ଧର୍ମଶାଳା/ଚଢେଇଧରା/ଜେନାପୁର,୫।୬(ଡି.ଏନ୍.ଏ.)- ଢେଙ୍କାନାଳ ପୋଲିସ ପ୍ରଶାସନ ପକ୍ଷରୁ ଯାଜପୁର ଜିଲା ସୀମାନ୍ତ ଚଡ଼କମରା ଡଙ୍କାରୀ ପାହାଡରେ ଥିବା ବେଆଇନ କଳାପଥର ଖାଦାନରେ ଗତ ଏକ ତାରିଖରେ ବ୍ୟାପକ ଚଢାଉ କରାଯାଇଥିଲା। ଉକ୍ତ ଚଢାଉରେ ୨୯ରୁ ଊର୍ଦ୍ଧ୍ୱ ଗାଡି ଜବତ ହୋଇଥିଲା। ଢେଙ୍କାନଳ ପୋଲିସ ପ୍ରଶାସନର ଏଭଳି କାର୍ଯ୍ୟାନୁଷ୍ଠାନ ବେଶ୍ ପ୍ରସଂଶିତ ହୋଇଥିବାବେଳେ ଯାଜପୁର ଜିଲା ପ୍ରଶାସନର ବେଆଇନ ପଥର ମାଫିଆଙ୍କ ପ୍ରତି ନରମ ମନୋଭାବକୁ ନେଇ ପ୍ରଶ୍ନବାଚୀ ସୃଷ୍ଠି ହୋଇଥିଲା। ଏ ନେଇ ତଥ୍ୟ ସମ୍ବଳିତ ଖବର ଧରିତ୍ରୀରେ ଗତ ୩ ତାରିଖରେ ପ୍ରକାଶ ପାଇିବା ପରେ ଏବେ ଧର୍ମଶାଳା ତହସିଲ ସଜାଗ ହୋଇଛି। ମଙ୍ଗଳବାର ଧର୍ମଶାଳା ତହସିଲଦାର ସରୋଜ କୁମାର ପଣ୍ଡା ପୋଲିସ ପ୍ରଶାସନ ସହାୟତାରେ ବିଭିନ୍ନ ସ୍ଥାନରେ ଚଢାଉକରି ବେଆଇନଭାବେ କଳାପଥର ପରିବହନ କରୁଥିବା ୨୩ ଗାଡି ଜବତ କରିଛନ୍ତି। ତହସିଲ ପକ୍ଷରୁ ପ୍ରଥମଥର କରି ସର୍ବାଧିକ ୨୩ଟି ଗାଡି ଜବତ ହୋଇଥିବାବେଳେ ଏହି ଗାଡିଗୁଡିକଠାରୁ ୫ଲକ୍ଷରୁ ଉର୍ଦ୍ଧ୍ୱ ଟଙ୍କା ଜରିମାନା ଆଦାୟ କରାଯିବ ବୋଲି ତହସିଲଦାର ସୂଚନା ଦେଇଛନ୍ତି। ତହସିଲଦାର ବେଆଇନଭାବେ ପରିବହନ ହେଉଥିବା ୫୩ନଂ ଜାତୀୟ ରାଜପଥ ଚଢେଇଧରା, ଜେନାପୁର, ମାଣ୍ଡିଆ, ବରଡା, ପାଖର ଓ ଜାତୀୟ ରାଜପଥ ୫(କ) ଶ୍ରୀରାମପୁର ଟୋଲଗେଟ୍ ନିକଟରେ ଚଢାଉକରି ୧୬ଟି ହାଇୱା, ୫ ଟିପ୍ପର, ୨ ଟ୍ରକ୍ ଜବତ କରିଥିଲେ। ଚଢାଉରେ ଧର୍ମଶାଳା ତହସିଲଦାର ପଣ୍ଡାଙ୍କ ସମେତ ଅତିରିକ୍ତ ତହସିଲଦାର ଦେବୀପ୍ରସାଦ ମହାନ୍ତି, ଧର୍ମଶାଳା ଥାନା ଅଧିକାରୀ ସରୋଜ ସାହୁ, ଜେନାପୁର ଥାନା ଅଧିକାରୀ ସୁଶାନ୍ତ ଦାଶ, ଆର୍ଆଇ ବିରଞ୍ଚତ୍ ବୋଇତେଇ, ଏଆରଆଇ ଚନ୍ଦନ ସାହୁ, ଜଗବନ୍ଧୁ ଜେନା ପ୍ରମୁଖ ସାମିଲ ଥିଲେ। ରବିବାର ଓ ସେମାବାର ଜବତ ହୋଇଥିବା ୮ଟି ଗାଡି ମଧ୍ୟରୁ ୪ଟି ଗାଡିଠାରୁ ୧ଲକ୍ଷ ୭୦ହଜାର ଟଙ୍କା ଜରିମାନା ଆଦାୟ ହୋଇଥିବା ଜଣାପଡିଛି। ପ୍ରକାଶ ଯେ, ଧର୍ମଶାଳା ତହସିଲର ୯୨ଟି ସଇରାତ ମଧ୍ୟରୁ ୪୬ଟି ନିଲାମ ହୋଇଥିଲାବେଳେ ଅବଶିଷ୍ଟ ୪୬ଟି ନିଲାମ ହୋଇନାହିଁ। ଏହାର ସୁଯୋଗ ନେଇ ପଥର ମାଫିଆମାନେ ପ୍ରତ୍ୟେହ ବିଭିନ୍ନ ମେସିନ୍ ସାହାଯ୍ୟରେ ନିଲାମ ହୋଇ ନ ଥିବା ସଇରାତଗୁଡିକରୁ ପଥର ଭାଙ୍ଗି ଚୋରାରେ ଚାଲାଣ କରୁଛନ୍ତି। ଫଳରେ ବହୁ ରାଜସ୍ବହାନୀ ହେଉଛି।
