ଭୁବନେଶ୍ୱର,୨୦।୧(ବ୍ୟୁରୋ): ଅଧିକାଂଶ ବ୍ଲକ୍ ଶିକ୍ଷାଧିକାରୀଙ୍କ କାର୍ଯ୍ୟାଳୟରେ ବହୁ ପଦବୀ ଖାଲି ପଡ଼ିଛି। ଖାଲି ପଡ଼ିଥିବା ବିଇଓ, ଏବିଇଓ, ବିଆର୍ସିସି ପଦବୀ ପୂରଣ କରାଯାଉ ନ ଥିବାରୁ ଶିକ୍ଷା ବ୍ୟବସ୍ଥା ଗୁରୁତର ପ୍ରଭାବିତ ହୋଇଛି। ସରକାର ଏଥିପ୍ରତି ଆଦୌ ତପତ୍ରତା ପ୍ରକାଶ କରୁନାହାନ୍ତି। ୭ ବର୍ଷରୁ ଊର୍ଦ୍ଧ୍ୱ ହେବ ରାଜ୍ୟରେ ଓଡ଼ିଶା ଏଜୁକେଶନ ସର୍ଭିସ୍ (ଓଇଏସ୍) ପରୀକ୍ଷା କରାଯାଇନାହିଁ। ଫଳରେ ଅନେକ ଯୋଗ୍ୟ ତଥା ଦକ୍ଷ ଶିକ୍ଷକ ଏଥିରୁ ବଞ୍ଚତ୍ତ ହୋଇଛନ୍ତି। ଏପରି କି ବିନା ପଦୋନ୍ନତିରେ ଅନେକ ଶିକ୍ଷକ ଅବସର ଗ୍ରହଣ ମଧ୍ୟ କରିସାରିଲେଣି। ତେଣୁ ରାଜ୍ୟରେ ଓଇଏସ୍ ପରୀକ୍ଷା କରାଯାଇ ଖାଲି ପଡ଼ିଥିବା ପଦବୀ ତୁରନ୍ତ ପୂରଣ କରିବାକୁ ରାଜ୍ୟ ବିଏଡ୍ କନିଷ୍ଠ ଶିକ୍ଷକ ସଂଘ ସଭାପତି ସରୋଜ କୁମାର ପଣ୍ଡା ଦାବି କରିଛନ୍ତି।
ସେ ଏକ ପ୍ରେସ୍ ବିବୃତିରେ କହିଛନ୍ତି, ରାଜ୍ୟ ସରକାର ସମସ୍ତ ବିଭାଗର କର୍ମଚାରୀଙ୍କୁ ପ୍ରମୋଶନ ଦେଇ ଖୁସି କରାଇଛନ୍ତି। ୫-ଟି ଲଗାଇ ସବୁ ବିଭାଗଗୁଡ଼ିକୁ ବ୍ୟବସ୍ଥିତ କରିବାକୁ ଚେଷ୍ଟା ଚଳାଇଛନ୍ତି। କିନ୍ତୁ ଅତ୍ୟନ୍ତ ଦୁଃଖର ବିଷୟ, ରାଜ୍ୟର ବିଦ୍ୟାଳୟ ଓ ଗଣଶିକ୍ଷା ବିଭାଗକୁ କାହିଁକି ଏତେ ଅଣଦେଖା କରାଯାଉଛି। ଯଦି ରାଜ୍ୟରେ ଖାଲି ପଡ଼ିଥିବା ସମସ୍ତ ଶିକ୍ଷକ ପଦବୀ ପୂରଣ ହେବା ସହ ଶ୍ରେଣୀ ଅନୁସାରେ ଶିକ୍ଷକ ନିଯୁକ୍ତି ଦିଆଯିବ ତେବେ ରାଜ୍ୟରେ ଶିକ୍ଷାର ମାନ ବଢିବ। ପିଲାଙ୍କୁ ଭଲ ଶିକ୍ଷା ମିଳିବ। ପ୍ରାଥମିକ ଓ ଉଚ୍ଚ ପ୍ରାଥମିକ ଶିକ୍ଷକଙ୍କ ମଧ୍ୟରୁ ଯୋଗ୍ୟତା ଆଧାରରେ ପରୀକ୍ଷା କରାଇ ଉପଯୁକ୍ତ ସ୍ଥାନରେ ଅବସ୍ଥାପିତ କରନ୍ତୁ ବୋଲି ସଂଘ ଦାବି କରି ଆସୁଥିବା ସେ କହିଛନ୍ତି।
