ଢେଙ୍କାନାଳ ଅଫିସ, ୪।୮-ଢେଙ୍କାନାଳ ଜିଲା ଓଡ଼ାପଡ଼ା ବ୍ଲକ କୁରୁଣ୍ଟି ଗ୍ରାମର ସୁବ୍ରତ କୁମାର ସାମଲ ୧ ମିନିଟରେ ୩୩୪ ଥର ଡମ୍ବେଲ ପଞ୍ଚ ମାରି ବଜ୍ର ଓ୍ବାଲର୍ଡ ରେକର୍ଡରେ ନିଜ ନାମକୁ ସାମିଲ କରିଛନ୍ତି। ଆଗାମୀ ଦିନରେ ସେ ଗିନିଜ୍ ବୁକ୍ ଅଫ୍ ଓ୍ବାଲର୍ଡ ରେକର୍ଡରେ ସ୍ଥାନ ପାଇବାକୁ ଲକ୍ଷ୍ୟ ରଖିଛନ୍ତି। ଏହି ସଫଳତା ପାଇଁ ଜିଲାପାଳ ଭୂମେଶ ଚନ୍ଦ୍ର ବେହେରା ତାଙ୍କୁ ଶୁଭେଚ୍ଛା ଜଣାଇଛନ୍ତି।
ସୁବ୍ରତ ନିଜ ପ୍ରତିକ୍ରିୟାରେ କୁହନ୍ତି, ଏଭରେଷ୍ଟ ବିଜୟିନୀ କଳ୍ପନା ଦାଶ ହେଉଛନ୍ତି ତାଙ୍କର ପ୍ରେରଣା। ଏହି ସଫଳତା ପଛରେ ମା’ ଛନ୍ଦା ସାମନ୍ତସିଂହାର, ପିତା ବିଦ୍ୟାଧର ସାମଲଙ୍କ ଆଶୀର୍ବାଦ ରହିଛି। ସେ ଏବେ ଭୁବନେଶ୍ୱର ହାଇଟେକ୍ ମେଡିକାଲ ଆଣ୍ଡ୍ ହସ୍ପିଟାଲର ବିଡିଏସ୍ ବିଭାଗରେ ଅଧ୍ୟୟନ କରୁଛନ୍ତି। ଗତବର୍ଷ ଦାର୍ଜିଲିଂରେ ସେ ପର୍ବତାରୋହଣ ଶିକ୍ଷା ଗ୍ରହଣ କରିଛନ୍ତି। ଏଥିସହ ୧୦୦ମିଟର ଜାତୀୟ ଡାକ୍ତର ବିଦ୍ୟାର୍ଥୀ ଦୌଡ ପ୍ରତିଯୋଗିତାରେ ସେ ପ୍ରଥମ ସ୍ଥାନ ଅଧିକାର କରିଥିବା କହିଛନ୍ତି।
