ଛେଣ୍ଡିପଦା,୨୧ା୭(ଡି.ଏନ.ଏ.) – ଅନୁଗୋଳ ଜିଲା ଛେଣ୍ଡିପଦା ବ୍ଲକ ବାଗେଡିଆ ସଜରାସାହିରୁ ପୁରୁଣାଗଡ ଲମ୍ବିଥିବା ବାଲିବନ୍ଧ କ୍ଷୁଦ୍ର ଜଳସେଚନ ପ୍ରକଳ୍ପ କେନାଲ କାମକୁ ନେଇ ଶନିବାର ଉତ୍ତେଜନା ଦେଖାଦେଇଛି। ପ୍ରକଳ୍ପ ବେଳେ କ୍ଷତିଗ୍ରସ୍ତ ହୋଇଥିବା ବାଗେଡିଆ ଗ୍ରାମର ଲୋକେ ଏହାକୁ ବିରୋଧ କରି କାମ ବନ୍ଦ କରାଇଦେଇଥିବାବେଳେ କେନାଲ କାମ ପୁନଃ ଚାଲୁ କରିବା ଦାବିରେ ସନ୍ଧ୍ୟାରେ ପୁରୁଣାଗଡ ଗ୍ରାମବାସୀ ରାସ୍ତାରୋକୋ ଆନ୍ଦୋଳନ ଚଲାଇଛନ୍ତି।
ଘଟଣାରୁ ଜଣାପଡିଛି, ବାଗେଡିଆ ବାଲିବନ୍ଧ କ୍ଷୁଦ୍ର ଜଳସେଚନ ପ୍ରକଳ୍ପର ମୁଖ୍ୟ କେନାଲ ବାଗେଡିଆ ସଜରାସାହିଠାରୁ ପୁରୁଣାଗଡ ପର୍ଯ୍ୟନ୍ତ ପ୍ରାୟ ୨ କିମି ଲମ୍ବିଛି। ଏହି କେନାଲ ନିର୍ମାଣ ବେଳେ ବାଗେଡିଆ ସଜରାସାହି ନିକଟରେ ଗ୍ରାମର କେତେଜଣ ସେମାନଙ୍କ ଜାଗା ହରାଇଥିଲେ। ହେଲେ ଆଜି ପର୍ଯ୍ୟନ୍ତ ସେମାନଙ୍କୁ କ୍ଷତିପୂରଣ ପ୍ରଦାନ କରାଯାଇ ନ ଥିବା ଅଭିଯୋଗ କରି ବାଗେଡିଆର କ୍ଷତିଗ୍ରସ୍ତମାନେ ସକାଳେ କାମ ହେଉଥିବା ସ୍ଥାନରେ ପହଞ୍ଚି ବିରୋଧ କରିଥିଲେ। ଫଳରେ ଠିକାସଂସ୍ଥା ପକ୍ଷରୁ କାମ ବନ୍ଦ କରିଦିଆଯାଇଥିଲା। ଏ ବିଷୟରେ ପୁରୁଣାଗଡ ଗ୍ରାମବାସୀ ଜାଣିବା ପରେ ଅପରାହ୍ନରେ ପୁନଃ କେନାଲ କାମ ସହ ହୁଡା ରାସ୍ତା ନିର୍ମାଣ କାମ ଚାଲୁ କରିବା ପାଇଁ ଦାବି କରିଥିଲେ। ଏଥିସହ ଟାୟାର ଜାଳି ଛେଣ୍ଡିପଦା-ବାଗେଡିଆ ମୁଖ୍ୟ ରାସ୍ତା ଅବରୋଧ କରିଥିଲେ। ଏଥିଯୋଗୁ ସେଠାରେ ଯାତାୟାତ ବାଧାପ୍ରାପ୍ତ ହୋଇଥିଲା। ଖବରଲେଖା ହେବା ସୁଦ୍ଧା କୌଣସି ପ୍ରଶାସନିକ ଅଧିକାରୀ କିମ୍ବା ପୋଲିସ ସେଠାରେ ପହଞ୍ଚି ନ ଥିବା ଜଣାପଡିଛି। ଏହାର ସମାଧାନ ନ ହେଲେ ଆନ୍ଦୋଳନ ଜାରି ରହିବ ବୋଲି ଚେତାବନୀ ଦିଆଯାଇଛି। ଖବରପାଇ ବାଗେଡିଆ ଫାଣ୍ଡି ଅଧିକାରୀ ରମେଶ ଚନ୍ଦ୍ର ପ୍ରଧାନ ଏବଂ ପୋଲିସ କର୍ମଚାରୀମାନେ ଘଟଣାସ୍ଥଳରେ ପହଞ୍ଚି ଆନ୍ଦୋଳନକାରୀଙ୍କ ସହ ଆଲୋଚନା କରିଥିଲେ। ୩ ଦିନ ପର୍ଯ୍ୟନ୍ତ ନିର୍ମାଣ କାର୍ଯ୍ୟ ବନ୍ଦ ରଖାଯାଇ ରାଜସ୍ବ ବିଭାଗ ପକ୍ଷରୁ ତହସିଲଦାର ଏବଂ ରାଜସ୍ବ ନିରୀକ୍ଷକଙ୍କ ଉପସ୍ଥିତିରେ ଜମି ଚିହ୍ନଟ କରାଯିବ। ପରେ ନିୟମାନୁସାରେ କେନାଲ ପୁନଃରୁଦ୍ଧାର କାମ ଆରମ୍ଭ କରାଯିବ ବୋଲି ପ୍ରତିଶ୍ରୁତି ମିଳିବା ପରେ ରାତି ପ୍ରାୟ ୧୦ଟା ବେଳେ ରାସ୍ତାରୋକୋ ହଟିଥିଲା।
