ଗୋପ,୨୦।୧(ଡ଼ି.ଏନ୍.ଏ): ଆସ୍ତେ ଆସ୍ତେ ଗ୍ରାମାଞ୍ଚଳର ଲୋକମାନେ ଆଧୁନିକତାର ଛାପକୁ ଅଧିକ ପସନ୍ଦ କରୁଥିବାବେଳେ ଏହି ଆଧୁନିକତାରେ ହଜିଯାଉଛି ମୃଦଙ୍ଗ, ତବଲା ଓ ପଖଜର ବାଦନ। କିନ୍ତୁ ନିଜର ବୃତ୍ତିକୁ ଦୀର୍ଘ ୪୦ ବର୍ଷ ଧରି ଛାଡ଼ିପାରିନାହାନ୍ତି ଗୋପ ବ୍ଲକ୍ ଅଧୀନ ବଡ଼ତରା ଗ୍ରାମପଞ୍ଚାୟତର କାଳନ୍ଦି ଗୋଚ୍ଛାୟତ। କାଳନ୍ଦି ବାପାଙ୍କର ଏହି ବୃତ୍ତିକୁ ଆଦରି ନେଇ ତବଲା, ମୃଦଙ୍ଗ, ପଖଜ, ଚାଣ୍ଟି, ନାଲ, ଟିପୁରା ଆଦି ମରାମତି କରି ଜୀବନ ଜିଉଛନ୍ତି। ଏହି ମୃଦଙ୍ଗ ଓ ପଖଜର ମରାମତି ହିଁ ଆମ ୫ ପ୍ରାଣୀର ଆହାର ଯୋଗାଉଛି ବୋଲି କାଳନ୍ଦି କହିଛନ୍ତି। ଦିନ ଥିଲା ସନ୍ଧ୍ୟା ଆସିଲେ ବିଭିନ୍ନ ଗାଁରେ ଥିବା ଭାଗବତ ଟୁଙ୍ଗି, ଗାଁ କୋଠଘର, ମନ୍ଦିରବେଢ଼ା ଆଦି ସ୍ଥାନଗୁଡ଼ିକରେ ହରିନାମ ସହିତ ମୃଦଙ୍ଗ, ତବଲା, ପଖଜର ବାଦନ ଶୁଭୁଥିବାବେଳେ ଏବେ ତାହା କ୍ରମଶଃ ଆଧୁନିକତାର ସ୍ପର୍ଶରେ ଶୁଭୁ ନ ଥିବା ଭଳି ଜଣାପଡ଼ିଛି। ମାତ୍ର କାଳନ୍ଦି ଏହି ବୃତ୍ତିକୁ ନ ଛାଡ଼ି ଏହି ସବୁ ବାଦନର ମରାମତି କରିବା ସହ ନୂଆ ତିଆରି କରୁଥିବା ଜଣାପଡ଼ିଛି। ପ୍ରତ୍ୟେକ ଦିନ ୧୦ ରୁ ୧୨ ଘଣ୍ଟା ଧରି ଏହି କାର୍ଯ୍ୟ କରୁଥିବାବେଳେ ମାତ୍ର ୪୦୦ରୁ ୫୦୦ ଟଙ୍କା ରୋଜଗାର କରୁଛନ୍ତି। ତାଙ୍କ ନିକଟକୁ ପୁରୀ ଜିଲାର ବିଭିନ୍ନ ଅଞ୍ଚଳରୁ ଏହି ବାଦନ ଜିନିଷଗୁଡ଼ିକ ମରାମତି କରିବାକୁ ଓ ନୂଆ ନେବାକୁ ମଧ୍ୟ କିଛି ଲୋକ ଆସୁଛନ୍ତି। ଏହିସବୁ ବାଦନ ଯନ୍ତ୍ର ମରାମତି ଓ ନୂଆକାମରେ ଚମଡ଼ା, ମାଟିହାଣ୍ଡି, ସୁତୁଲି ଆଦି ଲାଗୁଥିବାବେଳେ କେବଳ ବୃତ୍ତି ଲାଗି ଏହି କାମ ମୁଁ ଛାଡ଼ିପାରୁ ନାହିଁ। ମୋ ପରେ ପରିବାର ଏହି ବୃତ୍ତିକୁ ରଖିପାରିବ ନାହିଁ ବୋଲି ସେ ଦୁଃଖର ସହ କହିଛନ୍ତି। ଯଦି ତାଙ୍କୁ ସରକାରୀ ସହାୟତା କିଛି ମିଳନ୍ତା ସେ ହୁଏତ ନିଜର ବୃତ୍ତିକୁ ଆଉ କିଛିଦିନ ନେଇପାରନ୍ତେ ବୋଲି ପ୍ରକାଶ କରିଛନ୍ତି।
