ନୂଆଦିଲ୍ଲୀ, ୨୬ା୪ (ପି.ଟି.)-ଡୋପ୍ ଟେଷ୍ଟରେ ଧରାପଡ଼ିଥିବାରୁ ଓ୍ବାଲର୍ଡ ଆଥଲେଟିକ୍ସ ଗଭର୍ନିଂବଡିର ଆଥଲେଟିକ୍ସ ଇଣ୍ଟିଗ୍ରିଟି ୟୁନିଟ୍ (ଏଆଇୟୁ)ଭାରତର ମିଡଲ ଡିଷ୍ଟାନ୍ସ ଧାବିିକା ଝୁମା ଖାତୁନ୍ଙ୍କୁ ୪ବର୍ଷ ବାସନ୍ଦ କରିଛନ୍ତି। ୨୦୧୮ ଜୁନ୍ରେ ଗୁଆହାଟୀଠାରେ ଅନୁଷ୍ଠିତ ଜାତୀୟ ଆନ୍ତଃରାଜ୍ୟ ଚାମ୍ପିୟନଶିପ୍ରେ ୩୧ ବର୍ଷୀୟା ଖାତୁନଙ୍କଠାରୁ ସାମ୍ପଲ ସଂଗ୍ରହ କରାଯାଇଥିଲା। ନ୍ୟାଶନାଲ ଡୋପ୍ ଟେଷ୍ଟିଂ ଲାବୋରେଟୋରିରେ ତାହାର ପରୀକ୍ଷା ହୋଇଥିଲା। ଫଳାଫଳ ନେଭେଟିଭ୍ ଆସିଥିଲା। ଖାତୁନ୍ ଗୁଆହାଟୀ ଚାମ୍ପିୟନଶିପ୍ରେ ଉଭୟ ୧୫୦୦ ମିଟର ଓ ୫,୦୦୦ ମିଟର ରେସ୍ରେ ଗୋଟିଏ ଲେଖାଏଁ ବ୍ରୋଞ୍ଜ ପାଇଥିଲେ। ଓ୍ବାଲର୍ଡ ଆଣ୍ଟି ଡୋପିଂ ଏଜେନ୍ସି (ଓ୍ବାଡା) କିନ୍ତୁ ପରେ କାନାଡାସ୍ଥିତ ମଣ୍ଟ୍ରିଲ ଲାବୋରେଟୋରିଠାରେ ଭାରତୀୟ ଧାବିକାଙ୍କ ସାମ୍ପଲକୁ ପରୀକ୍ଷା କରିବା ଲାଗି ନିଷ୍ପତ୍ତି ନେଇଥିଲା। ସେଥିରେ ଡିହାଇଡ୍ରୋକ୍ଲୋରୋମେଥିଲ ଟେଷ୍ଟୋଷ୍ଟେରନ ପଜିଟିଭ୍ ଆସିଥିଲା। ଫଳରେ ଖାତୁନଙ୍କ ପୂର୍ବ ଫଳାଫଳକୁ ରଦ୍ଦ କରିଦିଆଯାଇଥିଲା। କେବଳ ଖାତୁନ ନୁହଁନ୍ତି (ଏନ୍ଡିଟିଏଲ୍)ରେ ନେଗେଟିଭ୍ ଆସିଥିବା ଭାରତର ଅନ୍ୟ ୪ଜଣ ଆଥଲେଟ୍ଙ୍କ ସାମ୍ପଲ ମଧ୍ୟ ପଜିଟିଭ ଆସିଥିଲା। ସେମାନଙ୍କ ମଧ୍ୟରେ ୨୦୧୭ ଏସିଆନ ଚାମ୍ପିୟନ କ୍ୱାର୍ଟରମାଇଲର ନିର୍ମଳା ଶେଓରାନ ଅନ୍ୟତମ। ଆବଶ୍ୟକ କାର୍ଯ୍ୟାନୁଷ୍ଠାନ ପାଇଁ ଓ୍ବାଡା ଏହି ଫଳାଫଳକୁ ଆଥଲେଟିକ୍ସ ଇଣ୍ଟିଗ୍ରିଟି ୟୁନିଟ୍ ନିକଟକୁ ପଠାଇଦେଇଥିଲା। ଡୋପିଂ ନିରୋଧୀ ନିୟମ ଉଲ୍ଲଂଘନ ପାଇଁ ଖାତୁନଙ୍କୁ ୪ବର୍ଷ ବାସନ୍ଦ ଦଣ୍ଡ ପ୍ରଦାନ କରାଯାଇଥିଲା। ତେବେ ସେ ଚାହିଁଥିଲେ ଏପ୍ରିଲ ୧୩ ମଧ୍ୟରେ ଡିସିପ୍ଲିନାରି ଟ୍ରିବ୍ୟୁନାଲରେ ଅପିଲ କରିପାରିଥାନ୍ତେ। ମାତ୍ର ସେ ତାହା ନ କରି ଦଣ୍ଡକୁ ମାନି ନେଇଥିଲେ। ସୂଚନାଯୋଗ୍ୟ, ଖାତୁନ୍ ୨୦୧୧ ଏସିଆନ ଚାମ୍ପିୟନଶିପ୍ ୪x୪୦୦ ମିଟର ରିଲେ ରେସ୍ରେ ରୌପ୍ୟ ଜିତିଥିଲେ।
