ବଇଣ୍ଡା,୨୨।୯(ଡି.ଏନ.ଏ.)-ଅନୁଗୋଳ ଜିଲା ଆଠମଲ୍ଲିକ ବ୍ଲକ ଠାକୁରଗଡ଼ ପ୍ରାଥମିକ ସ୍ବାସ୍ଥ୍ୟକେନ୍ଦ୍ରରେ ଦୀର୍ଘଦିନ ଧରି ଡାକ୍ତର ପଦବୀ ଖାଲି ପଡ଼ିଛି। ଫଳରେ ସ୍ବାସ୍ଥ୍ୟସେବା ବିପର୍ଯ୍ୟସ୍ତ ହୋଇପଡ଼ିଛି। ବାରମ୍ବାର ଦାବି କରାଯାଉଥିଲେ ମଧ୍ୟ ପୁରଣ କରାଯାଉ ନ ଥିବା ଯୋଗୁ ସ୍ଥାନୀୟ ଅଞ୍ଚଳବାସୀଙ୍କ ମଧ୍ୟରେ ଅସନ୍ତୋଷ ଦେଖାଦେଇଛି। ଡାକ୍ତର ନିଯୁକ୍ତି କରା ନ ଗଲେ ଆଗାମୀ ଦିନରେ ଆନ୍ଦୋଳନ କରାଯିବ ବୋଲି ଭାଜପା ପକ୍ଷରୁ ଚେତାବନୀ ଦିଆଯାଇଛି। ଏ ନେଇ ଭାଜପା ପକ୍ଷରୁ ଶୁକ୍ରବାର ଠାକୁରଗଡ଼ ହନୁମାନ ମନ୍ଦିରଠାରେ ଅନୁଷ୍ଠିତ ବୈଠକରେ ନିଷ୍ପତ୍ତି ନିଆଯାଇଛି। ମଣ୍ଡଳ ସଭାପତି ଅର୍ଜୁନ ସାହୁଙ୍କ ସଭାପତିତ୍ୱରେ ଅନୁଷ୍ଠିତ ବୈଠକରେ ଭାଜପା ଜିଲା ସଭାପତି ଭାଗିରଥୀ ପ୍ରଧାନ, ସୁଜିତ ଦେହୁରି, ରବିନ୍ଦ୍ର ବେହେରା, ମାନସ ସାହୁ, କୈଳାସ ସାହୁ ପ୍ରମୁଖ ଯୋଗ ଦେଇଥିଲେ। ଡାକ୍ତର ନ ଥିବା ଯୋଗୁ ରୋଗୀମାନଙ୍କୁ ଚିକିତ୍ସା ମିଳୁ ନ ଥିବା ଅଭିଯୋଗ ହୋଇଥିଲା। ପରେ ଏ ନେଇ ଏକ ଦାବିପତ୍ର ଆଠମଲ୍ଲିକ ଉପଜିଲାପାଳ, ଅନୁଗୋଳ ଜିଲା ମୁଖ୍ୟ ଚିକିତ୍ସାଧିକାରୀଙ୍କୁ ପ୍ରଦାନ କରାଯାଇଛି।
ଦାବିପତ୍ରରେ ଉଲ୍ଲେଖ କରାଯାଇଛି, ଏହି ସ୍ବାସ୍ଥ୍ୟକେନ୍ଦ୍ର ଉପରେ ଠାକୁରଗଡ଼, ଆମ୍ବଶରମୁଣ୍ଡା, ମଇମୁରା, କନ୍ତପଡ଼ା, ଟାପଢୋଲ, ସାନହୁଲା, କୁର୍ତ୍ତିବାସପୁର, କୁରୁମଟାପ ଆଦି ୮ଟି ପଞ୍ଚାୟତର ୩୦ ହଜାର ଲୋକ ଚିକିତ୍ସା ପାଇଁ ନିର୍ଭରଶୀଳ। ହେଲେ ଦୀର୍ଘ ୨ ବର୍ଷ ହେବ ଡାକ୍ତରଖାନାରେ ଏମ୍ବିବିଏସ ଡାକ୍ତର ପଦବୀ ଖାଲିପଡ଼ିଛି। ଫଳରେ କମ୍ପାଉଣ୍ଡର ଓ ଷ୍ଟାଫ ନର୍ସ ରୋଗୀସେବା କରୁଛନ୍ତି। ସେହିପରି ମାଗଣା ଔଷଧ ଯୋଗାଇ ଦିଆଯାଉ ନ ଥିବାବେଳେ ବାହାର ଦୋକାନରୁ ଔଷଧ କିଣି ବ୍ୟବହାର କରାଯାଉଛି। ଏହି ଅଞ୍ଚଳ ମ୍ୟାଲେରିଆ ପ୍ରବଣ ହୋଇଥିବାରୁ ସ୍ବାସ୍ଥ୍ୟକେନ୍ଦ୍ରରେ ଡାକ୍ତର ଓ ଔଷଧ ନ ଥିବା ଯୋଗୁ ସାମାନ୍ୟ ଜ୍ୱର ହେଲେ ୨୦ କି.ମି ଆଠମଲ୍ଲିକ ନଚେତ ୬୫ କି.ମି ଜିଲା ମୁଖ୍ୟ ଚିକିତ୍ସାଳୟରେ ନିର୍ଭର କରୁଛନ୍ତି। ଜଙ୍ଗଲ ଅଞ୍ଚଳର ଗ୍ରାମ ଗୁଡ଼ିକୁ ଏହି ସ୍ବାସ୍ଥ୍ୟକେନ୍ଦ୍ର ସେବା ଯୋଗାଇ ଦେଉଥିବାବେଳେ ଗର୍ଭବତୀ ମହିଳାମାନଙ୍କୁ ସେବା ଦିଆଯାଉ ନାହିଁ। ଏପରିକି ପ୍ରସବ ମଧ୍ୟ ଠିକ ଭାବେ କରାଯାଉ ନାହିଁ। ସ୍ବାସ୍ଥ୍ୟକେନ୍ଦ୍ରରେ ଡାକ୍ତର ନିଯୁକ୍ତି ପାଇଁ ପୂର୍ବରୁ ବହୁବାର ଜିଲା ପ୍ରଶାସନଠାରୁ ଆରମ୍ଭ କରି ରାଜ୍ୟ ସରକାରଙ୍କୁ ଅଭିଯୋଗ କଲେ ମଧ୍ୟ କୌଣସି ସୁଫଳ ମିଳୁ ନାହିଁ। ତୁରନ୍ତ ଏଥିପ୍ରତି ଦୃଷ୍ଟି ଦେବାକୁ ଭାଜପା ପକ୍ଷରୁ ଦାବି ହୋଇଛି। (ଫଟୋ-)
