ଜନସେବା କେନ୍ଦ୍ର ଖୋଲିବା ପାଇଁ ଟଙ୍କା ଆଦାୟ ଅଭିଯୋଗ ତଦନ୍ତ ନିର୍ଦ୍ଦେଶ ଦେଲେ ଅତିରିକ୍ତ ଜିଲାପାଳ
7:05 amDecember 3, 2019 / 21

ଛତ୍ରପୁର,୩ା୧୨(ଡି.ଏନ.ଏ)-ଗଞ୍ଜାମ ଜିଲାରେ ଜନସେବା କେନ୍ଦ୍ର ଖୋଲିବା ପାଇଁ ମଞ୍ଜୁରୀ ଦେବାରେ ଅନିୟମିତତା ହୋଇଥିବା ଅଭିଯୋଗ ହୋଇଛି ା ଏପରିକି କେତେଜଣ ବ୍ୟକ୍ତିଙ୍କ ନାଁରେ ଜନସେବା କେନ୍ଦ୍ର କରିଦେବା ନେଇ ଅର୍ଥ କାରବାର ହୋଇଥିବା ଗଞ୍ଜାମ ଭିଏଲଇ ସୋସାଇଟି ପକ୍ଷରୁ ଅଭିଯୋଗ କରାଯାଇଛି ା ଏହି କାରବାରରେ ଗଞ୍ଜାମ ଜିଲାପାଳଙ୍କ କାର୍ଯ୍ୟାଳୟର ଜିଲା ଇ-ଗଭର୍ନାନ୍ସର ଜଣେ ଅଧିକାରୀ ସମ୍ପୃକ୍ତ ଥିବା ଅଭିଯୋଗ ହୋଇଛି। ଉକ୍ତ ଅଧିକାରୀଙ୍କ ବ୍ୟାଙ୍କ ଆକାଉଣ୍ଟକୁ ୪ଥର ଟଙ୍କା ଟ୍ରାନ୍ସଫର କରାଯାଇଛି ା ପ୍ରତି ପଞ୍ଚାୟତରେ ଗୋଟିଏ ଜନସେବା କେନ୍ଦ୍ର ଖୋଲିବା ନିୟମ ରହିଥିବା ବେଳେ ୨ରୁ ୩ଟି କେନ୍ଦ୍ର ଖୋଲିବାକୁ ଅନୁମତି ଦିଆଯାଇଛି ା ସୋମବାର ଏ ନେଇ ସମସ୍ତ ଟଙ୍କା ଦେଣ ସମ୍ବନ୍ଧୀୟ ପ୍ରମାଣପତ୍ରର ନକଲ ସହ ଅତିରିକ୍ତ ଜିଲାପାଳ ଲକ୍ଷ୍ମୀକାନ୍ତ ସେଠୀଙ୍କୁ ଭେଟି ଅଭିଯୋଗ କରାଯାଇଛି ା ଏହି ଅନିୟମିତତାର ତଦନ୍ତ ସହ ମଧ୍ୟବର୍ତ୍ତୀ ଚୁକ୍ତି ବନ୍ଦ କରିବା ପାଇଁ ଦାବି ହୋଇଛି ା କେତେଜଣ ଅଯୋଗ୍ୟ ବ୍ୟକ୍ତିଙ୍କୁ ମଧ୍ୟ ଜିଲାରେ ଜନସେବା କେନ୍ଦ୍ର ଖୋଲିବା ପାଇଁ ଅନୁମତି ଦିଆଯାଇଥିବା ଅଭିଯୋଗ ହୋଇଛି ା ବେଆଇନ୍‌ ଭାବେ ହ୍ବାଟସ୍‌ଆପ୍‌ ଗ୍ରୁପ୍‌ କରି ଗତ ଅଗଷ୍ଟ ୧୪ ତାରିଖରେ ବିଭିନ୍ନ ପଞ୍ଚାୟତ ଏବଂ ଏନଏସିରେ ସିଏସସି ଖୋଲିବା ପାଇଁ ବିଜ୍ଞାପନ ବାହାରିଥିଲା ା ଏଥିରେ ଜିଲାରୁ ୫୮୭ ଜଣ ଆବେଦନ କରିଥିବା ବେଳେ ୩୪୫ ଜଣ ସିଏସସି ପାଇଁ ମନୋନୀତ ହୋଇଥିଲେ ା ମନୋନୀତ ହୋଇଥିବା ୩୪୫ ଜଣଙ୍କ କାଗଜପତ୍ର ଯାଞ୍ଚ କରିବାକୁ ଦାବି କରାଯାଇଥିଲା ା ଛତ୍ରପୁର ଏନଏଏସିରେ ମଧ୍ୟ ସିଏସସି ପାଇଁ ମିଳିଥିବା ଲୋକଙ୍କ କାଗଜପତ୍ର ଉପରେ ତଦନ୍ତ କରିବାକୁ ଅନୁରୋଧ କରାଯାଇଥିଲା। ଏହାର ତଦନ୍ତ ଡେପୁଟି କଲେକ୍ଟର (ଜୁଡିସିଆଲ) କରିବେ ବୋଲି ଅତିରିକ୍ତ ଜିଲାପାଳ କହିଛନ୍ତି।