ଢେଙ୍କାନାଳ ଅଫିସ, ୧୩।୯-ଢେଙ୍କାନାଳ ଜିଲା ଓଡ଼ାପଡ଼ା ବ୍ଲକ କାଉଁରିଆପାଳ ଗ୍ରାମର ହିତାଧିକାରୀଙ୍କୁ ଖାଉଟି ସାମଗ୍ରୀ ପ୍ରଦାନରେ ଅନିୟମିତତା କରାଯାଉଥିବା ଅଭିଯୋଗ ହୋଇଛି। ବାରମ୍ବାର ଦୃଷ୍ଟି ଆକର୍ଷଣ ସତ୍ତ୍ୱେ ଏ ନେଇ କୌଣସି ପଦକ୍ଷେପ ନିଆଯାଉନାହିଁ। ଏହାର ପ୍ରତିବାଦରେ ଗୁରୁବାର ପଞ୍ଚାୟତ ପ୍ରତିନିଧିଙ୍କ ସମେତ ଅଞ୍ଚଳବାସୀ ବ୍ଲକ ଯୋଗାଣ ବିଭାଗ କାର୍ଯ୍ୟାଳୟ ଘେରିବା ସହ ତାଲା ପକାଇଦେଇଥିଲେ।
ଅଭିଯୋଗରୁ ଜଣାପଡ଼ିଛି, କାଉଁରିଆପାଳ ଗ୍ରାମରେ କାର୍ଡଧାରୀଙ୍କ ସଂଖ୍ୟା ୨୨୦। କିନ୍ତୁ ଗ୍ରାମରେ କୌଣସି ରିଟେଲର ପଏଣ୍ଟ ନାହିଁ। ୩ବର୍ଷ ହେଲା ଜଣେ ବ୍ୟକ୍ତିଙ୍କୁ ଯୋଗାଣ ସାମଗ୍ରୀ ବଣ୍ଟନ ଦାୟିତ୍ୱ ଦିଆଯାଇଛି। ଏଥିରେ ବ୍ୟାପକ ଅନିୟମିତା ହେଉଛି। ଗ୍ରାମରେ ଜଣେ ରିଟେଲର ନିଯୁକ୍ତି ପାଇଁ ବାରମ୍ବାର ଦାବି ହେଉଥିଲେ ମଧ୍ୟ ଏଥିପ୍ରତି ବିଭାଗୀୟ ଅଧିକାରୀ ଦୃଷ୍ଟି ଦେଉନାହାନ୍ତି। ଦିନକୁ ଦିନ ସମସ୍ୟା ବଢ଼ିଚାଲିଥିବାବେଳେ ଗୁରୁବାର ଅସନ୍ତୋଷର ପ୍ରତିଫଳନ ଦେଖିବାକୁ ମିଳିଥିଲା। ବ୍ଲକ ଅଧ୍ୟକ୍ଷା ସସ୍ମିତା ମହାନ୍ତିଙ୍କ ସମେତ ଅନ୍ୟ ପଞ୍ଚାୟତ ପ୍ରତିନିଧିମାନେ ଘଟଣାର ତଦନ୍ତ ଦାବିକରି କାର୍ଯ୍ୟାଳୟ ଘେରାଉ କରିଥିଲେ। ଏ ନେଇ ବିଡିଓ ଉତ୍କଳ ରଞ୍ଜନ ଆଚାର୍ଯ୍ୟ କୁହନ୍ତି, ଅଭିଯୋଗ ମିଳିଛି। କିଛି ସମସ୍ୟା ରହିଛି। ହେଲେ ଏହାର ପ୍ରାମାଣିକ ତଥ୍ୟ ମିଳୁନାହିଁ। ତଥାପି ଅଭିଯୋଗର ତଦନ୍ତ କରାଯିବ।
