ପୁରୀ ଅଫିସ, ୨୮।୭: ପ୍ଲାଷ୍ଟିକ ଓ ପଲିଥିନର ବହୁଳ ବ୍ୟବହାର ମଣିଷ ପାଇଁ ମାରାତ୍ମକ ସାବ୍ୟସ୍ତ ହେଲାଣି। ପରିବେଶ ଲାଗି ମଧ୍ୟ ଏହା ଘାତକ ପାଲଟିଛି। ଏଗୁଡ଼ିକର ବହୁଳ ବ୍ୟବହାର ଫଳରେ ମାଟିର ଉର୍ବରତା ହ୍ରାସ, ଗୃହପାଳିତ ପ୍ରାଣୀଙ୍କ ପ୍ରତି ବିପଦ, ବାୟୁ ଓ ଜଳ ପ୍ରଦୂଷଣ ବୃଦ୍ଧି ପାଉଛି। ତେଣୁ ପ୍ଲାଷ୍ଟିକ ଓ ପଲିଥିନ ବ୍ୟବହାର ଉପରେ କଟକଣା ଲଗାଇଛନ୍ତି ସରକାର। ରାଜ୍ୟ ସରକାର ପ୍ରାଥମିକ ପର୍ଯ୍ୟାୟରେ ୫ଟି ମହାନଗର ନିଗମ ସମେତ ପର୍ଯ୍ୟଟନ ସହର ପୁରୀରେ ପ୍ଲାଷ୍ଟିକ ଓ ପଲିଥିନ ବ୍ୟବହାରକୁ ନିଷିଦ୍ଧ କରିଛନ୍ତି। ଗତବର୍ଷ ଗାନ୍ଧୀ ଜୟନ୍ତୀଠାରୁ ଏହି କଟକଣା ଲାଗୁ ହୋଇଛି। ତେବେ ପୁରୀରେ ଏହା ଏକପ୍ରକାର ପ୍ରହସନ ପାଲଟିଛି। ଶ୍ରୀମନ୍ଦିର ଆନନ୍ଦବଜାରରେ ବି ଏହି କଟକଣାକୁ ଉଲ୍ଲଂଘନ କରାଯାଉଛି। ଏ ପର୍ଯ୍ୟନ୍ତ ପଲିଥିନମୁକ୍ତ ହୋଇପାରିନି ଆନନ୍ଦ ବଜାର। ପ୍ରଶାସନିକ ଅଧିକାରୀମାନେ ପ୍ଲାଷ୍ଟିକ, ପଲିଥିନ ହଟାଇବାକୁ ଚିନ୍ତା କରି ବାରମ୍ବାର ବୈଠକ କରୁଛନ୍ତି। ହେଲେ ଉପଯୁକ୍ତ ତଦାରଖ ଅଭାବରୁ ପଲିଥିନ ବ୍ୟବହାର ଉପରେ ଏ ପର୍ଯ୍ୟନ୍ତ ରୋକ୍ ଲାଗିପାରିନାହିଁ। ରାଜ୍ୟ ସରକାରଙ୍କ କଟକଣା ପରେ ପୁରୀ ଜିଲା ପ୍ରଶାସନ ପକ୍ଷରୁ ଧରପଗଡ଼ ଜୋରଦାର ହେଲା। ମାତ୍ର ଏବେ ଯଥା ପୂର୍ବ ତଥା ପରଂ। ବିଭିନ୍ନ ଦୋକାନ, ହୋଟେଲ, ବିବାହ ବ୍ରତ, ମେଳା ମହୋତ୍ସବ ସବୁଠି ପଲିଥିନ ଓ ପାଣିବୋତଲ ବ୍ୟବହାର ହେଉଛି। ସେହିପରି ଆନନ୍ଦବଜାରରେ ପଲିଥିନ ବ୍ୟବହାର କରାଯିବନାହିଁ ବୋଲି ଶ୍ରୀମନ୍ଦିର ପ୍ରଶାସନ ପକ୍ଷରୁ ନିଷ୍ପତ୍ତି ନିଆଯାଇଥିଲା। ଏ ସଂକ୍ରାନ୍ତରେ ସୁଆର ମହାସୁଆର ସେବକ ମାନଙ୍କୁ ସଚେତନ କରାଯାଇଥିଲା। ପୂର୍ବରୁ ପଲିଥିନ ତଳେ ବସି ମହାପ୍ରସାଦ ବିକ୍ରି କରାଯାଉଥିଲା। ଆନନ୍ଦବଜାରକୁ ପଲିଥିନମୁକ୍ତ କରିବା ଲାଗି ପ୍ରଶାସନ ପକ୍ଷରୁ ଶେଡ୍ ତିଆରି କରାଗଲା। ଏହି ଶେଡ୍ ତଳେ ବସି ସୁଆର ସେବକମାନେ ମହାପ୍ରସାଦ ବିକ୍ରି କରୁଛନ୍ତି। କିନ୍ତୁ ଆନନ୍ଦବଜାରରେ ଥିବା ଶୁଖିଲା ଭୋଗ ଦୋକାନରେ ଏବେ ବି ପଲିଥିନର ବହୁଳ ବ୍ୟବହାର କରାଯାଉଛି। ଭକ୍ତମାନଙ୍କୁ ପଲିଥିନରେ ଭୋଗ ଦିଆଯାଉଛି।
ପ୍ରଶାସନିକ ଅଧିକାରୀମାନେ ପଲିଥିନ ଓ ପ୍ଲାଷ୍ଟିକ ବ୍ୟବହାର ନ କରିବାକୁ ପରାମର୍ଶ ଦେଉଛନ୍ତି। ମାତ୍ର ଏହା କିପରି ସମ୍ପୂର୍ଣ୍ଣ ବନ୍ଦ ହେବ ସେ ନେଇ ତଦାରଖ କରୁନାହାନ୍ତି। କୌଣସି ସରକାରୀ କାର୍ଯ୍ୟାଳୟରେ ପ୍ଲାଷ୍ଟିକ ବ୍ୟବହାର ହୋଇପାରିବ ନାହିଁ ବୋଲି ଜିଲାପାଳ ବଲୱନ୍ତ ସିଂ ନିର୍ଦ୍ଦେଶ ଜାରି କରିଛନ୍ତି। ଏପରି କି ସରକାରୀ ବୈଠକରେ ପ୍ଲାଷ୍ଟିକ ବୋତଲ, ଗ୍ଲାସ, କପ୍ ଓ ଥର୍ମୋକୁଲ ପରିବର୍ତ୍ତେ କାଗଜ ତିଆରି ଗ୍ଲାସ, କାଚ କିମ୍ବା ଷ୍ଟିଲ ଗ୍ଲାସ ବ୍ୟବହାର ପାଇଁ ସରକାରୀ ଅଧିକାରୀଙ୍କୁ ନିର୍ଦ୍ଦେଶ ଦେଇଛନ୍ତି। ଏହା ସ୍ବାଗତଯୋଗ୍ୟ। କିନ୍ତୁ ଖୋଦ୍ ଜିଲାପାଳ ଶ୍ରୀମନ୍ଦିରର ଉପମୁଖ୍ୟ ପ୍ରଶାସକ ଥାଇ ମଧ୍ୟ ଆନନ୍ଦ ବଜାରକୁ ପଲିଥିନମୁକ୍ତ କରି ନ ପାରିବା ପ୍ରଶାସନର ଆନ୍ତରିକତା ପ୍ରତି ପ୍ରଶ୍ନବାଚୀ ସୃଷ୍ଟି କରିଛି। ଶ୍ରୀମନ୍ଦିର ଭଳି ପବିତ୍ର ସ୍ଥଳକୁ ପଲିଥିନମୁକ୍ତ କରି ଏହି ବାର୍ତ୍ତା ଅନ୍ୟମାନଙ୍କୁ ଦେବା ଦରକାର ବୋଲି ନୟାଗଡ଼ ଗଣିଆର ସୁବୋଧ ମହାପାତ୍ର କହିଛନ୍ତି। କେବଳ ସଭା ସମିତିରେ କହିଦେଲେ ହେବ ନାହିଁ, ବାରମ୍ବାର ଏହାର ତଦାରଖ କରାଗଲେ ପୁରୀ ସହର ସର୍ବୋପରି ଆନନ୍ଦବଜାରକୁ ପଲିଥିନମୁକ୍ତ କରାଯାଇପାରିବ ବୋଲି ସେ ମତ ଦେଇଛନ୍ତି।
