ଥିରୁଭାନନ୍ତପୁରମ,୩।୨: ଦୁବାଇର ଶାସକ ତଥା ୟୁଏଇର ପ୍ରଧାନମନ୍ତ୍ରୀ ଶେଖ ମହମ୍ମଦ ବିନ ରଶିଦ ଅଲ ମାକତୁମ ଗୁରୁବାର ମାଲାୟାଲମ ଭାଷାରେ ଏକ ଟୁଇଟ୍ କରିଥିଲେ। ଏମିରେଟ୍ସରେ କେରଳର ମୁଖ୍ୟମନ୍ତ୍ରୀ ପିନାରାୟୀ ବିଜୟନଙ୍କ ସହ ବୈଠକ ପରେ ଶେଖ ମହମ୍ମଦ କରିଥିବା ଟୁଇଟ୍ ଭାଇରାଲ ହୋଇଯାଇଛି।
ଟୁଇଟ୍ ସହିତ ଦୁବାଇ ଶାସକ ଏକ ଫଟୋ ଶେୟାର କରିଛନ୍ତି, ଯେଉଁଥିରେ ଅଛନ୍ତି କେରଳ ମୁଖ୍ୟମନ୍ତ୍ରୀ। ବୁଧବାର ଦୁବାଇ ଏକ୍ସପୋ ୨୦୨୦ ଅବସରରେ ବିଜୟନଙ୍କୁ ଭେଟିଥିଲେ ଶେଖ ୟୁଏଇ ପ୍ରଧାନମନ୍ତ୍ରୀ। ଉକ୍ତ ପୋଷ୍ଟରେ ସେ ଲେଖିଥିଲେ, “କେରଳ ସହିତ ୟୁଏଇର ଏକ ସ୍ବତନ୍ତ୍ର ସମ୍ପର୍କ ରହିଛି। ଦୁବାଇ ଏବଂ ୟୁଏଇର ବିକାଶ ଓ ଅର୍ଥନୀତିରେ କେରଳବାସୀ ବେଶ୍ ଯୋଗଦାନ କରିଛନ୍ତି”। କୌତୁହଳର ବିଷୟ ହେଲା, କେରଳ ମୁଖ୍ୟମନ୍ତ୍ରୀ ଆରବିକ୍ ଭାଷାରେ ଟୁଇଟ କରି ଦୁବାଇ ଶାସକଙ୍କୁ ଧନ୍ୟବାଦ ଜଣାଇଥିଲେ।
ବୁଧବାର ବୈଠକ ବେଳେ ଦକ୍ଷିଣ ଭାରତ ରାଜ୍ୟର ବିକାଶରେ ସମର୍ଥନ ପାଇଁ ଶେଖ ମହମ୍ମଦ ବିନ ରଶିଦଙ୍କୁ ମୁଖ୍ୟମନ୍ତ୍ରୀ ଧନ୍ୟବାଦ ଦେଇଥିବା ସିଏମ୍ଓ ପକ୍ଷରୁ ଜାରି କରାଯାଇଥିବା ବିବୃତିରେ କୁହାଯାଇଛି।
