ଲାଠୋର, ୨୨।୨ (ଡି.ଏନ୍.ଏ.)-
ବଲାଙ୍ଗାରୀ ଜିଲା ଖପ୍ରାଖୋଲ ବ୍ଲକ ଲାଠୋର ଗଁ। ରେ ୨୦୧୩-୧୪ ସାଲେ ଲକ୍ଷାଧିକ୍ ଟଁକା ଖରଚ୍ରେ ଗୁଟେ ଗୋଷ୍ଠୀ କେନ୍ଦ୍ର ତିଆର ହେଇଛେ। ହେଲେ କେନ୍ଦ୍ରକେ ଯିବାର ଲାଗି ଆଏଜ୍ତକ ରାସ୍ତା ଖଁଡ଼େ ନଁ। ଇଁନ। ଏନ୍ତାଥି କେନ୍ଦ୍ରକେ ଲୋକ୍ ଯିବାର ଆଏବାର ଲାଗି ହଇରାନ ହରକତ ହେଉଥିବାର ଅଭିଯୋଗ ହେଉଛେ।
ସୂଚନା ଅନ୍ସାରେ ଲାଠୋର ଗଁ। ରେ ପାଖାପାଖି ୮ ହଜାର ଲୋକ୍ ବାସ କରୁଛନ୍। ଥାନୀଅ ଲୁକ୍କର ସୁବିଧା ଲାଗି ଲାଠୋର ସେଣ୍ଟ୍ରାଲ ବ୍ୟାଙ୍କ ପାସେ ଲକ୍ଷାଧିକ୍ ଟଁକା ଖରଚ୍ରେ ଗୁଟେ ଗୋଷ୍ଠୀ କେନ୍ଦ୍ର ତିଆର କରାଯାଇଛେ। ହେଲେ କେନ୍ଦ୍ର ତିଆର ହେବାର ଆଏଜ୍କେ ୫ ବଛର ବିତିଯାଇଥିଲେ ବି ଆଏଜ୍ତକ ରାସ୍ତା ଖଁଡ଼େ ତିଆର ନାଇଁ ହେଇପାରି। ଏନ୍ତାଥି କେନ୍ଦ୍ରରଟା ଲୁକ୍କର କାମ୍ରେ ନାଇଁ ଲାଗିପାରବାର। ଇଆଡ଼େ ଏଡ଼େ ବଡ଼ ଗଁାରେ ଗୁଟେ ନ ଗୋଷ୍ଠୀ କେନ୍ଦ୍ର ଥିଲାବେଲେ ଅନେକ ସମିଆରେ ଲୋକ୍ ଇ କେନ୍ଦ୍ର ଉପରେ ନିରଭର କରୁଛନ୍। ହେଲେ କେନ୍ଦ୍ରକେ ରାସ୍ତା ଅଭାବୁ ଲୋକ୍ ବଡ଼ା ହଇରାନ ହରକତ ହେଉଥିବାର ଅଭିଯୋଗ କରିଛନ୍। ଇ ବାବ୍ଦେ ଗଁାବାସୀ ବାରବାର ପଁଚେତ୍ କତୁରପକ୍ଷକୁଁ ଜନେଇ ନିରାଶ ହେଇଥିବାର କହିଛନ୍। ଗୋଷ୍ଠୀ କେନ୍ଦ୍ରରେ ବିଦ୍ୟୁତ୍, ପିଇଲା ପାଏନ୍, ରାସ୍ତା ସମସିଆ ରହିଛେ। ହେଲେ ଏଭେ ପଁଚେତ୍ ତରଫୁ ବିଦ୍ୟୁତ୍ ଆର ପିଇଲା ପାଏନ୍ ସମିଆର ସମାଧାନ କରାଯାଇଥିଲାବେଲେ ରାସ୍ତାର ବେବସ୍ତା ନାଇଁ କରାଯାଇ। ଇ ବାବ୍ଦେ ଲାଠୋର ସରପଁଚ୍ ପ୍ରବିଣ କୁମାର ଅଗ୍ରଓ୍ବାଲକୁଁ ପଚ୍ରାଲାରୁ କେତେ ଲୋକ୍ କେନ୍ଦ୍ରର ରାସ୍ତାକେ ଜବରଦଖଲ କରିଛନ୍। ଆଏବାର ଦିନେ ଖପ୍ରାଖୋଲ ତହସିଲଦାରକଁର ସଂଗେ ଯୋଗାଯୋଗ କରାଯିବା ଆର କେନ୍ଦ୍ରକେ ରାସ୍ତା ତିଆରବାର ବେବସ୍ତା କରାଯିବା ବଲି ସେ କହିଥିଲେ।
