ଭୁବନେଶ୍ୱର, ୨୮।୪(ବ୍ୟୁରୋ): ରାଜ୍ୟରେ କରୋନା ମୁକାବିଲା ସକାଶେ ଲକ୍ଡାଉନ ଜାରି ଥିବା ସତ୍ତ୍ୱେ ଜରୁରିକାଳୀନ ସେବାରେ ଏବଂ ମାଲ ପରିବହନରେ ନିୟୋଜିତ ଟ୍ରକ୍ଗୁଡିକ ଚଳାଚଳ କରୁଛନ୍ତି। ଏହାସହ ଆମ୍ବୁଲାନ୍ସ ଏବଂ ପାସ୍ ସଂଗ୍ରହ କରି ଜରୁରୀ କାର୍ଯ୍ୟରେ ସାମିଲ ଥିବା କେତେକ ଗାଡ଼ି ମଧ୍ୟ ଚଳପ୍ରଚଳ କରୁଛନ୍ତି। ଏସବୁକୁ ଦୃଷ୍ଟିରେ ରଖି ମୁଖ୍ୟତଃ ଟ୍ରକ୍ ଡ୍ରାଇଭରମାନଙ୍କ ଖାଇବା, ପିଇବାର ସୁବିଧା ପାଇଁ ରାଜ୍ୟ ସରକାର ସୋମବାର ରାଜ୍ୟର ୨୨୩ଟି ଢାବା ଖୋଲିବା ଲାଗି ନିର୍ଦ୍ଦେଶ ଦେଇଛନ୍ତି। ସେହିପରି ଗା଼ଡି ମରାମତି ଲାଗି ସମ୍ପୂର୍ଣ୍ଣ ରାଜ୍ୟରେ ୧୪୦ଟି ଗ୍ୟାରେଜ ଖୋଲାଯିବା ନେଇ ନିର୍ଦ୍ଦେଶ ଦେଇଛନ୍ତି। ପୁରୀରେ ୩ଟି, ଖୋର୍ଦ୍ଧାରେ ୫, ନୟାଗଡ଼ରେ ୫, ଯାଜପୁରରେ ୨, କେନ୍ଦ୍ରାପଡ଼ାରେ ୨, ଭଦ୍ରକରେ ୧, ବାଲେଶ୍ୱରରେ ୬, ମୟୂରଭଞ୍ଜରେ ୮, ଗଞ୍ଜାମରେ , ୭,ଗଜପତି ୨, କୋରାପୁଟରେ ୧୦, ରାୟଗଡ଼ା ୪, ନବରଙ୍ଗପୁର ୩, ସୁନ୍ଦରଗଡ଼ ୧୬ ଏବଂ ସମ୍ବଲପୁରରେ ୧୬ଟି ଗ୍ୟାରେଜ ଖୋଲା ରହିବ। କଟକ, ଜଗତ୍ସିଂହପୁର, ଫୁଲବାଣୀରେ କୌଣସି ଗ୍ୟାରେଜ ଖୋଲା ରହିବନାହିଁ। ସେହିପରି ଝାରସୁଗୁଡ଼ା, ଫୁଲବାଣୀ, ନବରଙ୍ଗପୁର ଏବଂ ଜଗତ୍ସିଂହପୁରକୁ ଛାଡ଼ି ଅନ୍ୟ ଜିଲାଗୁଡ଼ିକରେ କିଛିକିଛି ମିଶାଇ ମୋଟ ୨୨୩ଟି ଢାବା ଖୋଲାଯିବ। ମାତ୍ର କେନ୍ଦୁଝର ଜିଲା ଲାଗି ଢାବା ଏବଂ ଗ୍ୟାରେଜ ଖୋଲିବାକୁ କୌଣସି ନୋଟିସ ବାହାର କରାଯାଇନାହିଁ। କେବଳ ଅନୁମତିପ୍ରାପ୍ତ ଗ୍ୟାରେଜ ଏବଂ ଢାବା ଖୋଲାଯିବ ବୋଲି ସୂଚନା ଦିଆଯାଇଛି।
