇଥିଲେ। ନଦୀଗର୍ଭରୁ କାରରୁ ନବବିବାହିତଙ୍କୁ ଉଦ୍ଧାର କରିବାର ଭିଡିଓ ଏବେ ସୋସିଆଲ ମିଡିଆରେ ଭାଇରାଲ ହେବାପରେ ଯୁବକଙ୍କ ସାହସିକତାକୁ ଚାରିଆଡ଼ୁ ପ୍ରଶଂସା କରାଯାଉଛି। ଝାଡ଼ଖଣ୍ଡର ପାଲମୁ ଅଞ୍ଚଳରେ ଏହି ଘଟଣା ଘଟିଛି। କନ୍ୟା ଘରୁ କାର୍ଟି ନବଦମ୍ପତ୍ତିଙ୍କ ସମେତ ୩ ଜଣ ଲୋକଙ୍କୁ ନେଇ ଫେରୁଥିବାବେଳେ ବାଟରେ ମଳୟ ନଦୀକୁ ଖସି ପଡ଼ିଥିଲା। ବର୍ଷା ଯୋଗୁ ନଦୀର ପ୍ରଖର ସ୍ରୋତରେ କାରଟି ଅଧ କିଲୋମିଟର ପର୍ଯ୍ୟନ୍ତ ଭାସିଯାଇଥିଲା। ତେବେ ସେଠାରେ ଉପସ୍ଥିତ ଥିବା ସ୍ଥାନୀୟ ଲୋକ ପାଣିକୁ ଡେଇଁ କାର୍ର ଡୋର ଭାଙ୍ଗି ନବଦମ୍ପତ୍ତିଙ୍କ ସମେତ ଅନ୍ୟ ୩ ଜଣଙ୍କୁ ଉଦ୍ଧାର କରିଥିଲେ। ଏହି ଭିଡିଓ ଏବେ ସୋସିଆଲ ମିଡିଆରେ ଭାଇରାଲ ହେବାରେ ଲାଗିଛି।
