ଛତ୍ରପୁର,୨ା୧୨(ଡି.ଏନ.ଏ)-ଛତ୍ରପୁର ଉପକଣ୍ଠ ହୁମ୍ମୁରୀ ତାମ୍ପରାରେ ରବିବାର ୱାଟର ସ୍ପୋଟର୍ସ ଶୁଭାରମ୍ଭ ହୋଇଛି। ଜିଲାପାଳ ବିଜୟ ଅମୃତା କୁଲାଙ୍ଗେ ଏହାର ଶୁଭାରମ୍ଭ କରିବା ସହ ୱାଟର ସ୍ପୋଟର୍ସ କମ୍ପ୍ଲେକ୍ସ ଉଦ୍ଘାଟନ କରିଥିଲେ। ସମ୍ମାନିତ ଅତିଥି ଭାବେ ଗଞ୍ଜାମ ଏସ୍ପି ବ୍ରିଜେଶ କୁମାର ରଏ, ଛତ୍ରପୁର ବିଧାୟକ ସୁବାସ ଚନ୍ଦ୍ର ବେହେରା, ପୋଡାପଦର ସରପଞ୍ଚ ପୀତାମ୍ବର ପଣ୍ଡା ପ୍ରମୁଖ ଯୋଗ ଦେଇଥିଲେ। ରାଜ୍ୟ ସରକାରଙ୍କ ପର୍ଯ୍ୟଟନ ବିଭାଗ ପକ୍ଷରୁ ଅମରାବତୀ ବୋଟିଂ କ୍ଲବ ସହ ଏଠାରେ ୱାଟର ସ୍ପୋଟର୍ସ ପାଇଁ ଚୁକ୍ତି ହୋଇଛି।
ତାମ୍ପରାକୁ ଜିଲା, ରାଜ୍ୟ ତଥା ଦେଶ ବାହାରୁ ପର୍ଯ୍ୟଟକ ଆସିଥାନ୍ତି। ପୂର୍ବରୁ ଏଠାରେ ଚାଲିଥିବା ବୋଟିଂ ବ୍ୟବସ୍ଥା ବନ୍ଦ ହୋଇଯାଇଥିବାରୁ ପର୍ଯ୍ୟଟକ ନିରାଶରେ ଫେରୁଥିଲେ। ତେଣୁ ପର୍ଯ୍ୟଟନର ବିକାଶ ଓ ପର୍ଯ୍ୟଟକଙ୍କୁ ଆକୃଷ୍ଟ କରିବା ପାଇଁ ଏଠାରେ ୱାଟର ସ୍ପୋଟର୍ସ ବ୍ୟବସ୍ଥା ହୋଇଛି। ଅନ୍ୟପକ୍ଷରେ ଗଞ୍ଜାମ ଜିଲା ଉପକଣ୍ଠ ଖୋର୍ଦ୍ଧା ଜିଲା ବରକୁଳଠାରେ ଚିଲିକାରେ ଗତ ଅକ୍ଟୋବର ୨୪ ତାରିଖରୁ ଏହି ୱାଟର ସ୍ପୋଟର୍ସ ଆରମ୍ଭ ହୋଇଛି। ତାମ୍ପରାଠାରେ ଜାତୀୟ ଓ ଅନ୍ତର୍ଜାତୀୟସ୍ତରର ୱାଟର ସ୍ପୋଟର୍ସ ଟୁର୍ନାମେଣ୍ଟ ଆୟୋଜନ କରାଯିବ ବୋଲି ସୂଚନା ମିଳିଛି। ଅଲିମ୍ପିକ୍ ଆସୋସିଏଶନ, ସ୍ପୋର୍ଟସ ଅଥରିଟି ଅଫ୍ ଇଣ୍ଡିଆ ଓ ରୋଇଙ୍ଗ ଫେଡେରେଶନ ଅଫ୍ ଇଣ୍ଡିଆ ସହଯୋଗରେ ଅମରାବତୀ ବୋଟିଂ କ୍ଲବ୍ ଟୁର୍ନାମେଣ୍ଟ ଆୟୋଜନ କରିବ ବୋଲି ସୂଚନା ଦିଆଯାଇଛି। ଏଥିସହ ଏଠାରେ ଗଞ୍ଜାମ ଜିଲାର ସ୍ଥାନୀୟ ଯୁବକମାନଙ୍କୁ ଲାଇଫ୍ ଗାର୍ଡ ଓ ଲାଇଫ୍ ସେଭିଂ ତାଲିମ ପ୍ରଦାନ କରାଯିବ। ଏହାଫଳରେ ସ୍ଥାନୀୟ ଯୁବକ ମାନେ ବିଭିନ୍ନ ହୋଟେଲ, ରେସର୍ଟ, ସୁଇମିଂ କମ୍ପ୍ଲେକ୍ସରେ ନିଯୁକ୍ତି ପାଇପାରିବେ। ଭାରତ ସରକାରଙ୍କ ଦ୍ୱାରା ମାନ୍ୟତାପ୍ରାପ୍ତ ବୋଟ୍ ପାୱାର୍ ଡ୍ରାଇଭର୍ସ ନିଯୁକ୍ତି କରାଯାଇଛି। ୱାଟର ସ୍ପୋଟ୍ସର୍ର୍ ଦାୟିତ୍ୱରେ ଥିବା ସଂସ୍ଥାର ଶ୍ରୀଧର ରେଡ୍ଡୀ, ତରୁଣ କାକାନି, ସୁଧାକର ବେରିଗା ପ୍ରମୁଖ ଉପସ୍ଥିତ ଥିଲେ। ବୋଟିଂ ପାଇଁ ନିର୍ଦ୍ଧାରିତ ଦରକୁ ଅଧା କରିବାକୁ ପୋଡାପଦର ସରପଞ୍ଚ ଦାବି କରିଥିଲେ।
