ନୂଆଦିଲ୍ଲୀ, ୨୨ା୬ (ପି.ଟି.)-କିମ୍ବଦନ୍ତୀ ପ୍ରଥମଶ୍ରେଣୀ ସ୍ପିନର ରାଜିନ୍ଦର ଗୋଏଲଙ୍କର ରବିବାର ପରାଲୋକ ଘଟିଛି। ସେ ବାର୍ଦ୍ଧକ୍ୟଜନିତ ରୋଗରେ ପୀଡ଼ିତ ଥିଲେ। ରାଜିନ୍ଦରଙ୍କୁ ୭୭ ବର୍ଷ ହୋଇଥିଲା। ସେ ତାଙ୍କ ସ୍ତ୍ରୀ ଏବଂ ପୁତ୍ର ନୀତୀନ ଗୋଏଲଙ୍କୁ ଛାଡ଼ି ଚାଲିଯାଇଛନ୍ତି। ରାଜିନ୍ଦର ଜଣେ ଘରୋଇ ମ୍ୟାଚ ରେଫରି ମଧ୍ୟ ଥିଲେ। ବିଶନ ସିଂ ବେଦୀଙ୍କ ଯୁଗରେ ଏହି ବାମହାତୀ ସ୍ପିନର ଦୁର୍ଭାଗ୍ୟଜନକ ଭାବେ ଭାରତୀୟ ଦଳରେ ସ୍ଥାନ ପାଇ ପାରି ନ ଥିଲେ। ଘରୋଇ କ୍ରିକେଟରେ ସେ ହରିୟାଣା ଓ ଉତ୍ତରାଞ୍ଚଳରୁ ପ୍ରତିନିଧିତ୍ୱ କରିଥିଲେ। ସେ ୧୫୭ ପ୍ରଥମ ଶ୍ରେଣୀ ମ୍ୟାଚରେ ୭୫୦ ଉଇକେଟ ଅକ୍ତିଆର କରିଥିଲେ। ୪୪ବର୍ଷ ବୟସ ପର୍ଯ୍ୟନ୍ତ ସେ ପ୍ରଥମ ଶ୍ରେଣୀ କ୍ରିକେଟ ଖେଳି ଆସୁଥିଲେ। ଘଟଣାକ୍ରମେ ବେଦୀ ତାଙ୍କୁ ବିସିସିଆଇର ସି.କେ. ନାଇଡୁ ଲାଇଫ୍ଟାଇମ୍ ଆଚିଭ୍ମେଣ୍ଟ ଆଓ୍ବାର୍ଡ ପ୍ରଦାନ କରିଥିଲେ। ବିସିସିଆଇର ପୂର୍ବତନ ସଭାପତି ରଣବୀର ସିଂ ରାଜିନ୍ଦରଙ୍କ ବିୟୋଗରେ ଗଭୀର ଶୋକ ପ୍ରକାଶ କରିଛନ୍ତି। ଅବସର ପରେ ଖେଳ ପ୍ରତି ରାଜିନ୍ଦରଙ୍କ ଅବଦାନ ଉଲ୍ଲେଖନୀୟ ଥିଲା। ଦେଶର ସେ ଥିଲେ ଅନ୍ୟତମ ଶ୍ରେଷ୍ଠ ବାମହାତୀ ସ୍ପିନର ବୋଲି ସେ କହିଛନ୍ତି।
