ମାର୍ଶାଘାଇ, ୨୭।୪ (ଡି.ଏନ୍.ଏ.)-କୋରୋନ ଭୂତାଣୁ ସଂକ୍ରମଣ ରୋକିବା ପାଇଁ ଦେଶବ୍ୟାପୀ ଲକ୍ଡାଉନ୍ କରାଯିବା ଯୋଗୁ ଚାଷ କାର୍ଯ୍ୟ ବାଧାପ୍ରାନ୍ତ ହୋଇଥିବା ବେଳେ ଏବେ ଅଦିନିଆ ବର୍ଷା ଚାଷୀଙ୍କ ନିଦ ହଜାଇ ଦେଇଛି। ଲକ୍ଡାଉନ୍ ଯୋଗୁ ପନିପରିବା ବିକ୍ରି ଉପରେ ପ୍ରଭାବ ପଡ଼ିଥିବା ବେଳେ ଖରାଦିନିଆ ଫସଲ ବିକ୍ରି ମଧ୍ୟ ବହୁମାତ୍ରାରେ ପ୍ରଭାବିତ ହୋଇଛି। ତେବେ ଦ୍ୱିତୀୟ ପର୍ଯ୍ୟନ୍ତ ଲକ୍ଡାଉନ୍ ଚାଲିବାର କିଛି ଦିନ ପରେ ସରକାର ଚାଷ କାର୍ଯ୍ୟ କରିବାକୁ ଅନୁମତି ପ୍ରଦାନ କରିଥିବା ବେଳେ କାଳ ବୈଶାଖି ଓ ଲଗାଣ ବର୍ଷା ଚାଷୀଙ୍କ ମୁଣ୍ଡ ବିନ୍ଧାର କାରଣ ପାଲଟିଛି। ଗତବର୍ଷ ଫନୀ ସାମୁଦ୍ରିକ ଝଡ଼ ଯୋଗୁ ଚାଷୀମାନେ ବହୁ କ୍ଷତି ସହିଥିବା ଚଳିତବର୍ଷ କରୋନା ଓ ବର୍ଷା ଚାଷ କାର୍ଯ୍ୟରେ ବାଧା ଉପୁଯାଇଛି।
ମାର୍ଶାଘାଇ ବ୍ଲକର ମାର୍ଶାଘାଇ, ଦୁମୁକା, ତାଳସଙ୍ଗା, ବେରୁହାଁ, ମଙ୍ଗରାଜପୁର, ଗରଜଙ୍ଗା, ହିନ୍ଦୁଳିଆ ଆଦି ପଞ୍ଚାୟତର ଚାଷୀମାନେ ପ୍ରାୟ ୩୫ଶହ ହେକ୍ଟର ଚାଷ ଜମିରେ ମୁଗ ଓ ବିରି ଆଦି ଡାଲି ଜାତୀୟ ଫସଲ ଚାଷ କରିଥିଲେ। କିନ୍ତୁ ପ୍ରାକୃତିକ ଦୁର୍ବିପାକ ଯୋଗୁ ସମସ୍ତ ଫସଲ ନଷ୍ଟ ହୋଇଥିବାରୁ ଚାଷୀଙ୍କ ମନୋବଳ ଭାଙ୍ଗି ଯାଇଛି। ଫସଲ ଅମଳ ହେବାର ଦିନ କେଇଟା ପୂର୍ବରୁ ଲକ୍ଡାଉନ୍ ଆରମ୍ଭ ହୋଇଥିବାରୁ ଫସଲ ଅମଳ ହୋଇପାରି ନ ଥିଲା। ଏବେ ଚାଷକୁ ଏକ୍ଡାଉନ୍ କଟକଣାରୁ ବାଦ୍ ଦିଆଯାଇଥିଲେ ବି ଲଗାଣ ବର୍ଷା ଯୋଗୁ ଏ ବର୍ଷ ବି ରବି ଫସଲ ସମ୍ପୂର୍ଣ୍ଣ ଉଜୁଡ଼ି ଯିବା ଆଶଙ୍କା ପ୍ରକାଶ ପାଇଛି ବୋଲି ଚାଷୀମାନେ କହିଛନ୍ତି। ମାତ୍ର ୧୦ ଭାଗ ଚାଷୀ ବିଲରୁ ମୁଗ ଖଳାକୁ ଆଣିଥିବା ବେଳେ ଅନ୍ୟ ଚାଷୀଙ୍କ କିଆରିରେ ପାଣି ଜମି ମୁଗ ଗଜା ହେବାକୁ ବସିଲାଣି। ଅନ୍ୟପଟେ ଅଦିନିଆ ବର୍ଷା ଯୋଗୁ ମୁଗ ବିଲରେ କାଳମୁଣ୍ଡି ପୋକ ଲାଗି ଫସଲ ନଷ୍ଟ କରୁଥିବା ବେଳେ ଏବେ ବର୍ଷା ଯୋଗୁ ବିଲରେ ପାଣି ଭର୍ତ୍ତି ହୋଇରହିଛି। ଏଭଳି ସ୍ଥିତିରେ ମୁଗ ଅମଳ କରିବା ସମ୍ଭବ ନୁହେଁ ବୋଲି ଚାଷୀମାନେ କହିଛନ୍ତି। ପ୍ରଶାସନ ପକ୍ଷରୁ ଚାଷୀଙ୍କ କ୍ଷୟକ୍ଷତି ଆକଳନ କରାଯିବା ସହ ସରକାରୀ ସହାୟତା ଯୋଗାଇଦେବାକୁ ଚାଷୀମାନେ ଦାବି କରିଛନ୍ତି। ଏ ସମ୍ପର୍କରେ ଜିଲା କୃଷି ଅଧିକାରୀ ଶାରଦା ମିଶ୍ରଙ୍କୁ ପଚାରିବାରେ ଚାଷୀମାନେ ବହୁ କ୍ଷତିଗ୍ରସ୍ତ ହୋଇଛନ୍ତି। କ୍ଷୟକ୍ଷତି ଆକଳନ କରାଯାଇ ଚାଷୀଙ୍କୁ ସହାୟତା ଯୋଗାଇ ଦିଆଯିବା ବ୍ୟବସ୍ଥା କରାଯିବ ବୋଲି କହିଛନ୍ତି।
