ଖ୍ରୀଷ୍ଟଚର୍ଚ୍ଚ, ୧୬ା୫ (ପି.ଟି.)-ପେସ୍ ବୋଲର କାଇଲ ଜେମିସନ ନ୍ୟୁଜିଲାଣ୍ଡ କ୍ରିକେଟ (ଏନ୍ଜେଡ୍ସି) ୨୦୨୦-୨୧ ସିଜନ ପାଇଁ ସେଣ୍ଟ୍ରାଲ କଣ୍ଟ୍ରାକ୍ଟ ତାଲିକାଭୁକ୍ତ ହୋଇଛନ୍ତି। ଚଳିତବର୍ଷ ପ୍ରାରମ୍ଭରେ ଭାରତ ବିପକ୍ଷରେ ତାଙ୍କ ପଦାର୍ପଣ ଟେଷ୍ଟ ସିରିଜରେ ତାଙ୍କ ପ୍ରଦର୍ଶନ ଅତ୍ୟନ୍ତ ଉଚ୍ଚକୋଟୀର ଥିଲା। ୨୫ ବର୍ଷୀୟ ଜେମିସନ ଆହୁରି ମଧ୍ୟ ଭାରତ ବିପକ୍ଷରେ ତାଙ୍କ ଅନ୍ତର୍ଜାତୀୟ ଦିନିକିଆ ପଦାର୍ପଣ କରି ମ୍ୟାନ ଅଫ୍ ଦି ମ୍ୟାଚ ବିବେଚିତ ହୋଇଥିଲେ। ହାଙ୍ଗଲେ ଓଭାଲ୍ଠାରେ ଅନୁଷ୍ଠିତ ଦ୍ୱିତୀୟ ଟେଷ୍ଟରେ ୫ ଉଇକେଟ ସଫଳତା ପାଇଁ ପ୍ଲେୟର ଅଫ୍ ଦି ମ୍ୟାଚ ବିବେଚିତ ହୋଇଥିଲେ। ବିରାଟ କୋହଲି ଦଳ ବିପକ୍ଷ ଦୁଇଟି ଟେଷ୍ଟ ମ୍ୟାଚରେ ଜେମିସନ ଓଭରାଲ ୯ ଉଇକେଟ ଦଖଲ କରିବା ସହ ବ୍ୟାଟିଂରେ ତାଙ୍କର ଆଭରେଜ ୪୬ ରନ ରହିଥିଲା। ଶକ୍ତିଶାଳୀ ଭାରତ ବିପକ୍ଷରେ ଏହି ପ୍ରଦର୍ଶନରୁ ସୂଚିତ ହେଉଛି ଯେ, ଜେମିସନଙ୍କ ଭବିଷ୍ୟତ ଉଜ୍ଜ୍ୱଳ ବୋଲି ସିଲେକ୍ସନ ମ୍ୟାନେଜର ଗାଭିନ୍ ଲାର୍ସେନ କହିଛନ୍ତି। ବାମହାତୀ ସ୍ପିନର ଆଜାଜ୍ ପଟେଲ ଏବଂ ଦକ୍ଷିଣ ଆଫ୍ରିକା ଜନ୍ମିତ ବ୍ୟାଟ୍ସମ୍ୟାନ ଡେଭନ କନଓ୍ବେ ମଧ୍ୟ ଆସନ୍ତା ଏକବର୍ଷ ଲାଗି ପ୍ରଥମ ଥର ପାଇଁ ସେଣ୍ଟ୍ରାଲ କଣ୍ଟ୍ରାକ୍ଟ ତାଲିକାରେ ସ୍ଥାନ ପାଇଛନ୍ତି।
