ବ୍ରହ୍ମପୁର ଅଫିସ୍,୨୬ା୮-ଗଞ୍ଜାମ ଜିଲା ଭାରୋତ୍ତୋଳନ ସଂଘ ପକ୍ଷରୁ ସ୍ଥାନୀୟ ଉତ୍ତରେଶ୍ୱର ଭବନ ଠାରେ ରବିବାର ଗଞ୍ଜାମ ଜିଲା ଭାରୋତ୍ତୋଳନ ଚାମ୍ପିୟନଶିପ୍ ଅନୁଷ୍ଠିତ ହୋଇଯାଇଛି। ମୁଖ୍ୟଅତିଥି ଭାବେ ଏମ୍ପି ଚନ୍ଦ୍ରଶେଖର ସାହୁ ଯୋଗଦେଇ ଏହାକୁ ଉଦ୍ଘାଟନ କରିଥିବା ବେଳେ ସମ୍ମାନିତ ଅତିଥି ଭାବେ ବ୍ରହ୍ମପୁର ବିଧାୟକ ବିକ୍ରମ ପଣ୍ଡା ଏବଂ କବିସୂର୍ଯ୍ୟନଗର ବିଧାୟିକ ଲତିକା ପ୍ରଧାନ ଯୋଗଦେଇଥିଲେ। ସଂଘର ସଭାପତି କୁମୁଦ ଚନ୍ଦ୍ର ସାହୁ ଅଧ୍ୟକ୍ଷତା କରିଥିବା ବେଳେ ସଂପାଦକ ଗାଗାରିନ୍ ନାୟକ ପରିଚାଳନା କରିଥିଲେ। ରାଜ୍ୟ ଭାରୋତ୍ତୋଳନ ସଂଘର ସାଧାରଣ ସଂପାଦକ ନାରାୟଣ ସାହୁଙ୍କ ସମେତ ବହୁ ପୂର୍ବତନ ଖେଳାଳି ଉପସ୍ଥିତ ରହି ଖେଳାଳିଙ୍କୁ ଉତ୍ସାହିତ କରିଥିଲେ । ଏହାପରେ ପ୍ରତିଯୋଗିତା ଆୟୋଜିତ ହୋଇଥିଲା । କନିଷ୍ଠ ବାଳକ ୫୫ କି.ଗ୍ରା. ଓଜନ ବାଳକ ବର୍ଗରେ କୃଷ୍ଣଚନ୍ଦ୍ର ନାୟକ ମୋଟ ୧୫୬କି.ଗ୍ରା. ଓଜନ ଉଠାଇ ଚାମ୍ପିୟନ୍ ହୋଇଥିବା ବେଳେ ଆକାଶ ନାୟକ ୧୫୫କି.ଗ୍ରା.ଉଠାଇ ଦ୍ୱିତୀୟ ଏବଂ ସୁନିଲ ପ୍ରଧାନ ୧୪୯କି.ଗ୍ରା. ଉଠାଇ ତୃତୀୟ ହୋଇଛନ୍ତି ।
ବାଳକ ୬୧କି.ଗ୍ରା. ଓଜନ ବର୍ଗରେ ଗଙ୍ଗାଧର ସାହୁ ୨୦୮କି.ଗ୍ରା. ଓଜନ ଉଠାଇ ଚାମ୍ପିୟନ୍ ହୋଇଥିବା ବେଳେ ରାମ ଚନ୍ଦ୍ର ହେମ୍ବ୍ରମ୍(୨୦୨କି.ଗ୍ରା.) ଦ୍ୱିତୀୟ ଏବଂ ଜଗନ୍ନାଥ ସାହୁ(୧୬୦କି.ଗ୍ରା.) ତୃତୀୟ ହୋଇଛନ୍ତି । ୟୁଥ୍(ବାଳକ) ୪୯କି.ଗ୍ରା. ଓଜନ ବର୍ଗରେ କାହ୍ନା ବେହେରା ୧୦୬ କି.ଗ୍ରା. ଓଜନ ଉଠାଇ ଚାମ୍ପିୟନ୍ ହୋଇଥିବା ବେଳେ ମୁନା ନାୟକ(୧୦୬କି.ଗ୍ରା.) ଦ୍ୱିତୀୟ ଏବଂ ପ୍ରଦ୍ୟୁମ୍ନ ସାହୁ(୭୭ କି.ଗ୍ରା.) ତୃତୀୟ ସ୍ଥାନ ଅଧିକାର କରିଛନ୍ତି । ୟୁଥ୍(ବାଳିକା) ୬୪କି.ଗ୍ରା. ଓଜନ ବର୍ଗରେ ମନିଶା ସାହୁ ମୋଟ ୫୬କି.ଗ୍ରା. ଓଜନ ଉଠାଇ ଚାମ୍ପିୟନ୍ ହୋଇଛନ୍ତି । ଜୁନିୟର୍ ୬୪କି.ଗ୍ରା. ଓଜନ ବର୍ଗରେ ଜି.ଗୀତାଞ୍ଜଳୀ ୧୧୧କି.ଗ୍ରା. ଓଜନ ଉଠାଇ ଚାମ୍ପିୟନ୍
ହୋଇଥିବା ବେଳେ ଆଞ୍ଚଳ କୁମାରୀ ଗୌଡ଼(୮୮କି.ଗ୍ରା.) ଦ୍ୱିତୀୟ ହୋଇଛନ୍ତି ।
ସବ୍ଜୁନିୟର୍ ୟୁଥ୍ ୪୯କି.ଗ୍ରା. ଓଜନ ବର୍ଗରେ ଜ୍ୟୋତି ବଡ଼ମୁଣ୍ଡି ୯୭କି.ଗ୍ରା. ଓଜନ ଉଠାଇ ଚାମ୍ପିୟନ୍ ହୋଇଥିବା ବେଳେ ଶୁଭଦୀ ଗମାଙ୍ଗ(୬୦କି.ଗ୍ରା.) ଦ୍ୱିତୀୟ ଏବଂ ସୁମିତ୍ରା ମଲ୍ଲିକ(୪୮କି.ଗ୍ରା.) ତୃତୀୟ ହୋଇଛନ୍ତି ।
୫୫କି.ଗ୍ରା. ଓଜନ ବର୍ଗରେ ରଶ୍ମିତା କୁମାରୀ ମହାରଣା ୯୯କି.ଗ୍ରା. ଓଜନ ଉଠାଇ ଚାମ୍ପିୟନ୍ ହୋଇଥିବା ବେଳେ ୬୩ କି.ଗ୍ରା. ଓଜନ ଉଠାଇ ମିନି ସବର ଦ୍ୱିତୀୟ ଏବଂ ପୁଷ୍ପାଞ୍ଜଳୀ ସାହୁ ୫୭କି.ଗ୍ରା. ଓଜନ ଉଠାଇ ତୃତୀୟ ସ୍ଥାନ ଅଧିକାର କରିଛନ୍ତି। ୫୯କି.ଗ୍ରା. ଓଜନ ବର୍ଗରେ ସଂଗୀତା ପାଢ଼ୀ ୧୧୪କି.ଗ୍ରା. ଓଜନ ଉଠାଇ ଚାମ୍ପିୟନ୍ ହୋଇଥିବା ବେଳେ ରିନା ମଲ୍ଲିକ(୭୬କି.ଗ୍ରା.) ଦ୍ୱିତୀୟ ଏବଂ ଇଶା ନାୟକ ୫୩କି.ଗ୍ରା. ଓଜନ ଉଠାଇ ତୃତୀୟ ହୋଇଛନ୍ତି ।
