ଭଦ୍ରକ ଅଫିସ,୨୫।୧୨: ଭଦ୍ରକ ସହର ଚରମ୍ପାଠାରେ ଏକ ନକଲି ଏଜେନ୍ସି ଖୋଲି ନିଯୁକ୍ତି ଦେବା ନାଁରେ ଆଶାୟୀଙ୍କଠାରୁ ଅର୍ଥ ଆଦାୟ କରି ଠକେଇ ଅଭିଯୋଗରେ ଟାଉନ ଥାନା ପୋଲିସ ଉତ୍ତରପ୍ରଦେଶ ଅଞ୍ଚଳର ଜଣେ ଯୁବକଙ୍କୁ ଗିରଫ କରିଛି। ଗିରଫ ଯୁବକ ହେଲେ ଉତ୍ତରପ୍ରଦେଶର ମହମ୍ମଦ ଅସ୍ଲମ୍(୨୫)। ମହମ୍ମଦ ଅସ୍ଲମଙ୍କ ବିରୋଧରେ ଏକ ମାମଲା(ନଂ.୩୯୬/୧୯) ରୁଜୁ କରାଯାଇ ବୁଧବାର କୋର୍ଟ ଚାଲାଣ ପରେ ଜେଲ ହାଜତକୁ ପଠାଇ ଦିଆଯାଇଛି। ଏହି ଘଟଣାରେ ସମ୍ପୃକ୍ତ ଅନ୍ୟ ଦୁଇ ଯୁବକ ଫେରାର ଥିବା ଏସ୍ଡିପିଓ ସୁନୀଲ ନନ୍ଦ ଓ ଥାନାଧିକାରୀ ଚନ୍ଦନ ଘଡ଼େଇ କହିଛନ୍ତି।
ପୋଲିସ ସୂଚନା ଅନୁଯାୟୀ, ମହମ୍ମଦ ଅସ୍ଲମ ଚରମ୍ପା ଅଞ୍ଚଳରେ ଏକ ଭଡ଼ାଘର ନେଇ ନିଯୁକ୍ତି ପ୍ରଦାନକାରୀ ସଂସ୍ଥା ଖୋଲି ଆଶାୟୀଙ୍କଠାରୁ ୨୫ ଶହ ଟଙ୍କା ଲେଖାଏ ସିକ୍ୟୁରିଟି ଡିପୋଜିଟ୍ ନେଉଥିଲେ। ଏକ କମ୍ପାନୀରେ ଚାକିରି କରାଇଦେବା ପାଇଁ ସେମାନଙ୍କୁ ପ୍ରତିଶ୍ରୁତି ଦେଉଥିଲେ। ହେଲେ ଆଶାୟୀମାନଙ୍କୁ ନିଯୁକ୍ତି ନ ମିଳିବାରୁ ସ୍ଥାନୀୟ ଲୋକେ ସନ୍ଦେହ କରି ପୋଲିସକୁ ଖବର ଦେଇଥିଲେ। ଏରଡ଼ା ଗ୍ରାମର ଅରବିନ୍ଦ ପାଣିଗ୍ରାହୀ ନାମକ ଜଣେ ଯୁବକଙ୍କ ଏତଲାକୁ ଭିତ୍ତିକରି ପୋଲିସ ଅସ୍ଲମଙ୍କୁ କାବୁ କରି ପଚରାଉଚରା କରିଥିଲା। ତେବେ ସେ ଅନ୍ୟ ଏକ ନାମରେ ସେଠାରେ ଘର ଭଡ଼ା ନେଇ ଲୋକଙ୍କଠାରୁ ପ୍ରାୟ ୪ ଲକ୍ଷରୁ ଊର୍ଦ୍ଧ୍ୱ ଟଙ୍କା ଠକି ନେଇଥିବା ତଦନ୍ତ ବେଳେ ପୋଲିସ ଜାଣିବାକୁ ପାଇଛି।
