କୋଲକାତା, ୯ା୬ (ପି.ଟି.)-ହ୍ବାଇଟ୍ ବଲ୍ କ୍ରିକେଟରେ ଭାରତୀୟ କ୍ରିକେଟ ଦଳରେ ୪ ନମ୍ବର ସ୍ଥାନ କିଏ ପୂରଣ କରିବା ସେ ନେଇ ଦୀର୍ଘ ଦିନ ହେଲା ବିତର୍କ ଚାଲିଥିଲା। ଏହି ସ୍ଥାନ ବୋଧହୁଏ ମୁଁ ପକ୍କା କରିସାରିଛି ବୋଲି କହିଛନ୍ତି ପ୍ରତିଭାସମ୍ପନ୍ନ ବ୍ୟାଟ୍ସମ୍ୟାନ ଶ୍ରେୟାସ ଆୟାର। ବ୍ୟାଟିଂ ଅର୍ଡରରେ ଚାରି ନମ୍ବର ସ୍ଥାନ ପାଇଁ ଅମ୍ବାଟି ରାୟୁଡୁ, ବିଜୟ ଶଙ୍କର, ରିଷଭ ପନ୍ତ ଏପରିକି ଏମ୍.ଏସ୍. ଧୋନୀଙ୍କୁ ନେଇ ପରୀକ୍ଷା କରାଯାଇଛି। ହେଲେ କେହି ଏହି ସ୍ଥାନ ପକ୍କା କରି ପାରି ନ ଥିଲେ। ବିଶ୍ୱକପ୍ରେ ନ୍ୟୁଜିଲାଣ୍ଡ ବିପକ୍ଷ ସେମିଫାଇନାଲରେ ପରାଜୟ ପରେ ଏହି ମୁମ୍ବାଇ ୟଙ୍ଗଷ୍ଟରଙ୍କୁ ଓ୍ବେଷ୍ଟଇଣ୍ଡିଜ ଟୁର୍ ପାଇଁ ଡାକରା ଆସିଥିଲା। ସିରିଜରେ ସେ ପ୍ରଭାବୀ ପ୍ରଦର୍ଶନ ମଧ୍ୟ କରିଥିଲେ। ପରେ ଚଳିତ ବର୍ଷ ପ୍ରଥମ ଭାଗରେ ନ୍ୟୁଜିଲାଣ୍ଡରେ ଏହି ୨୫ବର୍ଷୀୟ ବ୍ୟାଟ୍ସମ୍ୟାନଙ୍କ ପ୍ରଦର୍ଶନ ଉଲ୍ଲେଖନୀୟ ଥିଲା। ସିରିଜରେ ସେ ଗୋଟିଏ ଶତକ ଏବଂ ଦୁଇଟି ଅର୍ଦ୍ଧଶତକ ସହ ସବୁଠାରୁ ଅଧିକ ରନ ସଂଗ୍ରହକାରୀ ଖେଳାଳି ହୋଇଥିଲେ। ଯଦି ଭାରତର ତରଫରୁ ଏକ ବର୍ଷ ଧରି ଜଣେ ଖେଳାଳି ଗୋଟିଏ ପୋଜିଶନରେ ଖେଳି ପାରିଲା ସେହି ସ୍ଥାନ ସେ ପକ୍କା କରିନେଲା ବୋଲି ବୁଝିବାକୁ ହେବ ବୋଲି ଶ୍ରେୟାସ କହିଛନ୍ତି। ଶ୍ରେୟାସ ଏହି ସରିଜରେ ମୋଟ ୨୧୭ ରନ ସ୍କୋର କରିଥିଲେ। ଏକ ୩ ମ୍ୟାଚ ବିଶିଷ୍ଟ ଦ୍ୱିପାକ୍ଷିକ ସିରିଜରେ ୪ନମ୍ବର ସ୍ଥାନରେ ଜଣେ ଭାରତୀୟ ବ୍ୟାଟ୍ସମ୍ୟାନ ଭାବେ ଏହାଥିଲା ସର୍ବାଧିକ ରନ। ୪ ନମ୍ବର ସ୍ଥାନ ପାଇଁ ବିତର୍କ ଚାଲିଥିଲା। ଏହି ସ୍ଥାନରେ ଭଲ ପ୍ରଦର୍ଶନ କରି ସ୍ଥାନ ପକ୍କା କରିବା ନିଶ୍ଚିତ ଭାବେ ସନ୍ତୋଷଜନକ ବୋଲି ଶ୍ରେୟାସ ଆଇପିଏଲ୍ ଫ୍ରାଞ୍ଚାଇଜ୍ ଦିଲ୍ଲୀ କ୍ୟାପିଟାଲ୍ସ ପକ୍ଷରୁ ଆୟୋଜିତ ଏକ ଇନଷ୍ଟାଗ୍ରାମ୍ ଚାଟ୍ରେ କହିଛନ୍ତି। ତେବେ ସେ ଟିମ୍ର ଆବଶ୍ୟକତା ଅନୁସାରେ ଯେକୌଣସି ସ୍ଥାନରେ ବ୍ୟାଟିଂ କରିବାକୁ ପ୍ରସ୍ତୁତ ଥିବା ପ୍ରକାରାନ୍ତରେ ଉଲ୍ଲେଖ କରିଛନ୍ତି।
