ବିଞ୍ଝାରପୁର,୨୨ା୮(ଡି.ଏନ୍.ଏ.)- ହାଇକୋର୍ଟଙ୍କ ନିର୍ଦ୍ଦେଶ କ୍ରମେ ବିଞ୍ଝାରପୁର ତହସିଲ ପ୍ରଶାସନ ପକ୍ଷରୁ ଶାସନ୍ଦା ପଞ୍ଚାୟତ ତାଉଁତରା ଗ୍ରାମରେ ଜବରଦଖଲ ଉଚ୍ଛେଦ ପ୍ରକ୍ରିୟା ଆରମ୍ଭ ହୋଇଛି। ଗ୍ରାମର କେତେଜଣ ବ୍ୟକ୍ତିବିଶେଷ ହାଇକୋର୍ଟରେ ସରକାରୀ ଜମି ଜବର ଦଖଲ କରିଥିବା ନେଇ ଅଭିଯୋଗ କରିଥିଲେ। ଅଭିଯୋଗ ଆଧାରରେ ଜବର ଦଖଲ ଉଚ୍ଛେଦ ପାଇଁ ହାଇକୋର୍ଟ ତହସିଲ କର୍ତ୍ତୃପକ୍ଷଙ୍କୁ ନିର୍ଦ୍ଦେଶ ଦେଇଥିଲେ। ଏହି ନିର୍ଦ୍ଦେଶ ଅନୁଯାୟୀ ଗୁରୁବାର ପୂର୍ବାହ୍ନରେ ତହସିଲଦାର ମିନତୀ ଜଗଦେବ, ବିଞ୍ଝାରପୁର ଥାନାଧିକାରୀ ଶିବ ଚରଣ ବେହେରା ଏକ ପ୍ଲାଟୁନ ପୋଲିସ ଫୋର୍ସ ସହ ଉପର ଢିଅ ସାହିଠାରେ ପହଞ୍ଚତ୍ଥିଲେ। ହେଲେ ଉଚ୍ଛେଦସ୍ଥଳରେ ବିଦ୍ୟୁତ୍ ତାରଗୁଡିକ ଝୁଲି ରହିଥିବାରୁ ଉଚ୍ଛେଦ ପ୍ରକ୍ରିୟା ହୋଇ ପାରି ନାହଁି। ଆସନ୍ତା ୩ ଦିନ ମଧ୍ୟରେ ବିଧିବଦ୍ଧ ଭାବେ ଜବରଦଖଲ ହଟାଇବାକୁ ପ୍ରଶାସନ ସ୍ଥିର କରିଛି। ଏଥିପୂର୍ବରୁ ଜବରଦଖଲକାରୀମାନେ ସ୍ଥାନ ଖାଲି କରିବାକୁ ନିର୍ଦ୍ଦେଶ ଦିଆଯାଇଛି। ଏଥିସହ ବିଦ୍ୟୁତ୍ ବିଭାଗକୁ ଖୁଣ୍ଟରୁ ତାର ଖୋଲିବା ପାଇଁ କୁହାଯାଇଥିବା ତହସିଲଦାର କହିଛନ୍ତି। ତେବେ ଗ୍ରାମର ରମେଶ ଦାସଙ୍କ ଏକ ଘର ସରକାରୀ ରାସ୍ତା ଉପରେ ରହିଥିବା ବେଳେ ତହସିଲଦାରଙ୍କ ଉପସ୍ଥିତିରେ ପୁନଃର୍ବାର ରାସ୍ତା ମାପ କରାଯାଇଥିଲା। ଜବରଦଖଲ ଉଚ୍ଛେଦ ପ୍ରକ୍ରିୟାକୁ ନେଇ ସ୍ଥାନୀୟ ଅଞ୍ଚଳରେ ଚାପା ଉତ୍ତେଜନା ଲାଗି ରହିଥିଲା। ଆଇନଶୃଙ୍ଖଳା ପରିସ୍ଥିତିକୁ ନିୟନ୍ତ୍ରଣ କରିବାକୁ ପୋଲିସ ସଜାଗ ରହିଥିବା ଥାନାଧିକାରୀ ଶିବ ଚରଣ ବେହେରା ପ୍ରକାଶ କରିଛନ୍ତି। ଏହି ଗ୍ରାମରେ ହୋଇଥିବା ସବୁ ଜବର ଦଖଲକୁ ପ୍ରଶାସନ ପକ୍ଷରୁ ଉଚ୍ଛେଦ କରିବାକୁ ସାଧାରଣରେ ଦାବି ହେଉଛି।
