ନୂଆଦିଲ୍ଲୀ,୨୩।୮(ପି.ଟି.): ବିଶ୍ୱ ଆଣ୍ଟି ଡୋପିଂ ଏଜେନ୍ସି (ଓ୍ବାଡା) ଶୁକ୍ରବାର ଭାରତୀୟ ଅଲିମ୍ପିକ୍ ଆସୋସିଏଶନ (ଆଇଓଏ)କୁ ଭର୍ତ୍ସନା କରି ଦେଶରେ ଥିବା ଏକମାତ୍ର ଓ୍ବାଡା ସ୍ବୀକୃତି ପ୍ରାପ୍ତ ଡୋପ ଟେଷ୍ଟିଂ ଲାବ୍କୁ ସସ୍ପେଣ୍ଡ କରିଛି। ଅନ୍ତର୍ଜାତୀୟ ଷ୍ଟାଣ୍ଡାର୍ଡ ଲାବରେଟୋରି ସ୍ତରୀୟ ହୋଇ ନ ଥିବାରୁ ଦିଲ୍ଲୀସ୍ଥିତ ଲାବକୁ ୬ ମାସ ପାଇଁ ବାସନ୍ଦ କରାଯାଇଛି। ଜାତୀୟ ଆଣ୍ଟି ଡୋପିଂ ସଂସ୍ଥା (ନାଡା) ଏହାକୁ ବିରୋଧ କରି ୨୧ ଦିନ ମଧ୍ୟରେ ଅପିଲ କରିପାରିବ। ବାସନ୍ଦାଦେଶ ସତ୍ତ୍ୱେ ନାଡା ଖେଳାଳିଙ୍କ ରକ୍ତ ଓ ମୂତ୍ର ନମୁନା ସଂଗ୍ରହ କରିପାରିବ। କିନ୍ତୁ ଏହାକୁ ଦେଶ ବାହାରେ ଥିବା ଓ୍ବାଡା ସ୍ବୀକୃତି ପ୍ରାପ୍ତ ଲାବ୍ରେ ଟେଷ୍ଟ କରାଇବାକୁ ପଡ଼ିବ। ଜାତୀୟ ଡୋପ ଟେଷ୍ଟ ଲାବ୍ (ଏନ୍ଡିଟିଏଲ)କୁ ୨୦୦୮ରେ ଓ୍ବାଡା ସ୍ବୀକୃତି ମିଳିଥିଲା। ଆମକୁ ଏବେ ଟଙ୍କା ବଦଳରେ ଡଲାରରେ ଖର୍ଚ୍ଚ କରିବାକୁ ପଡ଼ିବ। ଚିନ୍ତାର ମୁଖ୍ୟ କଥା ହେଲା ଅତିରିକ୍ତ ଟଙ୍କା କିଏ ବିହନ କରିବ। ଜାତୀୟ କ୍ରୀଡ଼ା ମହାସଂଘ (ଏନ୍ଏସ୍ଏଫ୍) ଏ ନେଇ ଟଙ୍କା ଖର୍ଚ୍ଚ କଲା ଭଳି ସ୍ଥିତିରେ ନାହିଁ। ନାଡାର ତ୍ରୁଟି ପାଇଁ ଆମେ କେଉଁ କାରଣରୁ ଟଙ୍କା ଦେବୁ ବୋଲି ପ୍ରଶ୍ନ କରିଛନ୍ତି ଭାରତୀୟ ଅଲିମ୍ପିକ୍ ଆସୋସିଏଶନ ମୁଖ୍ୟ ନରିନ୍ଦର ବାତ୍ରା। ବାରମ୍ବାର ଚେତାଇବା ସତ୍ତ୍ୱେ ନାଡା ଏଭଳି ଭୁଲ କରିଛି। ଏହି ସମସ୍ୟା ଗଲା ବର୍ଷେ ହେଲା ଲାଗି ରହିଛି। ପୂର୍ବରୁ ଓ୍ବାଡା ଏନ୍ଡିଟିଏଲର ଟେଷ୍ଟିଂ ପ୍ରକ୍ରିୟା ଉପରେ ପ୍ରଶ୍ନ ଉଠାଇଥିଲା। ଏହାସତ୍ତ୍ୱେ ନାଡା ମ୍ୟାନେଜ କରିବାରେ ଫେଲ ହୋଇଛି ବୋଲି ସେ କହିଛନ୍ତି। ଏ ସମ୍ପର୍କରେ ନାଡା ଡିରେକ୍ଟର ଜେନେରାଲ ନବୀନ ଅଗ୍ରଓ୍ବାଲ କୌଣସି ମତ ରଖିନାହାନ୍ତି।
