ଗୋପାଳପୁର,୯।୬-ରଙ୍ଗେଇଲୁଣ୍ଡା ବ୍ଲକ ରାଳବସ୍ଥିତ ଦେଉଳିବନ୍ଧର ଉନ୍ନତୀକରଣ କାର୍ଯ୍ୟ ଠିକ୍ ଭାବେ ହେଉ ନ ଥିବା ଅଭିଯୋଗ ହେଉଛି। ୨୦୧୮ ଡିିସେମ୍ବର ୭ରୁ ଆରମ୍ଭ ହୋଇ ଏହି କାର୍ଯ୍ୟ ୨୦୧୯ ମାର୍ଚ୍ଚ ୧୬ ସୁଦ୍ଧା ସରିବ ବୋଲି ସେଠାରେ ଲାଗିଥିବା ଫଳକରେ ଦର୍ଶାଯାଇଛି । ବ୍ୟୟ ଅଟକଳ ୪୦ ଲକ୍ଷ ଟଙ୍କା ରହିଛି । ତେବେ ଧାର୍ଯ୍ୟ ସମୟର ୩ ମାସ ପରେ ବି ସେଭଳି କିଛି ଆଖିଦୃଶିଆ କାର୍ଯ୍ୟ ହୋଇନାହିଁ । ଅନ୍ୟପକ୍ଷରେ ବନ୍ଧ ମାଟିକୁ ବିକ୍ରି କରାଯାଉଥିବା ଏବଂ ଅଧିକାରୀ ଓ ଠିକାଦାରଙ୍କ ମଧୁଚନ୍ଦ୍ରିକା ଯୋଗୁ କାର୍ଯ୍ୟ ବିଳମ୍ବ ହେଉଥିବା ରଙ୍ଗିପୁର ଓ ରାଳବ ଗ୍ରାମବାସୀ ଅଭିଯୋଗ କରିଛନ୍ତି । ଆଉ ଦିନ କେଇଟା ପରେ ମୌସୁମୀ ବର୍ଷା ହେବାକୁ ଥିବା ବେଳେ କାମ ସରିବା ନେଇ ଅନିଶ୍ଚିତତା ଦେଖାଦେଇଛି। ବର୍ତ୍ତମାନ ସୁଦ୍ଧା ମାତ୍ର ୩୦ ପ୍ରତିଶତ କାର୍ଯ୍ୟ ସରିଛି । ବନ୍ଧ ମାଟିକୁ ସରକାରୀ କାର୍ଯ୍ୟରେ ବ୍ୟବହାର ପାଇଁ ନିୟମ ରହିଥିଲେ ମଧ୍ୟ ତାହାକୁ ଖୁଲମଖୁଲା ଉଲ୍ଲଂଘନ କରାଯାଉଛି । ସେହିପରି ଯେଉଁ ପରିମାଣରେ ମାଟି ଖୋଳିବା ପାଇଁ ବିଭାଗୀୟ ଚୁକ୍ତିନାମା ରହିଛି ତାହା ପାଳନ କରାଯାଉନାହିଁ । ଉକ୍ତ ବନ୍ଧ ଉପରେ ଦୁଇ ଗ୍ରାମର ଲୋକ ନିର୍ଭର କରୁଛନ୍ତି। ଏପରିକି ଚାଷ ପାଇଁ ମଧ୍ୟ ଏଠାରୁ ପାଣି ନିଆଯାଏ ବୋଲି ଗ୍ରାମବାସୀ କହିଛନ୍ତି। କାର୍ଯ୍ୟରେ ବିଳମ୍ବକୁ ନେଇ ଆଗାମୀ ଦିନରେ ବିଭାଗୀୟ କାର୍ଯ୍ୟାଳୟରେ ଅଭିଯୋଗ କରିବାକୁ ଗ୍ରାମବାସୀ ପ୍ରସ୍ତୁତ ହେଉଛନ୍ତି।
ଏ ନେଇ ସହକାରୀ ଯନ୍ତ୍ରୀ ଅରୁଣ କୁମାର ଶୁକ୍ଲା କହିଛନ୍ତି, ବନ୍ଧକୁ ପ୍ରଥମରୁ ମାପଚୁପ କରାଯାଇଛି । ମାଟି ବିକ୍ରି ସମ୍ପର୍କରେ ଜାଣିନି ବୋଲି ସେ କହିଛନ୍ତି। ଏଥିପ୍ରତି ଜିଲା ପ୍ରଶାସନ ଦୃଷ୍ଟି ଦେବାକୁ ଦାବି ହୋଇଛି ।
