ସାଧାରଣତଃ ଯୁବକମାନେ ଚାଷ ଛାଡି ଚାକିରି କରିବାକୁ ଭଲ ପାଆନ୍ତି। କିନ୍ତୁ ଜଣେ ଆଇଟି ଇଞ୍ଜିନିୟର ଚାକିରି ଛାଡି ଚାଷ କରି ଲୋକମାନଙ୍କୁ ଜୈବିକ ପରିବା ଚାଷ କରିବାକୁ ଉତ୍ସାହିତ କରୁଛନ୍ତି। ଏହି ବ୍ୟକ୍ତି ଜଣକ ହେଉଛନ୍ତି ସୁରେଶ ଦେବାଙ୍ଗ। କେବଳ ଜୈବିକ ଚାଷ କରୁନାହାନ୍ତି କେଶବ, ବରଂ ସ୍ଥାନୀୟ ଅଞ୍ଚଳରେ କେମିକାଲ ଓ କୀଟନାଶକ ମୁକ୍ତ ଚାଷ ଲାଗି ଏକ ଅଭିଯାନ ଆରମ୍ଭ କରିଛନ୍ତି। ତାଙ୍କୁ ଏବେ ବୟସ ୪୮। କାଲିଫର୍ନିଆରେ ଆଇଟି ପ୍ରଫେଶନାଲ ଭାବେ ସେ କାର୍ଯ୍ୟ କରୁଥିଲେ। ଅଧିକ ବେତନ ମଧ୍ୟ ପାଉଥିଲେ। କିନ୍ତୁ ଏହି ଚାକିରି ଛାଡି ୨୦୧୬ରେ ସେ କର୍ନାଟକ ମହୀଶୂରରର ଏଚ୍ଡି କୋଟେ ବ୍ଲକ୍ର ପୋରା ଗାଁକୁ ଫେରି ଆସିଥିଲେ। ସେଠାରେ ୬ ଏକର ଜମି କିଣି ସେଥିରେ ଅର୍ଗାନିକ କୃଷି ଆରମ୍ଭ କରିଥିଲେ। ଏହି ସମୟରେ ମରୁଡିପ୍ରବଣ ପୋରାରେ କୃଷକମାନେ ବି ପୂରା ଚିନ୍ତାରେ ରହିଥିଲେ। ସେମାନେ ବାହାରକୁ ଚାକିରି ଅନ୍ବେଷଣରେ ଚାଲିଯାଉଥିଲେ। କିନ୍ତୁ ଦେବାଙ୍ଗ ସେଠାରେ ଚାଷ ଆରମ୍ଭ କରିବା ପରେ ଲୋକମାନେ ଚାଷ କରିବାକୁ ଆଗ୍ରହ ପ୍ରକାଶ କରିଛନ୍ତି। କିଭଳି କମ୍ ପାଣିରେ ଭଲ ଚାଷ କରାଯାଇପାରିବ ସେ ସମ୍ପର୍କରେ ସୁରେଶ ଲୋକମାନଙ୍କୁ ପ୍ରଶିକ୍ଷଣ ଦେଉଛନ୍ତି। ମୁଖ୍ୟତଃ ବର୍ଷାଜଳ ସଂଗ୍ରହ କରାଯାଇ ତାହାକୁ ଉପଯୋଗ କରି ଚାଷ କରାଯିବା ପଦ୍ଧତି ଉପରେ ସେ ଗୁରୁତ୍ୱ ଦେଉଛନ୍ତି। ୧.୨୫ ଲକ୍ଷ ଲିଟର ବର୍ଷା ଜଳ ସଂରକ୍ଷଣ ହେବାଭଳି ପୋଖରୀଟିଏ ଖୋଳି ଜଳସେଚନର ସୁବିଧା କରିଛନ୍ତି। ସେ ଆପଣାଉଥିବା ଜଳସେଚନରେ ପାରମ୍ପରିକ ପଦ୍ଧତିଠାରୁ ପାଖାପାଖି ୫୦ପ୍ରତିଶତ ଜଳ ବଞ୍ଚାଯାଇପାରୁଛି। ପ୍ରତିବର୍ଷ ସେ ୧୦-୧୫ କୁଇଣ୍ଟାଲ ଜୈବିକ ପରିବା,୪୦ ଟନ୍ କଦଳୀ ଉପତ୍ାଦନ କରି ପ୍ରାୟ ବର୍ଷକୁ ୬ ଲକ୍ଷ ଟଙ୍କା ଲାଭ କରୁଛନ୍ତି। ଅର୍ଗାନିକ ପରିବାଗୁଡିକୁ ସ୍ଥାନୀୟ ଅଞ୍ଚଳରେ ପରିବା ଦୋକାନୀ,ଅର୍ଗାନିକ ଫୁଡ ଷ୍ଟୋର ଓ କମ୍ପାନୀଗୁଡିକ ସହ ଚୁକ୍ତି ବି କରିଛନ୍ତି ଦେବାଙ୍ଗ ।
