ବାଲେଶ୍ୱର ଅଫିସ, ୧।୧୦-ବାଲେଶ୍ୱର ଜିଲା ମୁଖ୍ୟ ଚିକିତ୍ସାଳୟ ପରିସରରେ ଥିବା ମହିଳା ସ୍ବାସ୍ଥ୍ୟକର୍ମୀ ତାଲିମ କେନ୍ଦ୍ରର ଛାତ୍ରାବାସ କୋଠାରୁ ସୋମବାର ମଧ୍ୟାହ୍ନରେ କଂକ୍ରିଟ୍ ଖଣ୍ଡ ଖସି ପଡିଥିଲା। ଏଥିରେ ଜଣେ ଛାତ୍ରୀ ଗୁରୁତର ଭାବେ ଆହତ ହୋଇଛନ୍ତି। ଏହାର ପ୍ରତିବାଦ କରି ଅନ୍ୟ ନର୍ସିଂ ଛାତ୍ରୀମାନେ ଜିଲା ମୁଖ୍ୟ ଚିକିତ୍ସାଧିକାରୀ ଡା. ବାନାର୍ଜୀ ପ୍ରସାଦ ଛୋଟରାୟଙ୍କ ଅଫିସ୍ ଘେରାଉ କରିଥିଲେ। ଦୀର୍ଘ ୩/୪ ଘଣ୍ଟା ପରେ ଜିଲା ପ୍ରଶାସନ ହସ୍ତକ୍ଷେପ କରି ଦୁର୍ଗା ପୂଜା ଛୁଟି ଭିତରେ ଉକ୍ତ କୋଠା ସମ୍ପୂର୍ଣ୍ଣ ମରାମତି କରିବାର ପ୍ରତିଶ୍ରୁତି ଦେବା ପରେ ଆନ୍ଦୋଳନ ପ୍ରତ୍ୟାହାର ହୋଇଛି।
ଛାତ୍ରୀମାନେ ଅଭିଯୋଗ କରିଛନ୍ତି ଯେ, ୧୯୫୯ ମସିହାରେ ମହିଳା ସ୍ବାସ୍ଥ୍ୟକର୍ମୀ ତାଲିମ କେନ୍ଦ୍ର ତିଆରି ହୋଇଥିଲା। କିଛିବର୍ଷ ହେଲା ଛାତରୁ ସିମେଣ୍ଟ, ବାଲି ଖଣ୍ଡ ଖସି ଏହା ଅସୁରକ୍ଷିତ ହୋଇପଡ଼ିଛି। ଏପରିକି ବର୍ଷା ସମୟରେ ଘର ଭିତରେ ପାଣି ପଶି ଯାଉଥିବାରୁ ହଇରାଣ ହରକତ ହେବାକୁ ପଡୁଛି। ଛାତ୍ରୀମାନେ ବାରମ୍ବାର ବିଭାଗୀୟ ଅଧିକାରୀ ତଥା ଜିଲା ପ୍ରଶାସନଙ୍କୁ ଅଭିଯୋଗ କରିଥିଲେ ମଧ୍ୟ କୌଣସି ସୁଫଳ ମିଳି ନାହିଁ। ଛାତ୍ରୀ ସୁକାନ୍ତି ବିନ୍ଧାଣୀ ସୋମବାର ମଧ୍ୟାହ୍ନରେ ଶୌଚାଳୟ ଯାଇଥିବା ବେଳେ ହଠାତ୍ ଛାତରୁ ସିମେଣ୍ଟ, ବାଲି ଖଣ୍ଡ ଖସିଥିଲା। ଏହି କଂକ୍ରିଟ ଖଣ୍ଡ ତାଙ୍କ ଉପରେ ପଡ଼ିବାରୁ ସେ ଗୁରୁତର ହୋଇଥିଲେ। ସଙ୍ଗେ ସଙ୍ଗେ ଅନ୍ୟ ଛାତ୍ରୀମାନେ ତାଙ୍କୁ ଉଦ୍ଧାର କରି ଜିଲା ମୁଖ୍ୟ ଚିକିତ୍ସାଳୟରେ ଭର୍ତ୍ତି କରାଇଥିଲେ। ପରେ ଉତ୍ତ୍ୟକ୍ତ ଛାତ୍ରୀମାନେ ଜିଲା ମୁଖ୍ୟ ଚିକିତ୍ସାଧିକାରୀ ଡା. ଛୋଟରାୟଙ୍କ ଅଫିସ୍ ଘେରାଉ କରିବା ସହ ଏହାର ପୁନରୁଦ୍ଧାର ପାଇଁ ଦାବି କରିଥିଲେ।
