ଟୋକିଓ, ୨୨।୫-କରୋନା ଭାଇରସ ସଂକ୍ରମଣଜନିତ ପ୍ରଭାବରୁ ଟୋକିଓ ଅଲିମ୍ପିକ୍ସ ୨୦୨୧କୁ ଘୁଞ୍ଚତ୍ଛି। ମାତ୍ର ଆସନ୍ତାବର୍ଷ ଯଦି ଏହା ସମ୍ଭବ ନ ହୁଏ ତେବେ ବାତିଲ ହେବ ବୋଲି ଅନ୍ତର୍ଜାତୀୟ ଅଲିମ୍ପିକ୍ କମିଟି (ଆଇଓସି) ମୁଖ୍ୟ ଥୋମାସ ବ୍ୟାକ୍ ପ୍ରକାଶ କରିଛନ୍ତି। ପରିସ୍ଥିତିକୁ ଦୃଷ୍ଟିରେ ରଖି ଜାପାନ ସରକାର ଓ ଆଇଓସି ୨୦୨୦ ଅଲିମ୍ପିକ୍ସକୁ ଏକ ବର୍ଷ ଅର୍ଥାତ୍ ୨୦୨୧କୁ ଘୁଞ୍ଚାଇବାକୁ ନିଷ୍ପତ୍ତି ନେଇଥିଲେ। ତେବେ କରୋନା ଭାଇରସ ସଂକ୍ରମଣଜନିତ ସ୍ଥିତି ନିୟନ୍ତ୍ରଣାଧୀନ ନ ହେଲେ ୨୦୨୧ରେ ଅଲିମ୍ପିକ୍ସ ସମ୍ଭବ ନୁହେଁ ବୋଲି ଜାପାନ ପ୍ରଧାନମନ୍ତ୍ରୀ ଶିନ୍ଜୋ ଆବେ କିଛିଦିନତଳେ ପ୍ରକାଶ କରିଥିଲେ। ଏହି ଭାଇରସ୍ରେ ଜାପାନରେ ୧୭,୧୦୦ ସଂକ୍ରମିତ ହୋଇଥିବା ବେଳେ ୭୯୭ ଜଣ ମୃତ୍ୟୁବରଣ କରିଛନ୍ତି। ବ୍ୟାକ୍ କହିଛନ୍ତି ଯେ, ଆମେ ପରିସ୍ଥିତିକୁ ବୁଝୁଛୁ। କାରଣ ଏପରି ସ୍ଥିତିରେ କେବେହେଲେ ଆୟୋଜକ କମିଟିରେ ୩,୦୦୦ କିମ୍ବା ୫,୦୦୦ ଲୋକଙ୍କୁ ରଖା ଯାଇ ପାରିବ ନାହିଁ। ଅନ୍ୟପକ୍ଷରେ ଆମେ କେବେହେଲେ ପ୍ରତିବର୍ଷ ବିଶ୍ୱବ୍ୟାପୀ ସମସ୍ତ ପ୍ରମୁଖ ଫେଡେରେଶନଗୁଡ଼ିିକର ସମଗ୍ର କ୍ରୀଡ଼ା କ୍ୟାଲେଣ୍ଡରକୁ ପରିବର୍ତ୍ତନ କରାଯାଇ ପାରିବନାହିଁ। ଆଥଲେଟ୍ଙ୍କ କ୍ବାରାଣ୍ଟାଇନ୍ ସମେତ ବିଭିନ୍ନ ଦୃଷ୍ଟିକୋଣକୁ ବିଚାରରେ ରଖି ଆଇଓସି ଆସନ୍ତାବର୍ଷ ଅଲିମ୍ପିକ୍ସ ଆୟୋଜନ କରିବାକୁ ପ୍ରତିଶ୍ରୁତିବଦ୍ଧ। ଏ ସବୁ କାର୍ଯ୍ୟ ଅଲିମ୍ପିକ୍ସ ଭିଲେଜରେ ହିଁ ଅନୁଷ୍ଠିତ ହେବ। ସମ୍ପୂର୍ଣ୍ଣ ଦୃଶ୍ୟପଟକୁ ବିଚାରରେ ରଖି ବିଭିନ୍ନ ବିକଳ୍ପକଥା ଚିନ୍ତା କରାଯାଉଛି। ଏହାକୁ ବର୍ତ୍ତମାନ ପ୍ରକାଶ କରାଯିବା ସମ୍ଭବ ନୁହେଁ ବୋଲି ବ୍ୟାକ୍ କହିଛନ୍ତି। ୨୦୨୧ ଜୁଲାଇ ୨୩ ବେଳକୁ ସମ୍ପୂର୍ଣ୍ଣ ବିଶ୍ୱର ସ୍ଥିତି କିପରିଥିବ ଏହାକୁ ଦୃଷ୍ଟିରେ ରଖି ଆମେ ଉପଯୁକ୍ତ ନିଷ୍ପତ୍ତି ନେବୁ ବୋଲି ସେ ପ୍ରକାଶ କରିଛନ୍ତି।
