ବଅଁରପାଳ, ୨୦।୫ (ଡି.ଏନ୍.ଏ.) ଅନୁଗୋଳ ଜିଲା ବଅଁରପାଳ ବ୍ଲକ କୃଷି ବିଭାଗ ଅଧୀନରେ କାର୍ଯ୍ୟ କରୁଥିବା ଗ୍ରାମ୍ୟ କୃଷି କର୍ମଚାରୀମାନେ ନାନା ଅସୁବିଧା ଭୋଗୁଛନ୍ତି। କାର୍ଯ୍ୟ କରିବା ପାଇଁ କାର୍ଯ୍ୟାଳୟ ନ ଥିବା ବେଳେ ରହିବା ପାଇଁ ସେମାନଙ୍କୁ ସରକାରୀ କ୍ୱାର୍ଟର୍ସ ମଧ୍ୟ ମିଳୁନି। ଫଳରେ କିଏ ଭଡ଼ାଘରେ ରହି ସେଠାରେ କାର୍ଯ୍ୟ କରୁଛନ୍ତି ତ ଆଉ କିଏ ନିଜ ଘରେ କାର୍ଯ୍ୟାଳୟ ଖୋଲି ଦାୟିତ୍ୱ ତୁଲାଉଛନ୍ତି।
ବଅଁରପାଳ ବ୍ଲକର ୩୫ଟି ପଞ୍ଚାୟତରେ ଜଣେ ଲେଖାଏ ଗ୍ରାମ୍ୟ କୃଷି କର୍ମଚାରୀ ରହିବା କଥା। କିନ୍ତୁ ବର୍ତ୍ତମାନ ମାତ୍ର ୧୭ଜଣ କର୍ମଚାରୀ ଏହି ଦାୟିତ୍ୱରେ ଅଛନ୍ତି। ଫଳରେ କୃଷି ସମ୍ବନ୍ଧୀୟ ବିଭିନ୍ନ ସୁବିଧା ଓ ସୂଚନା ସମସ୍ତ ଚାଷୀଙ୍କ ନିକଟରେ ପହଞ୍ଚିପାରୁ ନାହିଁ। ଏପରି କି ବିଭାଗୀୟ କାର୍ଯ୍ୟାଳୟରେ ଉନ୍ନତମାନର କୃଷି ଉପକରଣ ଓ ରିହାତି ଦରରେ ବିହନ ମିଳୁଥିବା ବେଳେ ଉକ୍ତ ସୂଚନା କୃଷି କର୍ମଚାରୀମାନେ ଗ୍ରାମାଞ୍ଚଳରେ ଠିକଣା ଭାବେ ପହଞ୍ଚାଇ ପାରୁନାହାନ୍ତି। ପୂର୍ବରୁ ତୁବେ, କୁଲାଡ଼, ବଉଳିଗଡ଼, କାଣ୍ଡସର, ଜରାସିଂହା ଆଦି ପଞ୍ଚାୟତରେ ସ୍ବତନ୍ତ୍ର ଭାବେ କ୍ବାର୍ଟର୍ସ ସହ କାର୍ଯ୍ୟାଳୟ ବ୍ୟବସ୍ଥା ଥିଲା। ସେହି କ୍ବାର୍ଟର୍ସରେ କୃଷି କର୍ମଚାରୀମାନେ ରହିବା ସହ କୃଷି ସମ୍ବନ୍ଧୀୟ ବିଭିନ୍ନ ଜିନିଷପତ୍ର ରଖୁଥିଲେ। ଏଥିସହ ଚାଷୀମାନଙ୍କୁ ବିଭାଗର ବିଭିନ୍ନ ଯୋଜନା ସମ୍ପର୍କରେ ଅବଗତ କରାଉଥିଲେ। ମାତ୍ର କାଣ୍ଡସର, ବଉଳିଗଡ଼, ତୁବେ ଅଞ୍ଚଳରେ କୃଷି କର୍ମଚାରୀମାନଙ୍କ ପାଇଁ ରହିଥିବା କ୍ବାର୍ଟର୍ସଗୁଡ଼ିକ ଏବେ ଜରାଜୀର୍ଣ୍ଣ ଅବସ୍ଥାକୁ ଚାଲିଆସିଛି। ସେହିପରି କୁଲାଡ଼ ଓ ଜରାସିଂହା ଅଞ୍ଚଳରେ ଥିବା କ୍ବାର୍ଟର୍ସ ଅନ୍ୟମାନଙ୍କ କବ୍ଜାରେ ରହିଛି।
ଏ ସମ୍ପର୍କରେ ବଅଁରପାଳ ବ୍ଲକ ସହକାରୀ କୃଷି ଅଧିକାରୀ ସୁମନ୍ତ ନାୟକ କୁହନ୍ତି, ପୂର୍ବରୁ ବ୍ଲକ ଅଞ୍ଚଳରେ କୃଷି କର୍ମଚାରୀଙ୍କ ପାଇଁ କେତୋଟି ସ୍ଥାନରେ ସରକାରୀ କ୍ବାର୍ଟର୍ସ ଓ କାର୍ଯ୍ୟାଳୟ ରହିଥିଲା। ମାତ୍ର ସେଗୁଡ଼ିକ ଶୋଚନୀୟ ଅବସ୍ଥାକୁ ଆସିଗଲାଣି। ବର୍ତ୍ତମାନ ସରକାରଙ୍କ ପକ୍ଷରୁ ପ୍ରତ୍ୟେକ ପଞ୍ଚାୟତରେ କୃଷି ପରାମର୍ଶ କେନ୍ଦ୍ର ଖୋଲିବା ପାଇଁ ଯୋଜନା କରାଯାଉଛି। ସେଠାରେ କୃଷି କର୍ମଚାରୀମାନେ ରହି ଚାଷୀମାନଙ୍କୁ ଚାଷ ସମ୍ପର୍କରେ ସମସ୍ତ ପ୍ରକାର ପରାମର୍ଶ ଦେବେ।
