ଚାଇନା ସାମଗ୍ରୀ ବର୍ଜନ କରିବ ଭାରୋତ୍ତୋଳନ ମହାସଂଘ
6:45 amJune 23, 2020 / 21

ନୂଆଦିଲ୍ଲୀ, ୨୩ା୬ (ପି.ଟି.): ଚାଇନା ତିଆରି ସାମଗ୍ରୀ ତ୍ରୁଟିଯୁକ୍ତ ଦର୍ଶାଇ ଏହାକୁ ବର୍ଜନ କରିବ ଲାଗି ନିଷ୍ପତ୍ତି ନେଇଛି ଭାରତୀୟ ଭାରୋତ୍ତୋଳନ ମହାସଂଘ (ଆଇଡବ୍ଲ୍ୟୁଏଲ୍‌ଏଫ୍‌)। ଗତ ସପ୍ତାହରେ ଇଷ୍ଟର୍ନ ଲଦାଖରେ ଚାଇନା ସୈନ୍ୟଙ୍କ ସଂଘର୍ଷ ଘଟି ଭାରତର ୨୦ ଯବାନ ଶହୀଦ ହେବା ପରେ ମହାସଂଘ ଏହି ପଦକ୍ଷେପ ନେଇଛି। ଆଇଡବ୍ଲ୍ୟୁଏଲ୍‌ଏଫ୍‌ ଗତବର୍ଷ ଚାଇନିଜ୍‌ କମ୍ପାନୀ ‘ଜେକେସି’ରୁ ବାର୍‌ବେଲ୍ଟ ଏବଂ ଓ୍ବେଟ୍‌ ପ୍ଲେଟ ସମେତ ଚାରୋଟି ଓ୍ବେଟ୍‌ଲିଫ୍ଟିଂ ସେଟ୍‌ ମଗାଇଥିଲା। ଏଥିରେ ତ୍ରୁଟି ଥିବାରୁ ଓ୍ବେଟଲିଫ୍ଟରମାନେ ଏହାକୁ ବ୍ୟବହାର କରିପାରୁ ନାହାନ୍ତି। ମହାସଂଘର ସାଧାରଣ ସମ୍ପାଦକ ସହଦେବ ଯାଦବ କହିଛନ୍ତି, ଆମେ ଚାଇନାର ସମସ୍ତ ପ୍ରକାର ଚାଇନିଜ୍‌ ସାମଗ୍ରୀ ବର୍ଜନ କରିବା ଉଚିତ୍‌। ଚାଇନା ତିଆର କୌଣସି ସାମଗ୍ରୀ ବ୍ୟବହାର ନ କରିବା ଲାଗି ଆମେ ନିଷ୍ପତ୍ତି ନେଇଛୁ। ଆଇଡବ୍ଲ୍ୟୁଏଲ୍‌ଏଫ୍‌ ଏହାର ନିଷ୍ପତ୍ତି ସମ୍ପର୍କରେ ସ୍ପୋଟର୍‌ସ ଅଥରିଟି ଅପ୍‌ ଇଣ୍ଡିଆ (ସାଇ)କୁ ଅବଗତ କରିଛି। ଭବିଷ୍ୟତରେ ମଧ୍ୟରେ ଆମେ ଚାଇନା ସେଟ୍‌ ବ୍ୟବହାର କରିବୁ ନାହିଁ। ଭାରତ କିମ୍ବା ଅନ୍ୟ ଦେଶର କମ୍ପାନୀର ସେଟ୍‌ ମଗାଇବୁ। ଜାତୀୟ କୋଚ୍‌ ବିଜୟ ଶର୍ମା କହିଛନ୍ତି ଚଳିତ ମାସ ପ୍ରାରମ୍ଭରେ କୋଭିଡ୍‌-୧୯ ଲକ୍‌ଡାଉନ୍‌ କୋହଳ ହେବା ପରେ ଭାରୋତ୍ତୋଳକମାନେ ଯେତେବେଳେ ଟ୍ରେନିଂ ଆରମ୍ଭ କଲେ ସେତେବେଳେ ପ୍ଲେଟଗୁଡ଼ିକ ନିମ୍ନମାନର ଥିବା ଦେଖିବାକୁ ମିଳିଥିଲା। ସେଗୁଡ଼ିକୁ ବ୍ୟବହାର କରି ହେବ ନାହିଁ। କ୍ୟାମ୍ପରେ ଯୋଗ ଦେଇଥିବା ସମସ୍ତ ଓ୍ବେଟ୍‌ଲିଫ୍ଟର ଚାଇନାକୁ ବିରୋଧ କରୁଛନ୍ତି। ସେମାନେ ଟିକ୍‌ ଟକ୍‌ ଭଳି ଚାଇନିଜ୍‌ ଆପ୍‌ର ବ୍ୟବହାର ବନ୍ଦ କରିଛନ୍ତି। ଏପରିକି ଅନ୍‌ଲାଇନ୍‌ରେ କିଛି ମଗାଇଲେ ସମଗ୍ରୀଟି କେଉଁଠାରେ ତିଆରି ହୋଇଛି ତାହା ଯାଞ୍ଚ କରି ଦେଖୁଛନ୍ତି। ତେବେ ଚାଇନାରୁ କାହିଁକି ଓ୍ବେଟ୍‌ ଲିଫ୍ଟିଂ ସରଞ୍ଜାମ ମଗା ଯାଇଥିଲା ବୋଲି ପଚରାଯିବାରେ ଶର୍ମା କହିଥିଲେ ଟୋକିଓ ଅଲିମ୍ପିକ୍ସରେ ଚାଇନା ସରଞ୍ଜାମ ବ୍ୟବହାର କରିବାକୁଥିବାରୁ ଆମ ଲିଫ୍ଟରମାନେ ଯେପରି ଏଥିସହିତ ଆଗୁଆ ଅଭ୍ୟସ୍ତ ହୋଇପାରିବେ ତାହାକୁ ଦୃଷ୍ଟିରେ ରଖି ଆମେ ନିଷ୍ପତ୍ତି ନେଇଥିଲୁ। ଅଲିମ୍ପିକ ଟ୍ରେନିଂ ପାଇଁ ବର୍ଷକ ପୂର୍ବେ ଆମେ ଚାଇନାର ୪ ସେଟ୍‌ ମଗାଇଥିଲୁ। ମାତ୍ର ଲକ୍‌ଡାଉନ୍‌ କୋହଳ ପରେ ଟ୍ରେନିଂ ଆରମ୍ଭ ହେବାବେଳେ ଆମେ ଏଗୁଡ଼ିକର ବ୍ୟବହାର କରି ନାହୁଁ। ଚାଇନିଜ ସମଗ୍ରୀକୁ ସମସ୍ତ ଲିଫ୍ଟରମାନେ ବିରୋଧ କରୁଛନ୍ତି ବୋଲି ସେ କହିଛନ୍ତି। ଶର୍ମା କହିଛନ୍ତି ଚାଇନାରୁ ଆମେ ପ୍ରଥମ ଥର କ୍ରୀଡ଼ା ସରଞ୍ଜାମ ମଗାଇଥିଲୁ। ଦେଖିଲୁ ତାହା ଅତ୍ୟନ୍ତ ନିମ୍ନ ମାନର। ଆମ ଓ୍ବେଟ୍‌ଲିଫ୍ଟରମାନେ ବର୍ତ୍ତମାନ ସ୍ବିଡେନ ତିଆର ସରଞ୍ଜାମରେ ଟ୍ରେନିଂ ନେଉଛନ୍ତି। ଅଧିକାଂଶ ଅନ୍ତର୍ଜାତୀୟ ପ୍ରତିଯୋଗିତାରେ ସ୍ବିଡିଶ କମ୍ପାନୀ ‘ଏଲିକୋ’ ନିର୍ମିତ ସରଞ୍ଜାମ ବ୍ୟବହାର କରିଥାନ୍ତି। ମୁଖ୍ୟ ଟ୍ରେନିଂ ପାଇଁ ସାଇ ଆମକୁ ଏଥିରୁ ୧୦ ସେଟ୍‌ ଯୋଗାଇ ଦେଇଛି।