କେନ୍ଦୁଝର,୨୫।୪(ସ୍ବ.ପ୍ର.): କେନ୍ଦୁଝର ଜିଲା ସଦର ଥାନା ଅନ୍ତର୍ଗତ ପଳାଶପଙ୍ଗାଠାରେ ଚାଲିଥିବା ଟ୍ରାନ୍ସପୋର୍ଟ ଅଫିସକୁ ସ୍ଥାନୀୟ ସରପଞ୍ଚ ଓ ସଦର ପୋଲିସ ଉଦ୍ୟମରେ ଶନିବାର ବନ୍ଦ କରାଯାଇଛି। ଫଳରେ ଖଣିଜ ପଥର ପରିବହନ ପାଇଁ ଏଠାରେ ହେଉଥିବା ଭିଡ଼ କମିବ ବୋଲି ସ୍ଥାନୀୟ ଲୋକମାନେ ଆଶା ବାନ୍ଧିଛନ୍ତି।
ପ୍ରକାଶ ଯେ, ଯୋଡ଼ା, ବଡ଼ବିଲ ଓ କୋଇଡା ସେକ୍ଟରରୁ ଖଣିଜ ପଥର ପାରାଦୀପକୁ ପ୍ରତ୍ୟେକ ଦିନ ଶହ ଶହ ଟ୍ରକ୍ରେ ପରିବହନ ହୋଇଥାଏ। କରୋନା କଟକଣା ସତ୍ତ୍ୱେ ସରକାର ଲୁହାପଥର, ପଥର ପରିବହନ ଉପରେ କଟକଣା ଲାଗୁ କରି ନ ଥିଲେ। ତେବେ ଖଣି ଠାରୁ ପ୍ରାୟ ୬୦ ରୁ ୧୦୦ କିମି ଦୂର ପଳାଶପଙ୍ଗାଠାରେ ଟ୍ରାନ୍ସପୋର୍ଟରମାନେ ଅଫିସ ଖୋଲି ଟ୍ରକଚାଳକଙ୍କୁ ପରିବହନ ପାଇଁ ଅର୍ଡର ଦେଉଥିଲେ। ଫଳରେ କଟକଣା ସତ୍ତ୍ୱେ ଟ୍ରକ ଡ୍ରାଇଭରଙ୍କ ପ୍ରବଳ ଭିଡ଼ ଜମୁଥିଲା। ଏପରିକି ସେଠାରେ ସାମାଜିକ ଦୂରତ୍ୱ, ମାସ୍କ ବ୍ୟବହାର ଆଦି ପାଲନ ହେଉନଥିବାରୁ କରନା ସଂକ୍ରମଣ ଆଶଙ୍କା କରି ସ୍ଥାନୀୟ ଲୋକମାନେ ଭୟଭୀତ ହୋଉ ପଡୁଥିଲେ। ବିଭିନ୍ନ ଅଞ୍ଚଳର ଡ୍ରାଇଭର ଆସି ବିନା ସୁରକ୍ଷା ବ୍ୟବସ୍ଥାରେ ଭିଡ଼ ଜମାଉଥିଲେ। ଅଭିଯୋଗ କଲେ ମଧ୍ୟ ସ୍ଥାନୀୟ ପଳାଶପଙ୍ଗା ଫାଣ୍ଡି ପୋଲିସ ଶୁଣୁ ନ ଥିବାରୁ ଅସନ୍ତୋଷ ବୃଦ୍ଧି ପାଇଥିଲା। ଏନେଇ ଶନିବାର ସ୍ଥାନୀୟ ଲୋକ ଟ୍ରାନ୍ସପୋର୍ଟ ଅଫିସ ଘେରାଉ କରିବାରୁ ଉତ୍ତେଜନା ପରିସ୍ଥିତି ଉପୁଜିଥିଲା। ପରେ ସ୍ଥାନୀୟ ସରପଞ୍ଚ ସଞ୍ଜୟ ନାୟକ ହସ୍ତକ୍ଷେପ କରି ରାସ୍ତାରେ ଜମୁଥିବା ଟ୍ରକ ଓ ଡ୍ରାଇଭର ୟମାନଙ୍କ ଭିଡ଼ ଏସ୍ପି ଓ ସଦର ଥାନା ଦାୟିତ୍ୱରେ ଥିବା ଡିଏସ୍ପିଙ୍କ ହସ୍ତକ୍ଷେପ ପରେ ସଦର ଥାନା ଅଧିକାରୀ ଜୟ ନାରାୟଣ ଖଣ୍ଡେଇ ଶନିବାର ଯାଇ ଆଲୋଚନା କରି ଅଫିସ ବନ୍ଦ କରିବାକୁ କହିଥିଲେ। ଏହାକୁ ସ୍ଥାନୀୟ ଲୋକ ସ୍ବାଗତ କରିଥିଲେ ହେଁ ଆଗାମୀ ଦିନରେ ଏଭଳି ସମସ୍ୟା ହେଲେ ଦୃଢ଼ କାର୍ଯ୍ୟାନୁଷ୍ଠାନ ଗ୍ରହଣ କରିବାକୁ ଦାବି ହେଉଛି।
