ଚଢ଼ାଦରରେ ଧାନ ବିହନ ବିକ୍ରି ଅଭିଯୋଗ
7:38 amJune 21, 2019 / 21

ଛତ୍ରପୁର,୨୧ା୬(ଡି.ଏନ.ଏ)- ଗଞ୍ଜାମ ଜିଲାରେ ଚଢା ଦରରେ ଧାନ ବିହନ ବିକ୍ରି ଚାଲିଥିବା ଅଭିଯୋଗ ଆସିଛି। ପୂର୍ବରୁ ଘରୋଇ ଡିଲର ଓ ପ୍ରାଥମିକ ସମବାୟ ସେବା ସମିତିଗୁଡିକୁ ଜିଲାପାଳ ଏଥିପାଇଁ ତାଗିଦ୍‌ କରିଥିବା ନଜିର ରହିଛି ା ତେବେ ଠିକ୍‌ ସମୟରେ ସେବା ସମିତିଗୁଡିକ ଚାଷୀଙ୍କ ଚାହିଦା ମୁତାବକ ବିହନ ଆଣୁ ନାହାନ୍ତି। ଘରୋଇ ଡିଲରମାନେ ଏହାର ସୁଯୋଗ ନେଇ କେତେକ ସ୍ଥାନରେ ଚଢା ଦରରେ ବିହନ ବିକ୍ରି କରୁଛନ୍ତି ବୋଲି ଗୁରୁବାର ଛତ୍ରପୁରଠାରେ ଋଷିକୁଲ୍ୟା ରୟତ ମହାସଭା ପକ୍ଷରୁ ଅଭିଯୋଗ କରାଯାଇଛି। ସରକାରଙ୍କ ପକ୍ଷରୁ ବିହନ ନିଗମ ଜରିଆରେ ଚାଷୀଙ୍କୁ ରିହାତି ଦରରେ ଧାନ ବିହନ ଯୋଗାଇବା ପାଇଁ ଘରୋଇ ଡିଲର ଓ ସୋସାଇଟିଗୁଡିକୁ ଦାୟିତ୍ୱ ଦିଆଯାଇଛି। ହେଲେ କେତେକ ସ୍ଥାନରେ ସୋସାଇଟି ଠିକ୍‌ ସମୟରେ ଧାନ ବିହନ ଆଣୁନାହାନ୍ତି। ଡିଲର ମାନେ ଚଢା ଦରରେ ବିକ୍ରି କରୁଥିବା ପ୍ରଶାସନ ନିକଟରେ ଅଭିଯୋଗ ହେବାରୁ ଜିଲାପାଳ ଏ ନେଇ ତାଗିଦ୍‌ କରିଥିଲେ। ଅଚାନକ ଛତ୍ରପୁରଠାରେ ଥିବା ଏକ ଘରୋଇ ଡିଲର ଦୋକାନରେ ସକାଳୁ ସକାଳୁ ପହଞ୍ଚି ଜିଲାପାଳ ଯାଞ୍ଚ କରିଥିଲେ। ଏହାପରେ ବି ଚଢ଼ା ଦରରେ ବିହନ ବିକ୍ରି ଚାଲିଥିବା ଚାଷୀ ସଂଗଠନଗୁଡିକ ଅଭିଯୋଗ କରିଆସୁଛନ୍ତି। ଘରୋଇ ଡିଲର ଓ ଦୋକାନୀମାନଙ୍କ ଠାରୁ ଆନ୍ଧ୍ର ମସୁରୀ ୩୦ କି.ଗ୍ରାକୁ ୮୦୦ ଟଙ୍କାରେ କିଣିବାକୁ ବାଧ୍ୟ ହେଉଥିବା କୁହାଯାଇଛି ା ବିହନ ଚଢା ଦରରେ ବିକ୍ରି ହେଉଥିବା ନେଇ ସୀତାରାମ ପାଣିଗ୍ରାହୀ, ବିଶ୍ୱାନଥ ସାହୁ,ବାବୁଲା ସ୍ବାଇଁ, ଶନିଆ ସ୍ବାଇଁ, ବଳରାମ ରାଉତ ପ୍ରମୁଖ ଅଭିଯୋଗ କରିଛନ୍ତି। ପୂର୍ବରୁ କୃଷି ବିଭାଗ ତରଫରୁ ବିହନ ଚାଷୀଙ୍କୁ ଦିଆଯାଉଥିଲା। ଯାହାଫଳରେ ଚାଷୀମାନେ ଠିକ୍‌ ସମୟରେ ସୁବିଧାରେ ବିହନ ପାଉଥିଲେ। ଏଣୁ ପ୍ରତି ପଞ୍ଚାୟତରେ ଗୋଦାମ କରି ବିହନ ଯୋଗାଇଦେବାକୁ ଦାବି ହୋଇଛି ା