କୁଆଲାଲମ୍ପୁର,୧୩ା୧ (ଏଏଫ୍ପି)- ବ୍ୟାଡ୍ମିଣ୍ଟନରେ ବିଶ୍ୱର ନମ୍ବର ଓ୍ବାନ ପୁରୁଷ ସିଙ୍ଗଲ୍ସ ଖେଳାଳି କେଣ୍ଟୋ ମୋମୋତା ମାଲେସିଆ ମାଷ୍ଟର୍ସ ଟାଇଟଲ ଜିତିବାର କିଛି ଘଣ୍ଟା ପରେ ଏକ ମର୍ମନ୍ତୁଦ ସଡ଼କ ଦୁର୍ଘଟଣାର ଶିକାର ହୋଇଛନ୍ତି। ସେ ଆହତ ହୋଇଥିବାବେଳେ ତାଙ୍କ ଡ୍ରାଇଭରଙ୍କ ମୃତ୍ୟୁ ହୋଇଛି। ସ୍ଥାନୀୟ ପୋଲିସଙ୍କ କହିବା ଅନୁଯାୟୀ, ୨୫ ବର୍ଷୀୟ ମୋମୋତାଙ୍କ ନାକ ଫ୍ରାକଚର ହୋଇଯାଇଛି। ତାଙ୍କ ମୁହଁରେ ଆଘାତ ଲାଗିଛି। ବିମାନ ବନ୍ଦରକୁ ଯାଉଥିବା ସମୟରେ ମୋମୋତାଙ୍କ ଭ୍ୟାନ ରାଜରାସ୍ତାରେ ଲରିରେ ପିଟି ହୋଇଥିଲା। ଦୁର୍ଘଟଣା ସକାଳ ୪: ୪୦ରେ ଘଟିଥିଲା। ୧୦ ଅଗ୍ନିଶମ କର୍ମଚାରୀ ଘଟଣାସ୍ଥଳରେ ପହଞ୍ଚତ୍ ଉଦ୍ଧାର କରିଥିଲେ। ଦୁର୍ଘଟଣା ସ୍ଥଳରେ ହିଁ ଡ୍ରାଇଭରଙ୍କ ମୃତ୍ୟୁ ହୋଇଥିଲା। ମୋମୋତାଙ୍କ ସହ ଭ୍ୟାନରେ ଥିବା ସହାୟକ କୋଚ୍, ଫିଜିଓ ଥେରାପିଷ୍ଟ ଓ ବ୍ୟାଡମିଣ୍ଟନ ଅଫିସିଆଲ ମଧ୍ୟ ଆହତ ହୋଇଛନ୍ତି। ଏହା ଜାପାନିଜ ଶଟଲରଙ୍କ ଟୋକିଓ ଅଲିମ୍ପିକ୍ସ ପ୍ରସ୍ତୁତିକୁ ଶକ୍ତ ଧକ୍କା ଦେଇଛି। ମାଲେସିଆର କ୍ରୀଡ଼ାମନ୍ତ୍ରୀ ସୟଦ ସାଦ୍ଦିକ ମେଡିକାଲକୁ ଯାଇ ମୋମୋତାଙ୍କ ସ୍ବାସ୍ଥ୍ୟାବସ୍ଥା ପଚାରି ବୁଝିଛନ୍ତି। ଆହତଙ୍କ ଅବସ୍ଥା ସ୍ଥିର ରହିଥିବା ସେ କହିଛନ୍ତି। ବ୍ୟାଡ୍ମିଣ୍ଟନ ଆସୋସିଏଶନ ଅଫ୍ ମାଲେସିଆ ଏହି ଘଟଣାରେ ଦୁଃଖ ପ୍ରକାଶ କରିଛି।
